Мирослав Силадї
| Мирослав Силадї | |
|---|---|
 | |
| Народзени | 17. децембра.1957. |
| Умар | 30. децембра. 2012. (55) |
| Державянство | югославяске, сербске |
| Язик творох | руски |
| Школа | Школа школярох у
привреди, Вербас |
| Период твореня | 1980—2012. |
| Жанри | интернет, култура,
информованє |
| Поховани | у Вербаше |
Мирослав Силадї (*17. децембер. 1957—†30. децембер. 2012), вебмастер, културно-просвитни дїяч.
Биоґрафия
[ушориц | ушор жридло]Мирослав Силадї народзени 17. децембра.1957. року у Вербаше. Оцец Владимир Силадї и мац Наталия Силадї, народзена Буила. Основну и штредню школу та Школа школярох у привреди, напрям ратарство Мирослав закончел у Вербаше. Войско служел у Травнику и Баня Луки 1978. По одслуженю войного року Мирослав Силадї почал робиц у вербаскей цукровнї дзе робел по 2005. рок на вецей позицийох. Потим ше опробовал як приватни привреднїк и ґрафични дизайнер.
Мирослав Силадї ше 1980. року оженєл зоз Єлену Фа зоз Руского Керестура. У малженстве мали двойо дзеци: дзивку Тат'яну и сина Здравка.
Анґажованє у Рускей матки
[ушориц | ушор жридло]Мирослав бул вельки любитель електронїки и рахункарох зоз хторима ше од младосци занїмал. Тот гоби окреме розвил кед почал приватну праксу. У тим периодзе ше уключел до активносцох Рускей матки за хтору направел и отримовал интернет бок.
У роботи Рускей матки участвовал як предсидатель месного одбору у Вербаше, член управного одбору РМ и єй портпарол.
Бул член делеґациї Рускей матки на конґресу Шветовей ради Русинох/Руснацох/Лемкох 2009. року и бул вибрани за предсидателя Конґресней комисиї за економски розвой и привредне сотруднїцтво.
На зашеданю Шветовей ради РРЛ 2012. року у Кринїци у Польскей Мирослав Силадї бул вибрани за главного редактора културно-белетристичного часопису Голос Русина. У тим периодзе бул и администратор веб сайту Шветовей ради РРЛ.
Учасц у културним живоце
[ушориц | ушор жридло]Бул єден зоз сновательох Новинскей аґенциї Рутенпрес и на початку єй роботи Мирослав Силадї направел и отримовал єй сайт. Тиж так мал и власни сайт под назву Руснак инфо. Його главне опредзелєнє бул ґрафични дизайн, першенствено у виробки плакатох, поволанкох, каталоґох, алє и на шицких других продуктох рекламного и пропаґандного материялу. Окреме бул заинтересовани за виробок и администрованє интернетових сайтох и продукцию музичних радио и телевизийних емисийох.
Участвовал у роботи єдного зволаня Националного совиту Руснацох.
Mирослав бул почитователь рускей култури, уметносци и литератури. Бул член КПД Карпати зоз Вербасу и єден час член управного одбору.
Бул идейни творец конкурса за найлєпшу руску сказку "Руски витяз". Автор є вецей сатиричних приповедкох од хторих єдна "Руски цаР". Бул лауреат першей награди "Соцки" на манифестациї гумору и сатири Коцурска чутка 2011. року.
Остатнї два роки Мирослав Силадї робел и як дописователь рускей редакциї Радия Нови Сад.
Мирослав Силадї дїйствовал як активиста у култури и просвити Руснацох у Войводини, почитовал свойо руски коренї и стаємно ше процивел українофилскому пробованю прекраваня рускей прешлосци и їх нєпочитованю народного паметаня при Руснацох у Войводини и Горватскей.
Мирослав Силадї умар нєсподзивано 30. децембра 2012. року, мал лєм 55 роки. Поховани є на теметове у Вербаше.
Вонкашнї вязи
[ушориц | ушор жридло]- Спомин про Мирослава Сіладі, вебсайт www.lem.fm, 18. децембер 2013.
- Отримани перши вечар Фестивалу гумора и сатири, вебсайт www.rusyn.sk, 25. 11. 2012.
- Miroslav Siladji, profil na FB
- Канал Мирослава Силадїя на Ютюб, YouTube, Sep 21, 2010
- Miroslav Siladji na RTV, вебсайт www.youtube.com, 12. авґуст, 2009
- Umar Miroslav Silaďi, вебсайт www.rusyn.sk, 30. децембер 2012.
- Uniunea Culturală a Ruthenirol diu Romania