Тамбура

Тамбура то струнови инструмент хтори настал и розвил ше од инструментох познатих ище у старей култури Месопотамиї и Єгипта.^[1] На Балкан ю пренєсли Турки у 14. и 15. вику.

Тамбури направени зоз древа, найчастейше зоз яворового. А горня часц тамбури направена зоз одредзеней файти ядлїнарох хтори адекватни за резонантни и акустични прикмети. Тамбури маю три часци. Корпус (цело) найчастейше направени у форми грушки. Нукашньосц празна пре резонантносц. Шия - часц хтора найдлугша. Глава на хторей стоя закрутки (клїнки) зоз хторима ше зацагую и штимую струни. Тамбури найлєпшого квалитета направени ручно, по правилох старих майстрох, хтори чуваю тайни правеня и преноша их з колєна на колєно. Познати Кудликово, Боцаново, Торминово, Гезово тамбури.

Постоя вецей файти тамбурох: прим, бас прим, Е-бас прим, контра, чело, беґеш лєбо тамбурашски бас хтори подобни контрабасу. Тамбури найподобнєйши ґитаром а по истим поступку ше достава и звук (тон) зоз потаргованьом струнох зоз пальцами лєбо пирком (плектрон). Технїка граня и способ, подрозумює ше, у подполносци розлични.

Файти штимох тамбури

Штимованє тамбури ше розликує. Постоя два основни штими. Фаркашов хтори ше хаснує у заходней часци Горватскей и Сримски штим хтори заступени у Войводини и преовладує вшадзи на територийох дзе ше грає на тамбури^[2].

Основна розлика тих двох штимох то висина штимованя першей струни на инструментох, та ше по Фаркашовим штиму перша струна штимує на басприму (брач тамбура) на Ґе та прето ше и штим наволує Ґе - штим, док по сримским штиму ше перша струна на басприму (брачу) штимує спрам тона А (найчастейше 440-444 Hz герци) та прето тот штим ма назву А - штим^[3].

По инструментох cримски (А - штим) випатра так:

Прим е, х, фис, цис

А - басприм а, е, х, фис

Е - басприм е, х, фис, цис

Контра а, е, цис, А

Чело е, х, фис, цис

Бас е, х, фис, цис

Тамбурово ансамбли

Тамбурово состави - ансамбли творя тамбураше хтори вєдно граю на тамбурох розличних типох и велькосцох.Заєднїцке гранє може буц у дуету, трию, квартету, квинтету, секстету алє и у векшим ансамблу. Тамбуров ансамбл до 15 членох наволує ше тамбуров хор и вон найчастейше провадзи лєм шпивачох. Векши состав зоз вельо вецей тамбурами твори тамбуров оркестер хтори ма концертну улогу и маю зложенши композициї на своїм репертоару. То часто ориґинални авторски композициї, обробки познатих шветових композицийох и признатих композиторох итд.

Зоз меньшима составами руководзи примаш (член состава хтори грає на прим-тамбурки) док зоз вельким тамбуровим оркестром руководзи дириґент. Зоз оглядом на способ штимованя составу тамбурох постоя даскельо системи тамбурового хору од хторих найпознатши квартни и квинтни. Дакеди ше грало на єдногласаних и двогласних тамбурох а познєйше на тро и штирогласних. Спрам того и тамбурово состави-ансамбли можу буц подзелєни на двогласни, трогласни и штирогласни. Шицки вони наштимовани по темперованим систему (то значи штимованє по рядошлїду полутонох).