Любомир Микита
| Любомир Микита | |
|---|---|
 | |
| Народзени | 15. априла 1925. |
| Умар | 7. октобра 2008. (83) |
| Державянство | югославянске, сербске |
| Язик творох | руски, сербски |
| Школа | основна школа |
| Период твореня | 1941—2001 |
| Жанри | оркестерска музика,
тамбуров оркестер |
| Поховани | на теметове у Руским Керестуре |
| Припознаня | два воєни одликованя
Награда Зарї култури КПЗ општини Кула |
Любомир Микита (*15. април 1925—†7. октобер, 2008), познати народни музичар,тамбураш, член дакедишнього оркестра Кирданци и вецей оркестрох Дома култури у Руским Керестуре.
Биоґрафия
[ушориц | ушор жридло]Любомир Микита ше народзел 15. априла 1925. року у Руским Керестуре. Оцец Яким и мац Ирина родз. Бесерминї. Мал вон ище брата Якима и шестру Меланку котра мала умарла. Основну школу Любомир закончел у родним валалє. Музику полюбел од дзецинства а уж 1941. року, як 16-рочни леґинь, вон почал учиц грац на тамбури у валалским тамбуровим оркестру зоз хторим руководзел його оцец Яким. По войни грал у валалских тамбурових оркестрох на танцох младежи. Полюбел грац на тамбури-контри и предлужел цалого живота на нєй грац.У музичним живоце Руского Керестура Любомир Микита Чедо активно грал полни 60 роки.
Любомир Микита ше винчал зоз Амалу родз. Кишрацик. У малженстве мали двох синох, Янка и Владу.
После формованя керестурского Дома култури 1962. року Любомир Микита постал и член його народного и тамубрашского оркестра, алє у цеку своєй музичней кариєри Микита грал и у оркестру тедишнього КУД Максим Горки у Новим Садзе и у вербаским Доме култури. Зоз ансамблом Дома култури з Руского Керестура госцовал ширцом дакедишнєй Югославиї и у иножемстве, у ЧССР и СССР, а окреме му остало у паметаню госцованє на Медзинародним фестивалу фолклора у варошу Желєна Гора у НР Польскей на хторим участвовали 12 ансамбли зоз жемох Европи и Азиї дзе вон, у закончуюцим концерту и у финалней точки вечара, зоз своїм шпиваньом и граньом предводзел шицки ансамбли. Велїм остал у паметаню як длугорочни член познатого керестурского оркестра Кирданци. Як член вецей оркестрох Любомир Микита участвовал на знїманю вецей дзешаткох тонских знїмкох рускей музики за музични архив Радио Нового Саду.
Любомир Микита у своєй музичней кариєри грал и здобувал музичне искуство и образованє под руководством дириґентох и музичних фаховцох яки були Ириней Тимко, Иван Чукляш, Яков Чизмар, Витомир Бодянєц и Михайло Бодянец та Юлиян Рамач.
Як учашнїк НОВ, Любомир Микита достал и два воєни одликованя, а за свою вельорочну активносц у култури 1991. року є наградзени зоз Награду Зарї култури Културно-просвитней заєднїци општини Кула.
Любомир Микита Чедо умар 7. октобра 2008. року у Руским Керестуре. Поховани є 8. октобра на керестурским теметове.
Ґалерия
[ушориц | ушор жридло]-
Ансамбл Дома култури Руски Керестур, Любомир Микита кучи други з лїва
Литература
[ушориц | ушор жридло]- Любомир Микита Чедо (1925-2008), Руске слово, ч. 42 (3287), 17. октобер 2008. бок 4.