Александер Духнович


Александер Духнович

Народзени	7. мая 1803.
Умар	30. априла 1865. (61)^[1]
Державянство	австроугорске
Язик творох	язичиє, русински, мадярски
Школа	Ґимназия у Ужгородзе
Универзитет	Филозофия у Кошицох, богословия у Ужгородзе
Период твореня	1823—1865.
Жанри	просвита, литература, етноґрафия, публицистика,свяшенїцтво
Поховани	у Прешове, нєшка Словацка

Александер Василєвич Духнович (*7. май 1803—†30. април 1865), грекокатолїцки паноцец, национални будитель Русинох у восточней Словацкей и Закарпаттю, ґу хторим етнїчно припадаю и Руснаци Бачкей, Сриму и Славониї, поета, писатель, етноґраф, публициста.

Биоґрафия

Александер Духнович ше народзел 7. мая 1803. року у восточнословацким валалє Тополя. Родичи му були грекокатолїцки паноцец Василий Дмитриевич Духнович и Мария Ивановна, дзивоцке Гербер. Александер дзецинство препровадзел у валалє Стащин. Перши класи основней школи закончел у валалє Клокочив. Школованє предлужел у старших класох основней школи (1812-1815) и у ґимназиї (1816-1821) у Ужгородзе. Под час школованя у штреднєй школи воспитовани є у мадярским духу. Аж и перши свойо литературни твори (писнї) Александер Духнович почал писац по мадярски. У периодзе 1822.-1823. студирал Филозофию у Кошицох як стипендист прешовскей Грекокатолїцкей епархиї. Студиї предлужел на духовней семинариї у Ужгородзе (1823-1827).

По законченю богословиї першу службу достал у Прешове при владикови Ґриґорийови Тарковичови (1827-1833), алє є пошвидко, пре особни нєпорозуменя з конзервативним владиком, розпоредзени як свяшенїк на службу до Комлошу (нєшка Хмельова) а потим до валалу Биловежа (1834-1838), дзе вон почал зберац и записовац народни шпиванки и теди у нїм конєчно дозрева чувство припадносци рускому народу. Александер Духнович 1838. року прешол до служби владики Мукачовскей епархиї Василя Поповича и там робел як секретар и потим як каноник. Кед умар владика Таркович (1843) Александер Духнович ше врацел до Прешова и там бул меновани за каноника владики Прешовского владичества Йосифа Ґаґанца.^[2]

Духновичова будительска дїялносц

Александер Духнович видзел барз чежки пошлїдки мадярскей асимилациї и вельо робел на подзвигованю власного образованя операюци ше на росийских класикох. Пошвидко ше знова врацел на службу до Прешова, а источасно бул меновани и за спишского архидиякона, цо значи же мал безпостредни увид до обставинох на спишским церковним (и нє лєм церковним) подручу, а упознал и значни диялектни розлики у народней бешеди на подручу нєшкайшого Восточнословацкого краю. Ту Александер Духнович розвил свою дружтвену активносц и постал национални будитель закарпатских Русинох.

Року 1847. Александер Духнович видал перши учебнїк за народни школи Книжица читальная для начинающих хтори бул написани на бешедним русинским язику. Гоч тот учебнїк нє бул нє знам як хвалєни, вон бул популарни нє лєм у Подкарпатю алє и у Галичини. Львовски новини Зоря Галіцька 1849. року обявели Духновичову статю Сітуація Русинів в Угорьску. 27 априла го гарештовали пре його написи на русинским язику. Нєодлуга бул пущени з гарешту. У остатнїх рокох свойого живота Духнович страцел надїю до справедлївого ришеня националного питаня Русинох и приял москофилски язиково-културни погляди наздаваюци ше помоци з боку Царскей Русиї. Вєдно зоз А. Добряньским и Й. Ґаґанцом основал културну орґанизацию Общество св. Іоана Крестителя (1862).

Духновичова будительска дїялносц допарла и до Руснацох у Бачкей и Сриме, дзекуюци учительом Петрови Кузмякови и Михайлови Врабельови, хтори походза тиж з восточней Словацкей, котра у тедишнїм чаше була у рамикох Мадярскей, як и Войводина. А спомина ше у документох же Кузмяк бул и Духновичов особни приятель. Трима ше же тоти учителє и у настави хасновали Духновичову „Книжицю читалную для начинающих“. Конєчно, як доказ же нашо интелектуалци з початку 20. вику прилапели Духновича и як свойого националного будителя, служи и факт же 2. юлия 1919. року на Сновательней схадзки Руского народного просвитного дружтва, попри державней, шпивана и руска гимна на Духновичов текст „Я Русин былъ...“

Александер Духнович умар у Прешове 30. априла 1865. року, дзе є и поховани.

О значносци Александра Духновича

Духновича ше трима за єдного з найвизначнєйших русинских и українских гуманистох и педаґоґох. Иван Франко о нїм гварел "Вон зробел шицко же би забути Русини духовно ожили". Погляди Александра Духновича ше базовали на християнских принципох и идеалох.

Духнович брал активну учасц у русофилским руху. Та и теди кед писал на його локалним язику вон нє верел же то розлични язик (од русийского) и нє жадал одпочац зоз виробком односно стандардизованьом литературного язика за Руснацох. Место того вон писал свойо роботи на штучно витвореним язику хтори бул наволани язичиє а состоял ше зоз мишанїни русийского, церковнославянского и локалного лемковско-русинского язика.

Назви и памятнїки

Мено Александра Василєвича Духновича ношело наукове дружтво хторе робело и постояло до 1945. року. Нєшка Духновичово мено ноши Прешовски варошски театер.

Памятнїки Александрови Духновичови подзвигнути у Прешове (од благодарного карпаторусского народу 11. 06. 1933. року), у Хусту, Мукачове и Ужгородзе. У Мукачове єст улїчка хтора ноши мено А. Духновича.

Установена литерарна награда з його меном за досяги у розвою рускей литератури хтору додзелює Карпато-русински наукови центер у Ґласпорту (ЗАД).

Духновичово твори

Книжица читалная для начинающих. — Будин, 1847; Будин, 1850; Будинм, 1852;
Corpus Juris Canonici. — Прeшoв, 1847
История Пряшевской епархии (рукопис, в латинѣ). — Прешов, 1848.
Добродѣтель превысшает богатство. Театрални фалат у трох дїйох на народним язику... Перемишль, 1850.
Мѣсяцослов. — Прешов, 1850, 1851 (нє зачувани), 1853 (Перемишль), 1854 (Перемишль), 1857 (Львов), 1864 (Ужгород).
Поздравление Русинов на новый год 1850. Перемишль.
Поздравление Русинов на новый год 1851. Беч^[3].
Поздравление Русинов на год 1852. Будин.^[4]
Истинная история карпатороссов. — Прешов, 1853 (рукопис); перша публикация: Москва, часопис "Русский архив", 1914, №4, б. 528-559.
Сокращенная грамматика письменного русского языка. — Будин, 1853.
Народная педагогия... — Львов, 1857.
Краткий землепис для молодых Русинов. — Перемишль, 1851.
Литургический катехизис. — Будин, 1851.
Хлѣб души. — Будин, 1851; Львов, 1854; Перемишль, 1860 и 1864.

Литература

Александер Духнович и русинске питанє (половка числа пошвецена А. Духновичови) Studia Ruthenica, ч. 2/1990-1991, гласнїк Дружтва за руски язик и литературу, Нови Сад., б. 5- 72.