Василь Мудри
Василь Мудри (*13. III 1930—†22. VII 2016), наставнїк, писатель и културни творитель.
Биоґрафия
[ушориц | ушор жридло]Василь Мудри народзени у Дюрдьове, Сербия, 13. марца 1930). Оцец Данил (1907-1974) и мац Мария, народзена Полдруги (1906-1993) мали двойо дзеци, сина Василя и дзивче Наталию (1936). Василь Мудри основну школу од I-VI класу закончел у Дюрдьове (1937-1943), два класи гражданскей школи у Новим Садзе (1943-1944), а трецу и штварту класу нїзшей ґимназий у Руским Керестуре (1945-1946). После положеней малей матури уписал ше до учительскей школи хтору закончел у Сримских Карловцох (1946-1950). Познєйше попри роботи (позарядово) закончел Висшу педаґоґийну школу - русийски язик у Шабцу (1968).
Василь Мудри бул оженєти зоз учительку Меланию нар. Планчак (Руски Керестур, 1933) зоз хтору мали двойо дзеци - дзивку Меланию (1958) и сина Бориса (1965).
Жил и робел у Шидзе, дзе и умар 22. юлия 2016. року. Поховани є на Руским теметове у Шидзе.
Педаґоґийна и новинарска робота
[ушориц | ушор жридло]После законченей учительскей школи Василь Мудри почал робиц у Редакциї новинох Руске слово у Руским Керестуре як новинар и редактор дзецинского часопису Пионирска заградка. Два роки познєйше преподавал руски язик у Основней школи у Дюрдьове (1953-1955). После того ознова преходзи до Руского слова у Руским Керестуре (1955-1960), же би ше 1960. року (зоз фамелию) преселєл до Сриму дзе од 1960. по 1962. рок, перше робел як учитель у Дзецинским (покраїнским) шпиталю за ТБЦ на Принциповцу, а после того як наставнїк русийского и руского язика у Основней школи Йован Йованович Змай у Соту (1962–1981) дзе штири роки бул и директор школи. Од 1981. по одход до пензиї 1991. року робел у Основней школи Сримски фронт у Шидзе як наставнїк русийского язика. Источашнє преподавал и руски язик як мацерински руским школяром.

Активносци у рамикох Дружтва за руски язик, литературу и културу.
[ушориц | ушор жридло]Василь Мудри бул єден з зоз сновательох Дружтва за руски язик, литературу и културу 1970. року у Новим Садзе и його перши подпредсидатель и други по шоре, такой после шмерци Миколи М. Кочиша (1928-1973) предсидатель (1973-1974) року, а тиж и длугорочни предсидатель Подружнїци, тераз Секциї Дружтва у Шидзе. Окремну усиловносц у науковей дїялносци Дружтва уложел на пририхтованю Сербско-руского словнїка. У периодзе од 1973. по 1975. рок робел на ексцерпциї рускей лексики. За руски словнїк обробел шейсц букви – Ж, З, И, Л, ЛЬ и М – вєдно 12 000 одреднїци, хтори обявени - I том 1995 и II том 1997. року.
Литературна робота
[ушориц | ушор жридло]Василь Мудри свою першу писню, под назву Нашей ґимназиї обявел 21. децембра 1945. року у новинох Руске слово (Руски Керестур). Писал писнї за дзеци, писнї за одроснутих як и литературни прикази и школски учебнїки. Писнї му обявйовани на вецей язикох: сербским, словацким, мадярским румунским, македонским и українским язику. Обявени му коло 300 писнї (стихи) за дзеци и вецей як 70 за одроснутих. Заступени є у шлїдуюцих антолоґийох: Антолоґия поезиї, Руске слово, Руски Керестур, 1963; Антолоґия дзецинскей поезиї, Руске слово, Руски Керестур, 1964; Ирина Гарди Ковачевич, Облак на верху тополї, антолоґия дзецинскей поезиї, Руске слово, Нови Сад, 1990 и Светислав Ненадович, Међе певања, антологија шидских песника, Шид 1994.
Василь Мудри автор двох кнїжкох писньох за дзеци Подшнїжнїки викукую, писнї за дзеци, Руске слово, Нови Сад, 1973; и Будзенє яри, писнї за дзеци, Руске слово, Нови Сад, (2014).
Василь Мудри писал и тексти на хтори му компоновани понад 20 композициї хтори виводзени на Червеним пупчецу (у рамикох Фестивалу култури Червена ружа у Руским Керестуре), потим Фестивалу Ружова заградка у Новом Садзе, радийских емисийох итд. У Шидзе, на тим планє сотрудзовал зоз композитором Славком Загорянского (Бачинци, 1947).
Вшадзи дзе у школох робел як просвитни роботнїк Василь Мудри порушовал роботу литерарних секцийох у рамикох хторих ше зявйовали нови мена младих писательох, медзи хторима Амалия Балоґ-Ґерлах и Янко Грубеня (Дюрдьов), Нада Роман (Бикич Дол), а замеркована була и його робота зоз рецитаторами основних школох у Шидзе: Снежану Чордаш, Весну Цирба, Наду Хромиш, Сладяну Румпли итд.
Робота на учебнїкох и наукова дїялносц
[ушориц | ушор жридло]Василь Мудри составел дзевец наслови читанкох, учебнїкох и школских лектирох за наставу руского язику у основним образованю. Єдна читанка у коавторстве зоз др Яковом Кишюгасом, як и други наслови од 1951. по 2005. рок дожили 21 виданє. Попри того бул рецензент 20 читанкох, учебнїкох, лектири, романох и референт 11 учебнїкох, як и лектор числених руских виданьох.
