Композитор

Композитор (Лат. compositor)^[1] ^[2] то особа-уметнїк хтори пише музику. Вираз подрозумює особу хтора пише-компонує музику и виражує ю зоз даєдну файту музичней нотациї, хтора оможлївює другим музичаром же би тоту музику виводзели-репродуковали (интерпретовали). Тот факт роздвоює композитора од музичара хтори импровизує. Медзитим дахто може буц композитор без твореня музики у писаней форми, прето же нє маю шицки музични напрями писану нотацию, (напр. електронска музика, композитор свойо музични идеї зоз сучасну технїку такой реализує зоз аудиозаписом). У тим контексту композитор тот цо твори музику вон и найчастейше єй перши виводзач. Познєйше музичаре-виводзаче, (шпиваче лєбо инструменталисти) повторюю / инерпретую музичну композицию хтору чули.

Главни характеристики

Композиция вокално-инструментална, наступ дзияка (тенор) Френка Бирнбаума "Ten Shabbat v'Ten Shalom" у синаґоґи Родеф Шалом, Филаделфиї, Пелислвания 1973 року.

* Творенє музики: Пише оригинални музични композициї.

Нотация: Найчастейше хаснує нотни запис, алє нє вше.
Рижнородносц: Може компоновац за розлични медиї, од филмох до класичних дїлох.
Визводзнє: Часто композитор и перши визводзач своїх дїлох, а други познєйше повторюю.

У класичней музики термин композитор значни, и подрозумює ше же то академски музичаре, (особи зоз законченима потребнима школами, академиями и музичним образованьом з тей обласци) док у рок, поп музики и других жанрох прикладнєйше повесц автор писнї часто то можу буц и аматере, без фахового знаня алє маю надареносц-талант за компонованє.

Историят композито

Задатки композитора

Главни задаток композитора же би написал ориґиналну композицию спрам своєй инспирациї лєбо пре даяки уметнїцки проєкт (драма, филм, мюзикл, компютерски бависка, споти, потреби радия и телевизиї и подобне). Тоту компоновану музику познєйше буду виводзиц музичаре, шпиваче, менши ансамбли лєбо вельки оркестри. Прето муши буц розумлїво написана-компонована же би музичаре композицию могли правилно репродуковац и дочарац за проєкт за хтори є наманєна. Музика хтору композитор компонує може буц инструментална, вокална, вокално-инструментална а стили у хторих компонує можу буц рижни: ткв. класични, джез, рок, фолк, церковна музика. Кажди з тих стилох маю и свойо ище подкатеґориї и напрями.

Квалитети композитора

Композитор першенствено муши мац адекватне образованє-знанє зоз обласци теориї музики, правила композициї и компонованя, оркестрациї, гармониї як и познац музични форми (мали и вельки). Добри композитор муши мац вше швижи и креативни идеї, буц всестрани и любопитлїви, нє бац ше експериментовац, буц комуникативни, и подрозумює ше, мац страсц компонованя и творчи дух. Векшина композиторох позна а и грає на голєм двох лєбо и вецей инструментох.

А насмпредз муши мац добри слух, поготов такв. нукашнї слух. Способносц чуц з нукашнїм слухом свою нову мелодию, акорди-тонски склад, ритем и кед мелодия викомпонована чуц ю гармонски як звучи.^[3]

Руски композитор

Перши наш руски академски композитор бул Иван Ковач. Оддїл композициї закончел у Беоґрадзе на Факултету музичней уметносци. Спада до плеяди сучасних войводянских композиторох. Иван Ковач преважно компоновал композициї камерного жанра, за камерни смикови оркестер, композицию Прелудиюм и фуґа зоз клавиром и хором, кантати, векше число сонтох за клавир, виолину, виолончело, кларинет, обоу итд. Попри компонованих хорских писньох и дзецинских писньох, тиж значни його зборнїк писньох за дзеци Чудесни дзвон зоз провадзеньом клавира.

