Мецосопран

Гласови розпон мецосопрана (чарна точка на клавиятури означує с1)

Розпон гласа (обсяг) мецосопранa

Мецосопран (од ит. mezzo soprano «полусопран»; франц. bas-dessus; нєм. die Mezzosoprane) то єден зоз женских гласох, припада и хлапцовским гласом, хтори ше по висини тонох находзи медзи алтом и сопраном. Од сопранох ше розликує по завартейшей (цмейшей) фарби гласу и нїзшим реґистру: од а–h малей октави по b 2 (у другей октави) винїмково по c3 (високе c3). Мецосопран ше ище волa сопран II. Винїмково дзепойдни мецосопрани можу шпивац и по два тони нїжей и висше од просекового розпону (приклад на калвиятури).

Историят

Хлопски шпиваче кастрати дакеди шпивали у мецосопрановим вокалним розпону (дияпазону). Даєдни улоги у оперох писани за женски мецосопрани так же би вони могли буц у улоги леґиньох-хлапцох лєбо ангелох зоз типично дакус висшим гласом. Таки приклад у опери Фиґарова женїдба улога Керубини.

Мецосопрани маю найчастейше секундарни улоги у оперох. Постоя и винїмки: улога Кармен у истоименей опери и других французких оперох зоз 19. вику, Росина у опери Севильски байбер итд. Медзитим, тоти улоги шпиваю и сопрани.

Мецосопрани були заступени и у барокней музики, старей музики и барокней опери. Даєдни улоги предвидзени за лєгчейши субрет сопрани, шпиваю мецосопрани, хтори часто полнєйши, драматичнєйше виражую улоги.Таки улоги ше находза у Моцартових оперох, Пєтра Маскнїя, Рихарда Ваґнера и других.

Опера Валкира, Рихарада Ваґнера, шпива Ира Малянук-Фрика

Мецосопрани мож змесциц до трох катеґорийох: колоратурни, лирски и драмски.

◆ Колоратурни мецосопрани маю барз рухоми глас у високим реґистру. Од нїх ше вимага виртуозносц у шпиваню швидких музичних пасажох.

Колоратурни мецосопрани маю импресивни и упечатлїви високи тони алє їм найприємнєйше шпивац у штредку свойого розпону, нє на верху високих тонох. Шпивачки того гласу успишно шпиваю улоги писани за гласи кастрата. Оперски шпивачки того типа то: Чечилия Бартоли, Тереза Берґанца, Мерилин Хорн и Елина Ґаранча. Маґдалена Кожена.

◆ Лирски мецосопрани маю нїжни, чувствительни, плачуци, дакеди аж запомагаюци (лакримозни) глас.Тот тип гласа идеални за улоги зоз хторим женски шпивачки можу толковац у опери хлопски особи. Оперски шпивачки того типа гласу то: Дженет Бейкер, Аґнес Балтса, Малена Арнман, Маґдалена Кожена, Татяна Троянос и Фредерика фон Штаде.

◆ Драмски мецосопрани маю моцни глас у штреднїм реґистру, зоз хторим можу у композициї надмоцнїц оркестер и хор. У високим реґистру глас им нїжнии, приємни ,,ширши и моцнєйши од лирских и колоратурних мецосопранох. Тот глас ма менши схопносци од колоратурного мецосопрана. Розпон гласу приблїжно од f у малей октави до g2 у другей октави.

Драмски мецосопран може зоз лєгкосцу шпиваюци надвладац и буц моцнєйши од хора и оркестри. Часто тот глас бул хасновани у 19. вику же би приказал старши особи–найчастейше жени, мацери, босорки, зли особи.

Ариї за тот глас окреме любели писац композиторе: Дюзепе Верди, Рихард Ваґнер, Рихард Штраус.

Ария Каватина ч. 11 зоз Моцартовей опери Фиґарова женїдба

Найпознатши драмски мецоспрани то: Ирина Архипова (шпивала и алт улоги), Фйоренца Косото, Бисерка Цвеїч, Криста Лудвиґ, Дюлиєта Симионато и Ширли Верет.

Дьоакино Росини: опера Севильски байбер, улога Росини. Єлена Кончар (зоз Кули, оперска шпивачка СНП Нови Сад.)

Мецосопрански типични улоги у оперох

Колоратурни моцосопрани:

◆ Изабела (Италиянка у Алжиру, Дьоакино Росини)

◆ Юлиє Цезар (Юлиє Цезар, Ґероґ Фридрих Гендл)

◆ Леонора (Фаворита, Ґаетано Доницети)

◆ Орсини (Лукреция Борджия, Ґаетано Доницети)

◆ Росина (Севильски байбер, Дьоакино Росини)

◆ Танкреди (Танкреди, Дьоакино Росини)

Ария Керубина-мецосопрана Моцартовей опери Фиґаро

Лирски мецосопрани:

◆ Дидона, (Дидона и Енея, Генри Персл)

◆ Дорабела (Так робя шицки, В. А. Моцарт)

◆ Кармен (Кармен, Жорж Бизе)-може буц и улога за драмски мецосопран

◆ Керубино (Фиґарова женїдба, В. А. Моцарт)

◆ Лола (Кавалерия рустикана, Пєтро Масканї)

◆ Октавиян (Кавалєр з ружу, Рихард Штраус)

◆ Орловски (Шлєпи миш, Йоган Штраус)

◆ Пепелюґа (Пепелюґа, Дьоакино Росини)

◆ Сузуки (Мадам Батерфлай, Дякомо Пучини)

◆ Флора Бервоа (Травията, Дюзепе Верди)

◆ Шарлота (Вертер, Жил Масне)

Драмски мецосопрани:

◆ Амнерис (Аида, Дюзепе Верди)

◆ Азучена (Трубадур, Дюзепе Верди)

◆ Дидона (Троянци, Гектор Берлиоз)

◆ Кармен (Кармен, Жорж Бизе) - може буц и улога за лирски мецосопран

◆ Далила (Самсон и Далила, Камий Сен-Санс)

◆ Марина (Борис Ґодунов, Модест Мусорґски)

◆ Ортруд (Лоенґрин, Рихард Ваґнер)

◆ Принцеза од Еболия (Дон Карлос, Дюзепе Верди)

◆ Фрика (Райнско злато; Валкири, Рихард Ваґнер)

Литература

• Соловьёв Н. Ф. Голос, в вокальной музыке // словарь Брокгауза и Ефрона : в 86 т. (82 т. и 4 доп.).— СПб., 1890—1907.