Михайло Онещук

Михайло Онещук
Онещук (1984. року)
Народзени	22. новембра 1930.
Умар	4. септембра 2016 (85)
Державянство	югославянске, сербске
Язик творох	сербски, українски, руски
Школа	Штредня поживово-индустрийна фахова школа, Мостар Штредня музична школа Исидор Баїч, Нови Сад
Период твореня	1952—1990.
Жанри	опера, естрада
Поховани	у Новим Садзе
Припознаня	Естрадна награда Югославиї, Заґреб 1978. награда Златне клаше, Осєк

Михайло Онещук (*22. новембер 1930—†4. септембер 2016), оперски солиста и популарни естрадни уметнїк.

Биоґрафия

Михайло Онещук народзени 22. новембра 1930. року у Любушким при Мостаре (Босна и Герцеґовина). Оцец Яков бул Українєц а мац була Герцеґовка. Михайло закончел основну школу у Мостаре 1944. року а штредню фахову школу поживово-индустрийного напряму закончел 1951. року. Од 1947. та по 1950. рок Михайло Онещук робел як роботнїк а потим як службениїк у Мостаре.

Шпивацка кариєра

Уж под час школованя замерковани його шпивацки талант. Постал член локалного КУД у Мостаре дзе наступал як шпивач. Михайло пришол 1951. року до Нового Саду дослужиц войско та як вояк положел авдицию и як волонтер шпивал у хору Опери СНТ а у септембре 1952. року постал стаємни член того ансамбла. Источасно Михайло учел соло шпиванє у Штреднєй музичней школи Исидор Баїч при Божани Дубскей и Надежди Микловчич.

Як винїмково музикални шпивач, тенор благородного гласового тембра, Михайло Онещук наступал у числених епизодних солистичних улогох медзи хторима улоги Ґастона и Йосипа у Травияти, Овлура у Князови Игорови, Руиза и Гласнїка у Трубадуре, Официра у Банк Бану, Гортензия у Побочкай ме, Кети, Гералда у Дон Карлосу, официра у Мадам Батерфлай и других. Як член хору Михайло участвовал у велїх других значних репертоарних витвореньох Новосадскей опери: Лучиї од Ламермура, Риґолету, Предатей нєвести, Ґилґамешу и Набуку.

Од 1953. року Михайло Онещук постал и вокални солиста Радио Нового Саду, а познєйше и солиста Радио Телевизиї Нови Сад, шпиваюци и знїмаюци оперски ариї як и сербски, руски, русийски и українски шпиванки народней и забавней музики. У тонскей архиви Радио Нового Саду зачувани коло 750 знїмки Михайла Миши Онещука хторому тота естрадна дїялносц принєсла широку популарносц. Наступал на числених концертох и госцовал скоро у шицких местох Войводини и ширцом по дакедишнєй Югославиї, а зоз винїмковим успихом наступал и на числених госцованьох у иножемстве.

Од початку 60-их та по 80-ти роки Михайло Онещук дзечнє наступал як солиста або член хору новосадского руского КУД Максим Горки зоз хторим руководзел Ириней Тимко.

Михайло Онещук вецей роки континуовано сотрудзовал зоз композитором и педаґоґом Якимом Сивчом чийо композициї з вельким успихом интерпретовал и хтори зняти як архивни знїмки у Радио Новим Садзе. З тим вон охабел шлїди и у историї рускей музичней култури.

Михайло Онещук знял 5 лонґ-плей албуми и штири синґл ґрамофонски плочи, пар авдио касети, даскельо компакт диски. Добитнїк є Естрадней награди Югославиї у Заґребе 1978. року, награди Златне клаше на фестивалу у Осєку, два раз победзовал на Фестивалу култури Червена ружа у Руским Керестуре.

Попри частих концертох на естради Михайло Онещук остал, по пензионованє 1990. року, вирни оперскей сцени участвуюци у числених представох Опери СНТ. Одход до пензиї нє претаргнул його музични активносци.

На чесц Онещуковей богатей кариєри 2010. року обявена кнїжка Живот зоз писню у хторей описани носталґични здогадованя на уметнїка, його живот и шпивацку професию.

Михайло Онещук умар 4. септембра 2016. року у Новим Садзе у 85. року. Поховани є на Успенским теметове у Новим Садзе.

Радио Телевизия Войводини 2016. року орґанизовала Михайлови Онещукови одпитуюци солистични концерт у Студию М.

Шпиванки у интерпретациї Михайла Онещука на Ютюб
Gordana Kojadinovic i Mihajlo Onescuk - Dalmatinske pesme Ja ljubim milu Pogledaj me nevernice Kad sam bio mladjan lovac ja Sonja Svakog dana draga molim Boga za te Salaš u Malom ritu Jesenje ličće Kopao sam dubok zdenac Milovo sam garave i plave Lakše, lakše moj konjiću Sreo sam te prvi put Mesečina divno sja Siromah sam, druže Prva noć Zbog tebe sam tarabe preskako Usamljena harmonika Ridna mati moja Fijakerista U našeg Marina ♦Крадем ти се у вечери Spavaj mi, spavaj, Ančice Marice, divojko poštenog roda			Sreo sam te prvi put Karlovačka berba Dok palme njišu grane Jesen Pogledaj me, nevernice Za jedan časak radosti Maro, ne plači Na brijegu kuća mala Kopao sam dubok zdenac Kad se setim, zoro, tebe
			Шпиванки по руски
			♦ Bačko moja, Bačko ♦ Viprovadzanja ♦ Kolomijka ♦ Moj rodni kraj ♦ Moja kaljino ♦ Oj u haju pri Dunaju ♦ Provadzi mili milu ♦ Stari salaši ♦ Цихо, цихо, Дунай воду нєше

Литература

• Владислав Надьмитьо: „Червена ружа '85ˮ, 30 червени ружи, НВУ Руске слово, Нови Сад, 1991,  б. 70.

• Руски християнски календар 2017. рок, бок 206

Вонкашнї вязи

• Михајло Онешчук, Е-књижара Прометеј, www.prometej.rs

• Mihajlo Oneščuk, Discography.

• Медаљон - Михајло Онешћук, Радио Плетеница, 01. нов 2021, www.rts.rs/radio/radio-pletenica
• Енциклопедија Српског народног позоришта, Хор (1918-1986)
• Позоришни музеј Војводине, децембар 2018,
• Вчера поховани Михайло Онещук, Рутенпрес, РТ Войводина, 7. септембер 2016.