Литературни огляднуца
[ушориц | ушор жридло]У вязи зоз литературну роботу Василя Мудрого др Юлиян Тамаш думаня же Василь Мудри зоз своїм интересованьом за збуваня у руским литературним живоце дал значне доприношенє розвиваню свидомосци о потреби пестованя уметнїцкого слова у рускей литератури. Др Тамаш Василя Мудрого видзи насампредз як дзецинского писателя чийо стихи разумлїви широкому кругу читательох, полни полєту и одушевия, окреме стихи обнови и вибудови у повойновим периодзе.
Владимир Костелник наглашовал же тематика писньох за дзеци Василя Мудрого блїзка и актуална каждей ґенерациї дзецох окреме такволаного другого ступня возросту, односно тим хтори прекрочели праг школских дзверох и хтори ше воспитую же би почитовали родичох, наставнїкох, школу, природу. Владимир Костелник, тиж наглашовал же ше стихи Василя Мудрого лєгко читаю бо им ритем чечни, а лєгки су и за рецитованє и паметанє.
Награди
[ушориц | ушор жридло]Василь Мудри за свою педаґоґийну, литературну и културно-уметнїцку роботу приял вецей награди медзи хторима: припознанє у обласци образованя и култури Републики Србиї "25 мај" (1970) и "Златна значка" (1980), як и войводянску награду з обласци школства "Партизански учитель" (1990).
Тексти за композициї
[ушориц | ушор жридло]У забавним духу | Червене пупче | ||||||
---|---|---|---|---|---|---|---|
Рок | Текст
|
Композитор
|
Рок | Текст
|
Композитор
| ||
1983. | Нова держава | Витомир Бодянєц | 1993. | Початнїк | Звонимир Кочиш | ||
У народним духу | 1993. | Рибарска | Михайло Бодянец | ||||
1984. | Спреведзена | Витомир Бодянєц | 1995. | Чудне путованє | Татиана Барна | ||
1991. | Так сцела мамка твоя | Михайло Бодянец | 1996. | Привит ластовичком | Славко Загорянски | ||
1995. | Привит | Славко Загорянски | 2002. | Купанє, плюсканє | Мирослав Пап | ||
1995. | Любов мацерина | Славко Загорянски | 2003. | Мам я товариша | Мирослав Пап | ||
Червене пупче | (?) | Пионирска хусточка | Маґдалена Горняк-Лелас | ||||
1973. | Хора бабка | Онуфрий Тимко | (?) | Розлука зоз гайом | Маґдалена Горняк-Лелас | ||
1976. | Шицких нас чува оцовщина | Юрий Цимбора | (?) | На вибдови | Яким Сивч | ||
1979. | На початку школского рока | Юрий Цимбора | Ружова заградка | ||||
1983. | Нашо швето | Михайло Бодянец | 1991. | Другому ши шерцо дала | Михайло Бодянец | ||
1984. | Нашо дзецинство | Витомир Бодянєц | 1992. | Розчарованє | Славко Загорянски | ||
1986. | Змаржлїва Юста | Михайло Бодянец | 1993. | Заграйце ми | Славко Загорянски | ||
1986. | Чудне путованє | Михайло Бодянец | 1994. | Руснак | Славко Загорянски | ||
1987. | Мала кресцанка | Михайло Бодянец | 1995. | Свадзебна писня | Славко Загорянски | ||
1987. | Родичи и школа | Славко Загорянски | 1997. | Препадли надїї | Славко Загорянски | ||
1991. | Сова | Даниел Миклош |
Литература
[ушориц | ушор жридло]- др Јулијан Тамаш, Русинска књижевност, Матица српска, Нови Сад, 1984, 188-189;
- др Юлиян Тамаш, Поет Василь Мудри, Литературне слово, Руске слово, Нови Сад, VI 1979, 6;
- Янко Рац, Приручнїк дзецинского живота, Шветлосц IX, Руске слово, Нови Сад, 1973, 4, 430-432;
- Владимир Костелник, Подшнїжнїки викуку - поезия за дзеци, Нова думка, III, Вуковар, 1774, 69-71;
- Штефан Гудак, 70 роки живота и 55 роки творчей културно-уметнїцкей роботи - Василь Мудри (1930), Studia ruthenica 7, Нови Сад, 1999-2000, 119-123;
- Владимир Дїтко, Шейсц децениї творчосци Василя Мудрого - учитель и писатель цали роботни вик, Руске слово 32, Нови Сад, 12. 08. 2005,9.
- Сенка Славчев, 75 роки народзеня и 60 роки културно-уметнїцкей роботи Василя Мудрого, Studia ruthenica 11, Нови Сад, 2006, 135-137.
- Библиоґрафия Руснацох у Югославиї 1918-1980, Матица сербска, Нови Сад, 1990, 380;
- Василь Мудри: О роботи на Сербско-руским словнїку, Studia ruthenica чис. 5 (18) 1996-1997, б. 56
Вонкашнї вязи
[ушориц | ушор жридло]- Ирина Папуґа: Василь Мудри и його соструднїцтво зоз Славком Загорянским на планє компонованя руских шпиванкох, Studia ruthenica чис. 12 (25), 2007, б.148-151.
- Василь Мудри (1930–2016), наставнїк, писатель и културни творитель, Studia ruthenica чис. 22 (35), 2017, б. 159