Дзияк

Париз, Хор зоз 1450. року

Назва дзияк, кантор походзи од латинского слова cantor - шпивач.

Дзияк у штреднїм вику бул церковни службенїк-шпивач хтори руководзел зоз шпивацким хором, (лєбо напредок шпивал/водзел молитву на Богослуженю), член scholae cantorum. Тото значенє звичайно означує у католїцкей церкви орґуляша и хороводителя. У чаше Мартина Лутера-лутерански период, така особа ше наволовала реґент. Часто то бул орґуляш, композитор и парохиялни музичар.

Подобне лєбо исте значенє ма дзияк у нємецких Протестанских церквох-хороводитель и руководитель шпивацкей школи.

Познати композиторе хтори були дзияци то:

• Йоган Себастиян Бах

• Ґеорґ Филип Телеман

Дзияк (єврейске слово Chasan-кантор) у синаґоґи предводзи и главни є шпивач на богослуженьох. У формалних єврейских богослуженьох, дзияк особа хтора шпива соло стихи лєбо цитати на хтори зоз шпиваньом одвитує хор лєбо такв. скупштина.

Улога професийного дзияка окреме значна и централна у реформским и конзервативним юдаизму, дзе вони служа як священство у своїх скупштинох. Реформаторски юдаизем и конзервативни юдаизем покладаю рукопришагу дзиякох зоз богословиї. У їх случайох дзияк преходзи през длугше образованє.

Дзияк у руских грекокатолїцких церквох

Церковне шпиванє состойна часц богослуженя у руских церквох. Мож повесц же то найважнєйша часц, бо од шпиваня завиши краса богослуженя и духовни хасен-наєсток за людску християнску душу.

У нашим обряду водитель церковного шпиваня вола ше дзияк. Церква аж и предвидзує пошвецанє за дзияка цо єден зоз ступньох церковних служительох. Гоч ше у нас тото пошвецанє нє практикує; за шпивачох и читачох у церкви пошвецую ше лєм тоти хтори познєйше буду пошвецени за дияконох и потим за священїкох. Так кажди священїк першенствено бул пошвецени за дзияка.

У векших владичествох исную и школи за дзиякох. Таки школи були, медзи иншим и у Ужгородзе и Львове. После законченей школи доставали званє ,,пивцо-учитель.'' Слово ,,пивцо'' значело же мушели знац и шпивац и читац. Найчастейше служба дзияка була повязана зоз службу учителя, та ше тоти школи волали пивцо-учительски школи. Велї млади хлапци одходзели до варошох вишколовац ше до таких школох.

Длугорочни дзияк у Новим Садзе Дюра Биндас, закончел дзияцку школу у Ужгороду, и мал диплому хтору му, як директор школи, подписал Авґустин Волошин. Дюра Биндас зоз Н. Саду  школовани пивцо-учитель. Длугорочни учитель и дзецински режисер Йовґен Медєши зоз Руского Керестура тиж бул школовани пивцо-учитель, алє нїґда нє бул дзияк у церкви, цали роботни вик робел як учитель у школи.

Дзияци у Галичини хтори ше там школовали мали и свойо новини, волали ше ,,Дзияцки глас'', друковали ше раз мешачно (як мешачнїк) у Станиславову (нєшка Ивано-франковск) од 1895 по 1914. рок. У Львове ше друковали ,,Дзияцки вистки'' хтори познєйше меняли назву. То бул тиж мешачнїк а виходзел од 1923 по 1939. рок. На Буковини ше друковал часопис за дзиякох зоз меном ,,Ранок.''

Постац дзияк дакеди и нєшка

Початком 20. вика и вельо познєйше були орґанизовани испити и преверйованє знаня особох хтори жадали буц дзиякове. По историйних податкох мож дознац же 27. 08.1939. року, були испити за дзиякох. Випитователє були о. Дюра Миклош, и о. Онуфрий Тимко. А покладац були–значи випитовани:

Вартоломей Бесерминї зоз Старого Вербасу

Янко Майорош зоз Нового Саду

Мирон Няради зоз Бачинцох

Шицки троме були барз порихтани и успишни зоз тей обласци и шицки троме положели испит. Тоти факти доказую же испити и пририхтованя и зоз практичну подуку, були озбильни и же будуци дзиякове були такпв. професийно порихтани за дзиякованє у церкви. Дзияк бул у церкви почитовани и мал одредзени обовязки алє и угляд тиж и у валалє лєбо варошу дзе службовал.

