Алт

Розпон женского гласу алт (жовта типка на калaвиятури означує тон c1)

Алт (од лат. altus високи, нєм. Alt, ит. Contralto, франц. Alto, hautecontre)

Розпон алта написани у алт и виолинским ключу

То найглїбши женски шпивацки глас хтори ше по висини одшпиваних тонох, може змесциц помедзи хлопского тенора и женского мецосопрана. Розпон того гласу найчастейши од тона f-g у малей октави по g2, а екстремно по h2, b2 у другей октави. Найквалитетнєйши свой глас и фарбу, алт може виражиц у обсягу а-а1, лєбо h-h1.

Катеґория алт гласу ма свойо три обще познати подкатеґориї:

♦ колоратурни алт – рухоми глас, схопни вишпивац красни пасажи,

♦ лирски алт – глас шветлєйшей фарби,

♦ драматични алт – глїбоки, цми и моцно розвити у долнїм реґистру гласа.

Познате же колоратурни алт бул облюбени глас Дьоакина Росиния. У його оперских дїлох велї улоги додзелєни праве тому гласу. Лирски алти ше находза и у дїлох оперского репертоару французких и анґлийских композиторох.

Случує ше же дзепоєдни шпивачки маю винїмково нїзки реґистер гласу и теди их наволую контра-алти. По тембру и своєй фарби гласу барз су подобни як и хлопски тенор и баритон. Познати шпивачки зоз таким окремним гласом тенора и баритона то филмски ґлумици: Зара Леандер, персийска шпивачка Хаєде, чудо од дзецка Руби Гелдер (1890–1938), и други.

Барз високи хлопски глас, зродни алту, наволує ше контратенор.

Мариан Робинсон, Ґустав Малер; 4. писня зоз циклусу о Мертвих дзецох (знїмок 1950.рок)

Найпознатши алт шпивачки то: Марияна Андерсон, Ирина Архипова, Кетлин Фериер и Лиза Джерар.

Оперски улоги

Шпивачки хтори мож змесциц до тей катеґориї нє части а тиж ридко єст и оперски улоги написани за тот глас. У улоги таких дїлох часто пребераю мецосопрани зоз нїзким реґистром.

Ирина Архипова, улога Кармен у истоменней опери Жорж Бизеа (знїмок 1972.рок)

Розабел Морисон, плакат за Кармен зоз 1896. року

♦ Кармен* (Кармен, Жорж Бизе)

♦ Азучена* (Трубадур, Дюзепе Верди)

♦ Ерда (Райнско злато, Зиґфрид, Рихард Ваґнер)

♦ Лукреция (Насилство над Лукрецию), Бенджамин Бритн)

♦ Маґдалена* (Риґолето, Дюзепе Верди)

♦ Мама Луция (Кавалерия рустикана, Пєтро Масканї)

♦ Марґарета, (Воцек, Албан Берґ)

♦ Мария (Скитнїк Голандяанин, Рихард Ваґнер)

♦ Олґа* (Евґениє Онєґин, П. И. Чайковски)

♦ Орсиния (Лукреция Борджия, Ґаетано Доницети)

♦ Орфей (Орфей и Еуридика, К. В. Ґлук)

♦ Паулина (Пикова дама, П. И. Чайковски)

♦ Росина* (Севильски байбер, Дьоакино Росини)

♦ Танкреди (Танкреди, Дьоакино Росини)

* Оперску улогу може шпивац и мецосопран.

Алти у популарней музики

Шпивачки популарней музики (народна, забавна, поп и рок лєбо джез) нє потребно класификовац спрам критериюмох и нашлїдству такв. европскей озбильней музики, прето же у основи постоя одредзени подобносци и поклопйованя. Шпивачки (тиж и шпивачох) можлїве и найлєгчейше дзелїц спрам природного розпону (обсягу), фарби и характеру гласу, алє и спрам розличносци импостациї гласу и його школованю. Односно ученє шпиваня значно уплївує на конкретне шпивацке унапрямованє. Спомнути розлики єднак условени зоз талантом, вокалнима предиспозициями, власним вибором музичного жанра, знанє вокалней технїки шпиваня и особлївосци уметнїцкей интерпретациї.

Так напр. шпивачки популарней и забавней музики маю роскошни глас и вокалну схопносц и чежше их огранїчиц зоз озбильномузичнима катеґориями; вони ше барз добре «знаходза» у алтових глїбинох а тиж и у сопранских висинох у композицийох хтори интерпретую. За розлику од озбильней музики, у хторей таки шпивацки подзелєня значнєйше одредзени (аж патраци и зоз музичней перспективи), у популарней музики така калсификация вельо шлєбоднєйша, часточно и пре хаснованє електоакустичних справох (напр. микрофони, звучнїки рижни помоцнєня, итд.) На бувших югослвянских просторох зоз алт гласом у такв. популарней поп, рок, народней и джез музики, познати були шпивачки Йосипа Лисац, Радойка Шверко, Нада Кнежевич, Вишня Корбар, Нада Мамула, Бисера Велетанлич и други.

Вонкашнї вязи

• Шпивчка Зара Леандер зоз хлопску фарбу гласа YouTube: Flower Bomb. 29 June 2022.
• BBC Cardiff Singer of the World – Contralto & Countertenor (на анґлийским язику)