Метроном

Механїчни метроном

Метроном (анґл. metronome, нєм. metronom) то справа за одредзованє - меранє швидкосци (темпа) виводзеня даякей композициї, етиди лєбо скали. Кажде ровномирне метрономске дуркнуце представя єдну тактову часц.

Старши типи метрономох, маю механїзем як на годзинох. Направени су у форми копи и маю шєйталов-метална ценка полуга а на нєй заквачени рухоми, мали кляпчисти обруч-кулька зоз хторим ше вибера темпо. Обруч ше поцагує горе и долу по шейталову (металней полуги) на хторей виписани ознаки за темпо од нєшвидкого темпа 40 дуркнуца у минути, до найшвидшого 208 дуркнуца), у зависносци хтору швидкосц жадаме. Шейталов прави нєпреривни, ровномирни рухи раз на єден раз на други бок и так омогущує же би ше чули дуркнуца.

Диґитални метроном

Кед обруч-персцень горе, дуркнуца та и темпо спомалшенши а цо є нїжей дуркнуца швидши. Композиторе попри ознаки за темпо часто напишу и метрономску миру (скрац. ММ штварцина1)  ММ 1= 60, цо значи же метроном у минути оддурка 60 штварцини ноти, односно же у тей швидкосци ше буду виводзиц штварцини у композициї.

Найпознатши метроном, хтори ше ище и нєшка хаснує, то Мелцелов метроном. Конструовал го Johann Nepomuk Mälzel 1815.року.

Нєшка ше хасную и електронски метрономи (на струю лєбо батериї) як ,,кишенкови” диґитрон. Вони нємаю шейталов и обруч. Швидкосц дуркнуца ше намесцує зоз кружним реґулатором, лєбо єдноставним вибором числа за темпо зоз дотхнуцом (диґитални).

Анимация метронома

Зоз дотхнуцом на тастер вибрана швидкосц ше зяви на екрану-дисплею.

Вежбанє зоз метрономом

Под час вежбаня скалох, етидох и других музичних композицийох треба хасновац метроном. Тота хасновита справа одкриє шицки ритмични нєдостатки и одступаня у граню. Кед вежбаю з помоцу метронома початнїци можу лєгчейше одкриц свою нєпрецизносц як и у хторей мири вони меняю темпо на даєдних местох у композициї. Прето важне, под час вежбаня,  хасновац метроном же би ше  посцигла ритмичносц и, зоз часом, же би ше усадзело до себе тоту точносц.