Подзелєнє музичних инструментох

Музични инструменти, музей Лувр, малюнок Ани Валер-Костер,

Музични инструменти то средства з помоцу хторих музичаре творя музику зоз живим виводзеньом, зоз граньом. Постоя рижни подзелєня музичних инструметох, алє анї єдно подзелєнє до конца нє прецизне и точне. Напр. до ґрупи древених дуйних инструметох спада флаута и саксофон, хтори ше правя зоз металу. До инструментох зоз типками спадаю гармоника, орґулї, клавир, а знаме же способ доставаня тона тих трох инструментох розлични.

Пре шицко тото, вельо точнєйше и прецизнєйше сучасне научне подзелєнє музичних инструментох по ґрупох, у зависносци од:

• материялу зоз хторого су направени и

• способу доставаня тонох и звука.

Спрам того, музични инструменти дзелїме на шлїдуюци ґрупи:

Мембранофони лєбо опнозвучни (лат. мембрана = скора; ит. strumenti membrana, анґл. membranophones; франц. membranophones, нєм. membranophone Instrumente) то удерни инструменти зоз зацагнуту мембрану на хторей настава звук зоз вибрираньом мембрани зоз животиньскей скори, пластики лєбо поливинилу. По мембрани ше биє зоз руку лєбо древенима палїчакми, млаточками зоз древа лєбо здзати лабдочки на палїчкох и обложени зоз филцом. Звук им, окрем тимпана, нєодредзеней висини. Окрем тимпана, то инструменти хтори ше хасную у фолклору цалого швета.

Ту спадаю: буґна зоз зацагнуту скору, вельки бубень бонґоси, конґи, тарабука, ґоч, тимпан итд.

Идиофони (греч. идиос-власни, fonė-звук; ит. strumenti idiofoni, анґл. idiophonic; франц. instruments idiophones, нєм. idiophone Instrumente) то музични инструменти зоз ґрупи удерних инструментох на хторих ше звук достава зоз:

Удерни инструменти симфонийского оркестру

* вдереньом єден до другого (чинели, кастанєти...)

• дуркнуцом до инструмента (трианґл, дзвони, ксилофон)

• потаргованьом (дромбулї итд.)
• Можлїве подзелєнє идиофоних инструментох на:

а) метални (трианґл, дзвони, дромбулї)

б) древени (ксилофон, кастанєти).

• Шлїдуюце подзелєнє то на:

а) Инструменти зоз одредзену висину тона (ксилофон, тубафон, дзвончки, челеста, дзвони, цинґалов-ченґель (серб. клепетуша), вибрафон).

б) Инструменти зоз нєодредзену висину тона (трианґл, пиати, там-там, кастанєти, батог-чмиґов, керепкадло).

Кордофони, хордофони лєбо струново инструменти (ит. strumenti corda, анґл. сhordophonic, франц. cordophones, нєм. chordophone Instrumente) то музични инструменти на хторих ше звук достава зоз трепереценьом струнох (лат. chorda = струна). Тоти музични инструменти вельочислени а тон ше твори на три способи зоз:

• потаргованьом, поцагованьом струнох – зоз пальцами лєбо зоз пирком а струни вибрирую (рижни тамбури, балалайка, лаута, мандолина, ґитара, гарфа) лєбо прйґ клавиятурного механїзма (вирджинел, клавсен, чембало итд.).
• вдереньом– млаточкох хтори прецагнути зоз филцом дуркню по струнох (клавир) лєбо древени палїчки-лопаточки (цимбали)
• смиком – прецагованє смика прейґ зацагнутих струнох, таки инструменти наволуєме смиково (виела, ребаб, гушля, виола, виола д’аморе, виолончело, виола да ґамба, контрабас, лиєрица, ґусли...)

Аерофони (од греч. αερο воздух и φονος звук; ит. strumenti aerofoni, анґл. aerophonic instruments, франц. instruments aérophones, нєм. aerophone Instrumente) – то инструменти на хторих тон настава зоз вибрированьом воздушного слупа. Тон ше твори зоз:

Музей Артесаниа, Стари инструменти

* писком (тевчирасти писк)–то плехово дуйни инструменти (труба, бах труба, бас труба, хорна, тромбон, туба, бас туба, контрабас-туба).

• преламованьом воздушного слупа у циви инструмента (пищалка, флаута, блок-флаута, окарина, панова пищалка).

• вибрацию язичка писка зоз наду (кларинет, басетхорн, бас-кларинет, саксофон, тараґот).

• вибрацию двойнїстого (дуплого) язичка зоз наду (зурла, сопилка, обоа, обоа д’а море, анґлийски рог, геклфон, фаґот, контра-фаґот).

• вибрацию язичка и меха (орґулї, гармоника, бандонеон).

Електрофони, етерофони лєбо електронски инструменти (греч. електрон-янтар, зоз чуханьом ше твори статични електрицитет; итал. strumenti elettrofoni, анґл. electro[pho]nic; франц. instruments électroniques, нєм. elektro[pho]nische Instrumente) – то нови инструменти на хторих ше тон достава зоз електроакустичним способом (електрокорд, електрична ґитара, вибрафон и други инструменти).

Зоз комбинованьом рижних звукових ниянсох, можлїве твориц нови, по нєшка нєпознати фарби и звуки (траутониюм, мартеноово габи и друге).