Нєшка ше дзияци уча єден од другого и покладаю пред владическу комисию дзияцки испит. После конкурса, з декретом, Владичество их поставя за дзиякох у одредзней парохиї. Так було до нєдавна у наших церквох-парохийох. А тераз пре нєдостаток дзиякох нєт вецей анї таких испитох, анї урядово поставянє дзиякох з боку Владичества. Проблематику дзияка ше ушорює на уровню парохиї.

Окрем же маю значну улогу дзияка у церкви поготов у служби, зоз тей активносци и обовязки, економски нє мож обстац, так же дзияци вше мали (то и тераз случай) свою професию (байбер, ципелар, пекар, польопривреднїк, лєбо су пензионере) а обовязку дзияка окончую углавним волонтерски лєбо з малим надопольнєньом у пенєжу.

Зявюю ше обставини по руских местох-парохиї у церквох (пре нєдостаток хлопох-дзиякох) же тоту улогу дзияка доставаю и жени хтори маю притоку ґу шпиваню на богослуженьох. Таки случай постої у Коцуре, Ґосподїнцох, Дюрдьове, Беркасове, Бикичу итд. През историю дознаваме же дзияци були познати и популарни у своїм штредку и по добрим а и по нє барз добрим.

Дзияцка школа о. Йоакима Холошняя у Дюрдьове

Свидоми слабеня общих моцох и нєдостаток дзиякох по наших местох у наших грекокатолїцких церквох, о. Йоаким Холошняй парох у Дюрдьове ше намагал, кед нє зопрец, та голєм спомалшиц замеранє, щезованє и забуце наших церковних вредносцох. Як добри духовни учитель, жадал и других научиц поготов младших, пренєсц им свойо знанє церковного шпиваня и научиц основу дзияцкого шпиваня.

Док нєпреривно длугши период роздумовал о дзияцкей школи, о. Й. Холошняй ше сцерпезлїво и методолоґийно пририхтовал за тото подняце. Обдумано и систематично творел одвитуюци знїмки, хтори послужа як звукова илустрацийна материя учашнїком дзияцкей школи. Пририхтовал церквону-дзияцку литературу за шпиванє. Нотно записовал осмоглашнїк и нєпременлїви часци Служби Божей, вечурнї и утринї, а з часом и други пременлїви часци главних шветох и других богослуженьох.

Реализация дзияцкей школи

Влєце, 2000-го року здобули ше условия реализовац пейцтижньову дзияцку школу, у Дюрдьове. Зоз потримовку и благословом владики Славомира Микловша, а на поволанку шицким парохийом одволали ше особи зоз вецей местох: Михайло-Мижо Колєсар, Йовґен Надь зоз Нового Саду, Иван Копчански зоз Вербасу, Дарко Рац и Славко Орос зоз Руского Керестура, Михал Лїкар зоз Дюрдьова.

План и програма роботи дзияцкей школи були предвидзени и облапени зоз теорийску и практичну часц.

Програма облапяла шлїдуюци теми и обласци:

• увод до основи музичней теориї,
• основне музичне описменьованє,
• дзияк-улога, значенє и нєобходни прикмети,

• кратка история церковного шпиваня,
• увод  до богослуженьох зоз толкованьом и типик (првила),
• церковнославянски язик зоз акцентом на читаню текстох,
• практикум-шпиванє и увежбованє мелодийох. 

Найвекшу учасц у витворйованю програми мал сам о. Й. Холошняй, а помогли, як сотруднїки, о. Борис Холошняйов, о. Михаил Холошняйов, Татиана Барна и Мария Драґин.     

Шицок уложени труд о. Йоакима Холошняя бул на Славу Богу, а циль и задаток цалей задумки ше витворел. Оможлївело ше и реализовало нащивительом школи през тот час участвовац на богослуженьох у Дюрдьове, тиж ше витворело през госцованя до поєдиних парохийох зоз истим цильом. На тот способ учашнїки могли дожиц и здобуц и практичне дзиякованє у служби.

Тророчне дзияцке службованє Михайла Колєсарового (учашнїка школи), у Ґосподїнцох, то лєм ище моцнєйше потвердзело. Познєйше у Н. Садзе Йовґен Надь, тиж постал порядни дзияк на богослуженьох у рускей грекокатолїцкей церкви св. Петра и Павла.  

