Подолок

Подолок то женска сподня сукня (часц облєчива), од пасу по колєна, кратша и узша од сукньох поверху, зоз платна своєй роботи. Внєдзелю и на швета подолок бул били, коло пасу зранцовани и вязало ше го з гачнїком. Орубени бул з даяким шлинґерайом. При сподку бул кус розширени (пре лєгчейше ходзенє), на долнєй часци ше укладало два-три «пущки» - троуглово часци з истого платна. Роботни дзень подолок могол буц у рижних, цмейших фарбох.

Походзенє слова: слово подолок походзи од праславянского dolъ, цо значи: дацо долу; долїна (дол, долу, долїк); восточнословацки podolok (исте), карп.укра. подолок (исте), укр. подолок (долня часц шмати; женска сподня сукня), серб. подсукња.

Литература

Словнїк руского народного язика II О - Я, Филозофски факултет, Одсек за русинистику, Нови Сад 2017, б. 198

Ґалерия

Шлинґерай (поруб на подолку).
Ґербекетиш (уложени вишивани прикраски тиж зоз конопи).