Янко Гайдук
| Янко Гайдук Омер | |
|---|---|
 | |
| Народзени | 16. мая 1937. |
| Умар | 12. марца, 2018. (81) |
| Державянство | югославянске, сербске |
| Язик творох | руски |
| Школа | основна школа |
| Фахова школа | Шеґертска школа и пракса |
| Период твореня | 1958—2002 |
| Жанри | шлосерске ремесло, музика, гранє у тамбурових оркестрох |
| Поховани | у Руским Керестуре |
Янко Гайдук Омер (*16. май 1937—†12. марец, 2018), музичар-тамбураш, предняк тамбурашского составу Кирданци и член вецей оркестрох Дому култури Руски Керестур
Биоґрафия
[ушориц | ушор жридло]Янко Гайдук (Кирдов) ше народзел 16. мая 1937. року у Руским Керестуре. Оцец Янко и мац Ана родз. Тот (Боґмекова). Янко мал старшого брата Славу. Основну школу Янко Гайдук закончел у Руским Керестуре. Потим закончел Шеґертску школу и праксу за машинского шлосера цо му була порядна робота.
Зоз музику ше Янко Гайдук почал занїмац ище як леґиньчок, грал на басприм тамбури. По одслуженю войска, концом пейдзешатих рокох прешлого вику, вєдно зоз своїм братом Славом, контрашом, и ище даскелїма музичарами зоз сушедства на керестурским Ґаравцу, основал тамбурашски состав Кирданци, котри, з меншима вименками, бул активни коло 30 роки и популарни надалєко споза гранїцох керестурского хотара.
И попри тим же мал поволанку и нагоду, вєдно зоз своїм колеґом по тамбури Мироньом Гардийом Йолетом, постац професионалєц у Тамбурашским оркестру Радия-Нови Сад, у котрим теди були познати мена як цо леґендарни Яника Балаж, Цвета Сладич Чича, Чарни Стева, Пишта Корманьош и други, Янко, лєбо Омер по назвиску, як го векшина знала, ше, заш лєм, опредзелєл за живот у Руским Керестуре и єдну файту полупрофесийного статусу у своїх Кирданцох и оркестру Дому култури, зоз котрима седемдзешатих рокох прешлого вику єден час грал и у тедишнїм КУД Максим Горки у Новим Садзе и вербаским Дому култури. Зоз шицкима тима колективами госцовал ширцом дакедишнєй Югославиї, а вельо раз и поза єй гранїци.
Янко Гайдук грал на знїманю першей рускей ґрамофонскей плочи (1971), участвовал на велїх Червених ружох, на Ружовей заградки, грал на вецей як 1000 свадзбох, балох, рижних вешельох по шицких руских и других местох. За нїм остали вельочислени тонски и авдиозаписи у Радию и Телевизиї Войводини, як и єдна авдио касета зоз рускима народнима и авторскима шпиванками Грайце гудаци.
Янко Гайдук бул активни як музичар у културним живоце Руснацох понад 40 роки.
Янко Гайдук Омер ше упокоєл 12. марца 2018. у Руским Керестуре. Поховани є 13. марца на керестурским теметове.
Ґалерия
[ушориц | ушор жридло]-
Оркестер Дома култури Руски Керестур - з лїва: Янко Гайдук Омер, Михайло Бодянец, Юлиян Рамач Чамо и Миронь Гарди Йоле -
Ансамбл Дома култури Руски Керестур, Янко Гайдук кучи штварти з лїва
Вонкашнї вязи
[ушориц | ушор жридло]- Умар и остатнї Кирданєц – Янко Гайдук Омер, Рутенпрес, 14. марец 2018.