Баркарола

Баркарола (ит. barca - чамец) народна писня венециянских ґондолирох;^[1] у вецей музичних жридлох композиция ше спомина як ґондолєра.^[2]

Настала у Италиї у чудесним городзе на води Венециї по чиїх улїцох нєчуйно плїваю длугоки чамци-ґондоли. Веслаюци у ґондолох днями и ноцами, настали писнї баркароли. По веслачох и ґондолох дзепоєдни их наволую ґондолєри, Писнї на води. Баркаролу характерує умерени темпо у 6/8 такту, лирика, мелодичносц, хтору провадзи умирююци ритем. Вон дочарює гойсанє на габох хтори ше благо зменюю єдна за другу.

Тота музична форма була популарна у периодзе романтизма у 19. вику. Композиторох романтизма прицагнул мегки и благи ритем баркароли (ґондолєри), хтори их инспировал твориц у тей форми. Музична форма баркарола ше розширела у европских державох и велї композиторе компоновали вокални баркароли a тиж и у инструменталней форми поготов за клавир.

Баркароли компоновали композиторе:

Польски композитор Фредерик Шопен компоновал дїло за клавир зоз назву Баркарола у F- duru (оп. 60), написана 1846. року.
Композитор Ян Ґал написал оперу Баркарола 1884. року.
Петро Илїч Чайковски, у циклусу Рочни часци находзи ше дїло Юний – Баркарола.
Феликс Менделсон у своїх зборнїкох Писнї без словох тиж похасновал форму баркароли.
Жак Офенбах, єдна зоз найпознатших баркаролох Belle nuit, ô nuit d'amour зоз опери Гофманово приповедки.

Попри спомнутих композиторох баркароли писали ище Михаил Ґлинка, Серґей Рахманїнов. Анатолий Лядов, Николай А. Римски-Корсаков, С. Рахманїнов и други.

Баркарола у Fis- duru, Фредерика шопена (визначни польски композитор)

Познату и найнєзвичайнєйшу баркаролу вокалного типу написал Николай А. Римски-Корсаков Писня венециянского госца (рсй. Песня веденєцкого гостя) зоз опери Садко. У чаше старей Русиї Венеция ше волала Веденєц а млетацки тарґовец „Веденцов госц“. Композитор Н. А. Римски-Корсаков викомпоновал арию у ритму и по характеру венециянскей писнї баркароли.

Михаил Ґлинка, Баркарола у G-duru (1847)

Баркарола була популарна форма у опери, у хторей ше могол безвинїмково сентиментални стил народней писнї прикладно похасновац. Попри дїлох Офенбаха: Пайциєло, Вебер и Росини писали ариї хтори були форми баркароли; Доницети поставел венециянску сцену на отвераню Марио Фалиеро (1835) зоз баркаролу за ґондолира и хор; а Верди тиж похасновал баркаролу у своїм дїлу. Позната традицийна баркарола Санта Лучия обявена 1849. року. Султан Абдулазиз (32 султан по шоре) Османского царства (1830-1876), тиж компоновал баркаролу La Gondole Barcarolle.^[3]

Замерковни ище баркароли: у другим ставу клавирскей Сонати Лудвиґа ван Бетовена у G-duru, Опус 79. Баркароли Чарлс-Валентина Алкана зоз його нашпивох, оп. 38а, 38б, 65, 67 и 70; Баркарола Камия Сен Санса за виолину, виолончело, гармониюм (лєбо оргулї) и клавир; Бели Бартока баркарола ,,Out of Doors”; Баркарола, оп. 27, ч.1, Мориса Московского, и даскельо приклади Антона Рубинштайна, Милия Балакирєва, Александра Глазунова, Едварда Мекдауела, Мел Бониса итд.

Баркароли композиторох у 20. вику

У 20. вику ище вше тота музична форма иснує и прицагує композиторох. Компоную ю зоз характеристаками сучаснєйшей гармониї у структури дїла. Баркароли пишу за соло инструменти а найчастейше за клавир, Джодж Ґершвин Танєц габох (1937. дїло нє публиковане) зявює ше и у балетскей музики напр. Дян-Карло Монети балет Себастиян, Леонид Бернштайн Баркарола кральох зоз оперети Кандиде (1956), Р. Родриґес, Hello Young Lovers у мюзиклу Краль и я (1951) неокласична Баркарола Гуана Мариї Солареа за клавир (знїмак уключени до албуму Sombras blancas) итд.

25 минутови хорски циклус Валден Понд (1996) Доминико Арґента, вон ма поднаслов Ноктурна и баркароли за мишании хор; дїло зоз пейц рухох, и у велькей мири похасновани 6/8 такт. Предостатнї став ,,Pierrot lunaire,” Арнолда Шенберґа^[4] , Хеимфахрт, тиж означени як баркарола.

У давним периодзе у лирики трубадурох Пиринейского полуострова 13. и 14. вику, баркарола (порт. barcarola) лєбо мариня (порт. marinha) була єдна зоз ридких под'жанрох кантиґи о приятельстве, вязани за женски любовни писнї.^[5]

Дискоґрафия

Walden Pond (1997) The Dale Warland Singers, Gotic Records, 2003

Вонкашня вяза

Баркарола Энциклопедический словарь Брокгауза и Ефрона: в 86 т. (82 т. и 4 доп.). — СПб., 1890—1907.
Brown, Maurice (1980). "Barcarolle". In Sadie, Stanley (ed.). The New Grove Dictionary of Music and Musicians. London: Macmillan.
П. И. Чайковски, Баркарола-Юний, зоз циклуса: Рочни часци. You Tube Kanal
Баркарола, www.belcanto.ru

Референци

↑ Баркарола Михеева Л. В. Словарь музыкальных терминов —М.: Советский композитор, 1984.
↑ Гондольера // Энциклопедический словарь Брокгауза и Ефрона: в 86 т. (82 т. и 4 доп.). — СПб., 1890—1907.
↑ "A prismatical figure in history sultan Abdulaziz" Композитор баркароли (аудио знїмок)
↑ "Pierott lunaire" Sound Trove. 20 October 2022. Retrieved 2023-04-28.
↑ "Cantiga de amigo" (порт.). Dicionários Porto Editora. Porto Editora. (порт.) Дата обращения: 4 марта 2018. Архивировано: 4 марта 2018.

[1] Баркарола Михеева Л. В. Словарь музыкальных терминов —М.: Советский композитор, 1984.

[2] Гондольера // Энциклопедический словарь Брокгауза и Ефрона: в 86 т. (82 т. и 4 доп.). — СПб., 1890—1907.

[3] "A prismatical figure in history sultan Abdulaziz" Композитор баркароли (аудио знїмок)

[4] "Pierott lunaire" Sound Trove. 20 October 2022. Retrieved 2023-04-28.

[5] "Cantiga de amigo" (порт.). Dicionários Porto Editora. Porto Editora. (порт.) Дата обращения: 4 марта 2018. Архивировано: 4 марта 2018.

[1]

[2]

[3]

[4]

[5]