Ґабор Ґвожджак
| Ґабор Ґвожджак | |
|---|---|
| Народзени | 12. октобра 1824. |
| Умар | 21. септембра 1900. |
| Державянство | Угорске |
| Язик творох | руски, мадярски |
| Универзитет | Грекокатолїцка
семинария, Заґребе |
| Период твореня | 1845 - 1900 |
| Жанри | душпастирство,
державна управа |
| Поховани | у Кули |
Ґабор Ґвожджак (*12. октобер 1824 - †21. септембер 1900), священїк, официр, новтаруш, борец за ровноправносц Руснацох у Крижевским владичестве.
Биоґрафия
[ушориц | ушор жридло]Ґабор Ґвожджак, син священїка и познєйше керестурского пароха Янка Ґвожджака и мацери Ани, народзел ше у Коцуре 12. октобра 1824. року. Як семинариста грекокатолїцкей семинариї у Заґребе Ґабор Ґвожджак постал член Илирского дружтва, хторе основали семинаристи 1839. року. Медзитим, вон уж 1841. року вируцени з того дружтва "як процивнїк шицкого цо славянске". Участвовал активно у револуциї 1848. року як нїзши официр мадярского войска. Кед 1850. року священїк Янко Санич, котри до теди у Керестуре окончовад длужносц главного учителя у конфесийней школи, пошол з Керестура до Бачинцох за администратора парохиї, длужносц учителя понукнута Ґаброви Ґвожджакови, алє вон ю нє прилапел.
Борба за ровноправносц у владичестве
[ушориц | ушор жридло]Под час револуциї 1848—1849. року и вон єден спомедзи клерикох и священїкох Руснацох з Бачки хтори висшим державним и церковним власцом Угорскей указую на подредзене положене Руснацох у рамикох Крижевского владичества, дзе Горвати, гоч малочисленши вше на шицких найважнєйших функцийох. И познєйше, 80-тих рокох XIX вику, Ґабор Ґвожджак явно виношел тото свойо становаско, а 1891. року вон написал аж и меморандум банови Куенови Гедерварийови у хторим го обширно информує о обставинох у рамикох Крижевского владичества, дзе по його думаню Руснаци вше у нєровноправним положеню, бо Горвати, гоч у владичестве представяю лєм 1/3, а Руснаци 2/3 жительства, заш лєм найчастейше окончую шицки найважнєйши функциї у владичестве, а у алумнату семинариї у Загребе вше єст вельо вецей Горватох як Руснацох. Прето ше Ґабор Ґвожджак вше намагал, а медзи священїками Руснацами находзел и истодумнїкох, же би ше Руснаци у Бачки и Сриме одорвали од Крижевского владичества и приключели ґу даєдному грекокатолїцкому владичеству у Мадярскей, Мукачевскому або Пряшовскому.
Добротворна робота
[ушориц | ушор жридло]Ґабор Ґвожджак 1886. року основал три фондациї:
— І. Осемпроцентну камату од сто форинти за куповане мадярских кнїжкох за худобних школярох Руснацох, грекокатолїкох з Бачки, а о тим хто достане тоту помоц одлучує школски надзорнїк.
— II. Осемпроцентну камату од 500 форинти — за помоц худобним руским дзивком ("лада") — цо рочнє виноши 40 форинти. "Ладу" можу достац руски дзивки грекокатолїцкей вири з Бачки.
— III. Осемпроцентну камату од 100 форинти — фондация ремеселнїцкей школи у Червинки — достава тот цо найлєпши у ученю мадярского язика 5 форинти, а за найлєпше ремек-дїло достава ше 3 форинти.
Ґабор Ґвожджак 1890. року материялно потримал Михайла Врабеля у видаваню зборнїка писньох Русскій соловей — прето тота кнїжка и пошвецена "...Гавриїлу Ґвожджаку 1848-ого года ордовѣнчанному отечество охранительному оберлайтнанту, благосердному покровителю убогих русскихъ братевъ и пр."
Од 1862. року Ґабор Ґвожджак окончовал длужносц новтаруша у Керестуре, а познєйше длужносц судского вивершителя у Кули.
Участвовал 1897. року на конґресу Социялдемократскей партиї Угорскей у Будапешту. Познєйше бул познати як прихильник и як активиста тей странки, окреме у роботи медзи Руснацами у Кулским срезу. Пре тоту активносц полиция го нєпреривно провадзела.
Ґабор Ґвожджак умар 21. септембра 1900. року у Кули.
Литература
[ушориц | ушор жридло]- Тамаш, др Юлиян: Ґабор Ґвожджак, Руски Керестур, лїтопис и история (1745-1991), Месна заєднїца Руски Керестур, 1992, 394 бок .