Александр Дмитриєвич Дуличенко
|
Др Александр Д. Дуличенко | |
|---|---|
 | |
| Народзени | 30. октобра 1941. року |
| Умар | 4. марца 2026 (84) |
| Державянство | Совєтски Союз, Естония, Русия |
| Язик творох | русийски, есперанто, естонски |
| Школа | Штредня школа у Новоалексеєвскей |
| Универзитет | Филолоґийни факултет у Ашхабаду |
| Обласц науки | обща теория язика, социолинґвистика, етнолинґвистика, интерлинґвистика, славянски микроязики |
| Наукови ступень | Доктор наукох |
| Припознаня | Орден Билей Гвизди, 4-го ряду[1] |
Др Александр Дмитриєвич Дуличенко (30. октобер 1941. — †4. марец 2026.), фаховец з обласци общого язикознавства (обща теория язика, социолинґвистика, етнолинґвистика, интерлинґвистика и др.) и славянскей филолоґиї, и експерт у обласци славянских микроязикох.
Биоґрафия
[ушориц | ушор жридло]Александр Дмитриєвич Дуличенко народзени 30. октобра. 1941. року у месце Новоалексеєвская у Русиї, Краснодарски край.[2] Року 1959. закончел штредню школу у Новоалексеєвскей. Од 1961. до 1966. студирал русийску филолоґию на филолоґийним факултету у Ашхабаду, главним варошу тедишнєй совєтскей републики Туркмениї (тераз нєзависна держава Туркмения).
Робел як преподавач русийского язика у месце Ґара Векил у Ашхабадскей обласци у Туркмениї (1966–1968, 1970–1976), як асистент на катедри за общу и русийску линґвистику на Самаркандским универзитету (варош Самарканд) у републики Узбекистану (тераз нєзависна держава Узбекистан) (1968–1970). Од 1976. року роби на Тартуским универзитету (варош Тарту) у Естониї: од 1976. до 1980. року доцент, од 1982. рядови професор катедри за русийски язик, од 1992. рядови професор и шеф катедри за славянску филолоґию.[3]
Александр Д. Дуличенко бул фаховец з обласци общого язикознавства (обща теория язика, социолинґвистика, етнолинґвистика, интерлинґвистика и др.) и славянскей филолоґиї.
Школяр є академика Н. И. Толстоя. Як студент ше почал дописовац зоз Малацком зоз Савиного Села, хтори му писал же є Руснак. Други Руснак з хторим ше А. Д. Дуличенко длуго дописовал, бул писатель Василь Мудри зоз Шиду. Вон ше заинтересовал за нашу народносц и наш язик а професор акад. Н. И. Толстой му суґеровал же би почал виучовац наш язик, цо вон и зробел и уж 1968. обявел першу статю о нїм, а року 1974. на Институту за славистику и балканистику Академиї наукох СССР у Москви одбранєл кандидатску (докторска нєгабилитацийна) дисертацию Литературни руски язик Югославиї (фонетика и морфолоґия).
Наукова робота
[ушориц | ушор жридло]Интересованє А. Д. Дуличенка ше преширело и на други мали славянски литературни язики, хтори вон наволал микроязики: кашубски у Польскей, ґрадищанскогорватски у Австриї, молизкославянски у штреднєй Италиї, резиянски у Италиї при Удине, болгарски у Банату, ляшски у Шлезиї, чакавски, кайкавски, словенски у Прейґмурю, сербсколужицки, карпатскорусински и др. Року 1981. на Институту за язикознавство Академиї наукох Билорускей ССР у Минску одбранєл габилитацийну докторску (докторска II) дисертацию Славянски литературни микроязики.
Окрем того А. Д. Дуличенко писал и о „вельких” славянских язикох: русийским, сербским/горватским/бошняцким, словенским. Потераз обявел понад 500 науково роботи на 20 европских язикох. З общого и славянского язикознавства тримал преподаваня и на универзитетох / факултетох у Новим Садзе, Сараєву, Краснодару (Русия), Душанбеу (Таджикистан), Хелсинкию и Туркуу (Финска), Лозани и Цириху (Швайцарска), Ґетинґену, Триру, Сарбрикену, Ґрейфсвалду, Келну, Гейделберґу (СР Нємецка), Ополу (Польска), Москви, Ростову и др. У школским 2002/2003. року тримал преподаваня о славянских микроязикох (медзи нїма и о руским язику) у Триру (СР Нємецка).