Паноцец о. Йоаким Холошняйов свою визию и идею реализовал алє на жаль лєм у єдним лєтним периодзе. Чкода же ше таки едукациї за дзиякох, лєбо и любительох церковного шпиваня нє предлужело и надалєй.

Понеже о. Й. Холошняй бул предодредзени за служенє Богу а зоз своїм винїмковим прекрасним тенорским гласом, демонстровал и закладал ше и през дзияцку школу же би тексти на церковнославянским язику були похоплїви, знал же ше то оможлївує зоз точним читаньом, ясним вигваряньом и правилним акцентованьом каждого слова. На тих елементох инсистовал и бул дошлїдни у практичним ученю. У служеню нє допущовал импровизовац, прето бо знал же кажде правило значне, а безчислени комбинациї богослужебних текстох, допринєшу лєм доброго народу и вирнїком.    

Дзияци у Керестуре

Дзияци хтори ту споминути о нїх постоя документи и исную факти же история дзиякох у Руским Керестуре барз интересантна. Зоз канонскей византиї од 1756. року дознаваме же у Руским Керестуре зазначени особи хтори були дзияци:

1756. рок учитель и дзияк Янко Палїнчар.

Перши дзияк хтори спомнути у ,,Лїтопису'' то Йоан Брусницки,

Петро Кузмяк учитель и дзияк,

1764. року спомина ше дзияк Янко Палїнкаш (можлїве же то Янко Палїнчар висше спомнути),

1765. рок дзияк Франсис Кирда,

1800. рок дзияк Й. Жаткович а дзияк помоцнїк му бул Георгий Влах (бок 87. у лїтопису),

1850. Янко Гриняк,

1851. Антоний Сакач,

1856. Иларион Прусницки  (спомина ше алє нє виродостойни податок)

1876. помоцни дзияк Янко Еделински,

1894. спомина ше же умар дзияк Джуня (учитель и дзияк) (Лїтопис Р. Керестур бок 113),

1894. и 1895. року Михайло Врабель учитель (оженєти зоз учительку Павлину–Павлу Джуня) вибрани лєм за дочасового дзияка, односно дочасови помоцни дзияк Джуньовому дзиякови (Лїтопис Р. Керестура 113. бок). Народ нє бул задовольни зоз нїм пре нєшорови живот.

Михайло Врабель народзени (*20. новембр 1866. рок) у священїцкей фамелиї у валалє Вирава (срез Гумене, комитат Земплин, Словацка) Грекокатолїцку дияко-учительску школу закончел у Ужгородзе 1887. року. Под час школованя при Врабельови ше розвила окремна любов ґу народному културному скарбу, окреме ґу писньом-шпиванком. Року 1889. Михайло Врабель уж бул учитель у Руским Керестуре.

Михайло Манойлов пивцо-учитель а бул и дириґент хору основаного 1900 року и тирвал по 1914. рок (по Першу шветову войну).

Конєц 19. вику. Дюра Манойла *1861-†1927), учитель, дзияк у керестурскей церкви Георгий (Дюра) Манойла ше народзел 1861. року у месце Шаланка (Подкарпатска Рус). Школу за пивцоучителя, теди волану шпивацко-учительску школу, закончел у Унґваре (тераз Ужгород) у Мукачевскей парохиї. До Руского Керестура (теди Bácz Keresztùr) Дюра Манойла пришол концом ХIХ вику. У керестурскей школи робел цали роботни вик, а окреме були замерковани його годзини музичного вихованя. О тим дознаваме зоз записнїкох Наставнїцкей ради Державней основней школи дзе, медзи иншим, зазначене же одходзел на семинари зоз тей обласци. По шицким судзаци вон мал ширше образованє односно спознанє з музичней обласци а тиж и талант за тоту обласц творчосци цо му оможлївело буц и вельорочи дзияк у цекрви.

Дзияци новшого часу (20. вик) у Р. Керестуре

1870 -1930. рок  Микола Будински,

1920. рок Владо Еделински достал дзияковство.

1927. року спомина ше и иснує приповедка же ше дзияк Владо Еделински випендрал горе на турню (у догварки и пораду зоз тедишнїм парохом) по направеней ,,драбинки'' зоз паньвашох и виклох. Випендрал ше же би знял крижик хтори требало обновиц, офарбиц и позлациц и назад врациц на верх турнї. Шмели дзияк В. Еделински таке подняце окончел на задовольство шицких валалчаньох.

