Михайло Варґа (учитель)
| Михайло Варґа | |
|---|---|
| Народзени | 5. новембра 1940. |
| Умар | 20. априла 2007 (67) |
| Державянство | югославянске |
| Язик творох | руски |
| Школа | Учительска школа, Зомбор |
| Период твореня | 1958—2001. |
| Жанри | просвита, дружтвени анґажман |
| Поховани | у Руским Керестуре |
Михайло Варґа (*5. новембер 1940—†20. април 2007), педаґоґ, руководитель у образованю, редактор и дружтвено-културни активист русинскей/рускей националней ориєнтациї у Войводини.
Биоґрафия
[ушориц | ушор жридло]Михайло Варґа народзени 5. новембра 1940. року у Руским Керестуре. Оцец Янко и мац Натала родз. Барна. Основну школу Петро Кузмяк Михайло Варґа закончел у Руским Керестуре, а Учительску школу у Зомборе. У Основней школи у Руским Керестуре як учитель Михайло Варґа почал робиц 1958. року.
Робота у просвити и култури
[ушориц | ушор жридло]Михайло Варґа у своїм полним роботним вику бул и остал прави народни учитель и дал вельке доприношенє у пестованю и розвою основношколского и штреднєшколского образованя по руски. Бул рецензент и коавтор вецей учебнїкох за школярох нїзших класох основней школи. Вон порихтал читанку за руски школи (лектира за II класу Майске вешелє, 1977) и основал два часописи, дзецински Дзвончок (1970-1991) и младежски Швитаня (1972-1974), хторим бул редактор.
Директор Образовного центра Петро Кузмяк у Руским Керестуре бул у периодзе од 1985. по 1993. року, а потим єден час бул воспитач у интернату керестурскей Ґимназиї. Як директор Образовного центра Петро Кузмяк Михайло Варґа закончел вибудов и опреманє нового будинку Школи и запровадзел реконструкцию будинку Новей школи, наволаного Замок. Року 1990. року обновел єдину у швеце Ґимназию по руски. Бул учашнїк, орґанизатор и домашнї традицийним стретнуцом основних школох Републики Сербиї Коло братства.
Варґа бул активни учаснїк у културним и дружтвеним живоце войводянских Русинох/Руснацох як соорґанизатор фестивалу Червена ружа од 1970-тих рокох
Дружтвене анґажованє
[ушориц | ушор жридло]У Рускей матки, матичней орґанизациї бачванско-сримских Руснацох, Михайло Варґа бул член од єй снованя. Предсидатель Рускей матки Михайло Варґа бул од 1993. до 1999. року. Як предсидатель Рускей матки старал ше о очуваню руского/руснацкого идентитета у нашей жеми и шицких других жемох дзе жию припаднїки нашого народу. Бул активни учашнїк перших осем отриманих шветових конґресох Руснацох, Русинох, Лемкох и орґанизатор и домашнї 3. Шветового конґреса РРЛ хтори у Руским Керестуре отримани 1995. року. Бул редактор кнїжкох о роботи обидвох тих орґанизацийох (Зборнїк роботох зоз Трецого Шветового конґреса Русинох/Руснацох/Лемкох, 1997; Руска матка Югославиї, 1998).
По законченю мандата предсидателя Рускей матки вон бул предсидатель Месного одбору и член Управного одбору Рускей матки.
Секретар Месней заєднїци у Руским Керестуре Михайло Варґа бул од 1996. по 2001. рок. На тей функциї Михайло Варґа ше старал о шицких потребох гражданох Руского Керестура а, медзи иншим, спред Месней орґанизациї Рускей матки бул инициятор активносцох на формованю општини Руски Керестур хтора, после його нєсподзиваного упокоєня, загашена.
Вельке доприношенє Михайло Варґа дал и у пририхтованю, вибору и конституованю Националного совиту рускей националней заєднїци у Сербиї у другим зволаню 2004. року, як и у роботи його орґанох и целох.
За свою длугорочну воспитно-образовну и дружтвено-политичну роботу, окреме у тедишнїм Социялистичним союзу роботного народу, Михайло Варґа достал вецей припознаня и награди. Бул чловек инспирациї, романтичар, витирвали борец за правду и за права обичного чловека. Бул упарти, витирвали, тварди Руснак.
Михайло Варґа нєсподзивано умар 20. априла 2007, у Руским Керестуре у своїм 67. року живота. Поховани є на теметове у Руским Керестуре.
Литература
[ушориц | ушор жридло]- P. R. Magocsi: Varga, Mikhailo, P. R. Magocsi and Ivan Pop: Encyclopedia of Rusyn History and Culture, University of Toronto, 2005, ISBN 0-8020-3556-3, p. 525
- Тамаш, др Юлиян: Просвитни роботнїки 1994-1991. року (Михайло Варґа), Руски Керестур, лїтопис и история (1745-1991), Месна заєднїца Руски Керестур, 1992, бок . 414.
- Михайло Варґа, предсидатель Рускей матки Югославиї (привитна бешеда), Зборнїк роботох зоз трецого шветового конґреса Русинох (Руснацох, Лемкох), Руска матка, 1997, б. 29.