Гарфа

Гарфа

Ґлисандо импресия на Гарфи

Гарфа, педална гарфа лєбо велька гарфа найвекши найзложенши сучасни инструмент зоз струнами на хторим ше звук достава зоз потаргованьом струнох зоз пальцами.

Випатрунок и часци гарфи

Струни розцагнути вертикално хтори у вельким раму трокутнїковей -троугловей форми. Рам составени зоз вертикалного слупа (найчастейше зоз яворового древа) хтори стої на подлоги (подиюм - постолє). Виводзач гарфу трима медзи колєнами. Резонатор узко воздлуж поставени а на горнєй часци характеристично скруцена часц шиї инструмента. На горнєй часци шиї прикруцни метални закрутки - клїнки, на хтори моцно заквачени струни. Подиюм (подлога) ма седем педали (лапки), хтори прейґ полуги у слупе дїйствую на механизем з рухомима кольчатками на шиї и прештимовюю струни так же скрацую лєбо предлужую их длужину. За розлику од клавира гарфу штимує сам виводзач скорей граня на закруткох зоз окремним ключом. Зоз своїма 46 до 48 струнами гарфа залапює (после клавира и орґульох) найширши тонски обсяг до шейсц и пол октави.

Звучни обсяг гарфи

Грає ше так же ше струни мегко потаргує зоз верхами (брущки) пальцох обидвох рукох, док ше резонатор опера на праве плєцо виводзача. Пре лєгчейше знаходзенє зоз вельким числом струнох, кажда Це (До) - струна означена зоз червену фарбу а кажда Еф (Фа) - струна означена зоз белаву лєбо чарну фарбу. Обидва ноги активно унапрямени на педали - лапки. Гарфа ма седем педали за ноги, з хторима мож кажди тон у октави меняц хроматски за пол тона на нїжей (горня позиция педали) лєбо пол тона на висше (долня позиция педали). Штредня позиция педали враца хроматски знїжени лєбо повисшени тон назад на диятонски тон.

Пременка статуса положеня педали, поготов кед у питаню даскельо педали, вимага часу гоч и на кратко, та ше при компонованю меркує же би ше то нє случовало часто, и нє вельо раз и нє швидко. Таки пременки ше у нотних партитурох означую на предок же би було часу премнїц положенє педалох.

Звучносц (звуковносц) гарфи

Звук гарфи богати, нїжни, сказкови - райски алє нє ма вельку моц и предзераюци - дзвонки звук. Пре таки прикмети звука, гарфа найбаржей приходзи до вираженя у солистичним граню лєбо у соло епизодох (часцох) у оркестри. Наступ у оркестри доприноши живописносц звучаня. Єдино зоз ґлисандом - зоз швидким прецагованьом пальцох по вельо струнох єй звук може пребиц густосц (збитосц) звука и теди ше баржей чує у оркестри.

Дзекуюци тому же ма досц тирваци (длугши) одгук - ехо длугих струнох, гарфа прикладна за гранє акордох (арпедьо, арпедята - то способ граня розложених акордох) хтори и добили мено по тим инструменту. Сходно тому, гарфу мож часто видзиц як провадзаци инструмент даєдному мелодийному инструменту лєбо соло гласу (вокалу).

Розвой гарфи

Гарфа зоз епохи барока и рококоа

Нєшкайша гарфа ма длуги историйни розвой. Єй найстарши предходнїки то зацагнути стрели (лук). Вони медзи найстаршима инструментами вообще. Антична култура у рижних часцох швета, позна вельо типи гарфох, а у штреднїм вику вони розпространєни и дзечнє хасновани поготов за провадзенє вокалного шпиваня. У 18. вику епоха рококо и єй стил, уплївовал на вонкашнї випатрунок гарфи, хтори и нєшка украшени (верх рама часто резбарени и заокруглєни) по угляду на тедишнїх старих майстрох, а теди и попри технїчних огранїченьох инструмента, наставаю солистични и концертни композициї за тот инструмент. Заш лєм у 19. вику зоз усовершованьом педалного механизма, гарфа пришла до вираженя и як така остала по нєшка без даяких вименкох. Понеже окрем тих, можлїви и медзи положаї, вони ше нє применюю у оркестровей пракси прето же су интонативно нє стабилни (нєпостояни су). Зоз написаного, приходзи ше до заключеня же на гарфи нє можлїве одграц тон хтори дварз знїжени (b) лєбо двараз повишени тон (h) та ше таки тони у партитури муша записац як його енхармонски тон (напр. уместо фисис1 упише ше ґе1 у першей октави). Медзитим найглїбша струна на гарфи (цес1 у велькей октави) нє ма механизем за пременку висини тона та ше муши зацаговац зоз окремним ключом за штимованє.

Можлїви положеня педалох

Моцарт, Кончертино за флауту и гарфу Allegro 1.став

Моцарт, Кончертино за флауту и гарфу Andantino 2.став

У оркестру найчастейше заступена лєм єдна гарфа, ритко два, лєм теди кед у питаню помоцнєни и звекшани оркестер, трираз лєбо штирираз а то найчастейше симфонийски оркестер.

Моцарт, Кончертино за флауту и гарфу, Rondo Allegro 3 став

Типи (файти) гарфох

Гарфи єст вецей типи алє ше найчастейше применює педална гарфа и келтска гарфа.

Педална гарфа позната и як велька гарфа и нєшка векшина гарфох уключуюци и педални механизем дизайнирани на исти способ, гоч дєдни елементи розлични (фарба, обсяг струнох, материяли зоз хторих ше прави). Заш лєм примарна особина по хторей су исти то педални механизем дзе ше розликую лєм по ключох хтори ше хасную при пременки положеня лапкох - педалох. Постоя два файти механизмох лапкох - зоз єднонапрямним и двонапрямним дїйством. Перши оможлївює же би ше на струни грало лєм на двох позицийох. Други ма векшу флексибилносц и оможлївює же би ше на струни грало на трох позицийох. Гарфа зоз велькима педалами найчастейше хаснована на концертох и вона ма 47 струни и тонски обсяг 6 октави. Значно є чежша и векша и од гарфох зоз полугами хтори маю 34 по 38 струни.

Педали на гарфи

Келтска гарфа меньша од педалней, висина єй 80 до 140 цм. У зависносци од модела ма помедзи 22 и 38 струни а чежина єй 5.5 по 15 кґ. За мено келтскей гарфи постоя ище и назви гарфа зоз полугу, народна гарфа, лєбо ґотска гарфа. Углавним су исти зоз можебуц малима розликами. Напр. ґотски гарфи маю ценьшу звукову резонанцу и вельо су узши од келтскей и зоз нїзшу заокруглєну главу. Мено за народну гарфу похасноване як опис гоч хторей гарфи без педалох, а поготов кед є вязана за походзенє даєднєй култури.

Литература

• Rački, Nives (2021).Početnica za harfu. Zagreb: Diplomski rad.

• Rensch, Roslyn (2007) [original edition 1989].Harps and harpists. Indiana University Press. ISBN 978-0-253-34903-3.

Вонкашнї вязи

• „History of the Harp | International Harp Museum”