Членство у фахових и наукових орґанизацийох
[ушориц | ушор жридло]Бул предсидатель Националного комитета Славистох Естониї, бул член Рускей матки, Дружтва за руски язик, литературу и културу, Кашубского института у Ґданьску (Польска), член Accademia Internazionale delle Scienze (Сан Марино), New York Academy of Sciences, Universala Esperanto Asocio и др.
Бул редактор и видаватель двох серийних публикацийох Тартуского универзитета — Interlinguistica Tartuensis (од 1982) и Slavica Tartuensia (од 1985).
Авторски кнїжки
[ушориц | ушор жридло]НВУ Руске слово му обявела два зборнїки статьох о руским язику, Jugoslavo-Ruthenica (1995) и Jugoslavo-Ruthenica II (2009), як и Кнїжку о руским язику (2002), а сам пририхтал и обявел архивни рукопис Гавриїла Костельника Жалосцинки – серенчи и милей (1994).
Окрем спомнутих двох кнїжкох на руским язику А. Д. Дуличенко написал и тоти кнїжки:
- Славянские литературные микроязыки. Вопросы формирования и развития (Таллин, 1981. — 323 б.);
- Международные вспомогательные языки (Таллинн, 1990. — 448 б.);
- Русский язык конца XX столетия (Slavistische Beiträge. Bd. 317, München, 1994. — XII, 347 б.);
- Этносоциолингвистика ‘перестройки’ в СССР (Slavistische Beiträge. Bd. 378, München, 1994. — VII, 583 б.).
Визначни слависта и филолоґ др Александр Дмитриєвич Дуличенко ше упокоєл 4. марца 2026. року у Тартуу у Естониї у 84. року живота.
Литература
[ушориц | ушор жридло]- Дюра Папгаргаї, Кнїжка паметаня о руским мену и язику (др Александер Д. Дуличенко: Кнїжка о руским язику), Studia Ruthenica, чис. 8, 2001-2003, б. 75
- Др Юлиян Рамач: Универзитетски проф. др Александер Д. Дуличенко, Studia Ruthenica, чис. 8, 2001-2003, б. 79
- Др Юлиян Рамач и мр Гелена Медєши: Нова кнїжка др Александра Д. Дуличенка о руским язику, Studia Ruthenica, чис. 14, 2009, б. 49-51.
- Др Михайло Фейса: Jugoslavo-Ruthenica II: Роботи з рускей филолоґиї и историї др Александра Д. Дуличенка, Studia Ruthenica, чис. 14, 2009, б. 52-53.
- Блаженка Хома Цветкович, Язични нїтки двох линґвистох, др Александер Д. Дуличенко о роботох Миколи М. Кочиша, Studia Ruthenica, чис. 16, 2011, б. 75-82.
- Дюра Латяк, Мойо контакти зоз др Александром Д. Дуличенком, Studia Ruthenica, чис. 16, 2011,б. 83-91.
- Kunnap, Ago; Kuznetsov, S. N.; Lehfeldt, Werner (2006), Mikroiazyki, Iazyki, Interiazyki : Sbornik V Chest Ordinarnogo Professora Aleksandra Dmitrievicha Dulichenko, Tartu: Tartu Ulikool, Slaavi Filoloogia Oppetool, ISBN 9949-11-444-6.
- P R Magocsi , Dulichenko, Aleksandr Dmitrievich , P. R. Magocsi and Ivan Pop: Encyclopedia of Rusyn History and Culture, University of Toronto, 2005, ISBN 0-8020-3556-3, p. 106.
Вонкашнї вязи
[ушориц | ушор жридло]- Aleksandr Dulichenko, John Z, 16. фебруар 2009, Википедия на анґлийским язику