Статус композиторох през историю

У цеку штреднього вика, векшина и велї композиторе робели за католїцку церкву и компоновали вирску музику за Служби Божи (Богослуженє). У цеку ренесансней музичней епохи, композиторе робели за аристокрацийних роботодавательох. Углавним аристократи звичайно вимагали од композиторох же би написали значане количество релиґийней музики, як цо то музична форма миса. Композиторе тиж писали/компоновали нєрелиґиозни писнї на тему дворянскей любови: почитованя и страхопочитованя спрам ,,велькей” жени з далєка а часто була облапена у їх писньох и иншака тематика зоз звичайного живота. Дворянски любовни писнї були барз популарни у цеку ренесанси. У барокней музичней ери, велї композиторе робели на дворох аристокрациї або як церковни службенїки а найчастейше були и дзиякове.

Под час класичного периода, композиторе почали орґанизовац вельо вецей явни наступи и концерти пре витворйованє профита, а тото помогло композитором же би були менєй зависни од аристократских або церковених обовязкох и роботох. Таки тренд ше наставел и у романтичней музичней епохи у 19. вику. У 20. вику, композиторе почали глєдац стаємну роботу як професоре на универзитетох и конзерваториюмох. У 20. вику, композиторе доходзели до пенєжу и од предаваня своїх дїлох: нотних публикацийох, своїх писньох або композицийох зоз звучнима знїмками.

Сучасна едукация композиторох

Професийни композиторе класичней музики често уж маю искуство у виводзню класичней музики ище у дзециньстве и тинейджрских рокох; як шпиваче у хору, як учашнїки у младежских оркестрох або як визводзаче на соло инструменту (напр. клавиру, орґульох або виолини, на дуйних инструментох флаути, кларинет итд). Млади музичаре хтори жадаю постац композиторе можу наставиц свойо постсекундарни студиї у рижних формалних образовних установох; висши школи (коледжи), музични факултети-академиї, конзерваториюми и универзитети.^[4]

Универзитети понукаю богати и рижни програми оддїла композициї, уключуюци по законченю и дипломи основних студийох, мастер студийох музики и докторских студийох музичних уметносцох. Тиж, исную вельочислени други програми едукациї як цо то лєтни кампи и фестивали класичней музики, хтори студентом оможлївюю нагоду достац знанє од фахових композиотрох.

Нєшкайши час и сучасна технолоґия оможлївює и такв.,,оналайн'' едукацию и нащивйованє рижних обукох зоз обласци компонованя хтори понукаю вельочислени музични установи у швеце.

Вонкашнї вязи

Иван Ковач, композитор Интернет портал Габи Дунаю, 11.НОВЕМБЕР 2023. рок
Philips, Abbey (1 September 2011)The history of women and gendermroles in music rvanews.com. Retrieved 20 January 2016.
Borowiecki, Karol; O'Hagan, John (2012) Historical Patterns Based on Automatically Extracted Data: the Case of Classical Composers, ideas.repec.org
10 найзначнейши композиторе 20. вику
Бетовен - глухи композитор – його дїла пременєли швет nova.rs

Референци

↑ Koмпозитор
↑ Пешикан, Митар. Наш језик. Институт за српски језик САНУ.
↑ Познати и значни композиторе
↑ Ziolkowski, Jan M. (2018). "1. The Composer". The Juggler of Notre Dame and the Medievalizing of Modernity. Vol. 4: Picture That: Making a Show of the Jongleur. Cambridge: Open Book Publishers. ISBN 978-1-01-329142-5. JSTOR j.ctv8d5t5s.

[1] Koмпозитор

[2] Пешикан, Митар. Наш језик. Институт за српски језик САНУ.

[3] Познати и значни композиторе

[4] Ziolkowski, Jan M. (2018). "1. The Composer". The Juggler of Notre Dame and the Medievalizing of Modernity. Vol. 4: Picture That: Making a Show of the Jongleur. Cambridge: Open Book Publishers. ISBN 978-1-01-329142-5. JSTOR j.ctv8d5t5s.

[1]

[2]

[3]

[4]