1928. рок Михал Няради власни брат владики Дионизия Нярадия. У Пряшове закончел успишно пивцо-учительску школу. Положел испити и за учителя и дзияка.

1933. рок Янко Мученски родзени 1911. року у Р. Керестуре, умар у Канади 1999. року (власни брат секретара у осн. школи В. Мученския) Перше пошол до Нємецкей а вец 1996. до Гамилтону дзе виучел школу за дзияка. До конца бул дзияк у Винзору, бул музикални и познал добре музичну нотацию.

Петро Недогин українєц з Босни

Ферко Папрадванї  (дочасови дзияк) 

Дзияци - ремесельнїки

Микола Джуджар (родзени 19.12.1906) (ципелар)

Йовґен Лендєр (родзени 2.12. 1919.) (байбер) од вчасней мадосци шпивал и водзел церковне шпиванє под час богослуженьох. Бул дзияк до старосци.

Любомир Надь-Бандурик,

Любомир Молнар (бочкораш),

Янко Виславски -терашнї дзияк (польопривреднїк).

Яким Стричко - пекар (*30.12. 1928 - †2013.), по походзеню зоз Руского Керестура. Року 1961. ше зоз фамелию одселєл до Кули. Прейґ 20 роки бул дзияк у церкви Св. Йосафата у Кули хтору нащивюю вирнїки Руснаци и Українци. Приселєл ше 2008. року назад до родного Р. Керестура зоз супругу и по потреби ище дзияковал у церкви св. Миколая у Руским Керестуре. Обуку и знанє о дзияцким шпиваню на богослуженьох, Яким Стричко здобул од искусного дзияка Миколи Джуджара зоз Руского Керестура.

Яким Рамач Керестурец, хтори ше одселєл зоз Р. Керестура до Кули тиж бул длуго роки дзияк и водзел церквне шпиванє под час служби у Кули у церкви Св. Йосафата. (податок превжати зоз Моноґрафиї парафиї и манастира св. Василиянох у Кули виданей 2006. року, на українским язику)

Литература

• Сахаров П. Певчий // Католическая энциклопедия Том 3. М., 2007, кол.1368-1370.
• Hüschen H. Berufsbewußtsein und Selbstverständnis von Musicus und Cantor im Mittelalter // Beiträge zum Berufsbewußtsein des mittelalterlichen Menschen, hrsg.v. Paul Wilpert. Berlin, 1963, S.225-238.
• Ruhnke M. Kantor// Музыкальный словарь Римана 12te Aufl. Sachteil. Mainz, 1967, S.443-444.
• Traub, Andreas. Der Cantor im Mittelalter // Der Kirchenmusiker, hrsg. v. F. Körndle u. J. Kremer. Laaber, 2015, S. 73–96. (Enzyklopädie der Kirchenmusik 3).
• др. Юлиян Тамаш, РУСКИ КЕРЕСТУР лїтопис и история од 1745-1991
• Християнски календар 1975. рок (81- бок)
• Янко Рамач, „Державна школа (1899-1918), Учителєˮ, Школа у Руским Керестуре (1753-1918)
• Олена Папуґа, „Манойлова учительска фамелияˮ, Studia ruthenica, чис. 3, зборнїк роботох, Нови Сад 1992-1993, бок 330.
• Руске слово -тижньовнїк од 28. 03. 2008. рок (Мария Афич, Людзе, роки живот - Яким Стричко)
• Дюра Варґа: Здогадованє на Михайла Врабеля. Шветлосц ч. 2/1990, бок 207-212.
• Дюра Варґа: Михаил Врабель - значни културни роботнїк (1), Младежски часопис МАК, ч. 4, рок XVI, април 1987, бок 14-15.
• Дюра Варґа: Михаил Врабель - значни културни роботнїк (2), Младежски часопис МАК, ч. 5, рок XVI, май 1987, бок 14-15.

Вонкашня вяза

• Fassler M. The office of the cantor in early Western monastic rules: A preliminary investigation // Early Music History 5 (1985), p. 29–51.
• Соловьёв, Николай Феопемптович Кантор, должность Энциклопедический словарь Брокгауза и Ефрона: в 86 т. (82 т. и 4 доп.). — СПб., 1890—1907.
• Дюра Манойла учитель и дзияк у Р.Керестуре