Ярослава Кочиш–Микита
| Ярослава Кочиш Микита | |
|---|---|
 | |
| Народзена | 8. децембра 1948. |
| Умарла | 17. юлия 2019. (71) |
| Державянство | югославянске, сербске |
| Язик творох | руски |
| Школа | Штредня хемийно-поживова
школа, Вербас |
| Период твореня | 1964-2016 |
| Жанри | литература |
| Похована | у Руским Керестуре |
Ярослава Кочиш Микита (*8. децембер 1948. - †17. юлий 2019.)
Биоґрафия
[ушориц | ушор жридло]Ярослава Кочиш (Сеґешова) ше народзела у Руским Керестуре 8. децембра 1948. року. Оцец Яким и мац Ирина родз. Береґ. Ярослава мала старшого брата Якима. У родним валалє закончела основну школу, а штредню хемийно-поживову школу „Бошко Палковлєвич-Пинки“ закончела у Вербаше. Понеже у Керестуре нє було шлєбодни роботни места хемийно-поживового технїчара, вона такой по законченим школованю почала робиц як административни службенїк у Друкарнї „Руске слово“. Тоту роботу окончовала полни 15 роки, а кед у подприємстве пришло до реорґанизациї, вона ше преквалификовала и предлужела робиц як кнїжковязач у истим подприємстве полни 15 роки. Вец кратки час робела у Основней школи „Петро Кузмяк“ у Руским Керестуре, покля нє сполнєла условия за одход до пензиї.
Ярослава Кочиш була одата за Михайла Микиту. У малженстве мали двойо дзеци, Владимира и Терезку.
Поезия интими
[ушориц | ушор жридло]Ище як школярка, Ярослава ше представела и як талантована поетеса. Сотрудзовала у „Литературним слове“. У 1973. року у едициї „Жридла“ обявела єдину свою збирку писньох под насловом „Ноци бурйово“. Як и сама наглашела, вона нїґда нє писала тексти за компонованє, алє писала писнї преважно зоз лирским надихнуцом.
Єй поезия витворена у шлєбодним стиху, зоз спонатну риму, алє синтаксична ориєнтация зложенша и богатша, а то подрозумює и богатши интонацийни фрази. То би була файта реторичней поезиї, без огляду на формалне присуство шлєбодного стиху. У вкупним дожицу поезия Ярослави Кошиш-Микита остава у рамикох традицийней любовней поезиї у идиличним валалским штредку[1].
У єдней нагоди вона ше так споведала: Любов ґу писаному слову ше достава зоз родзеньом, чи тота особа то сце, лєбо нє. Дахто у себе ноши вельки дар, а дахто барз мали, алє и тот мали ше пита вонка зоз чловека, та и я так свой живот през стихи виписовала, споведала, допущовала словом най шпиваю свою мелодию. Як и другим младим видана ми перша кнїжочка, а надалєй сом през живот писала за “свою душу”. Жила сом живот звичайней жени, без даякей велькей кариєри у нашим милим валалє Керестуре.[2]
Композиторе ше инспировали зоз єй поезию и зложели музику на єй стихи. Зачувало ше з нїх нєвельке число. Композициї на єй тексти виводзени уж у першей децениї иснованя Фестивала Червена ружа, а предлужени су и у пиятей.
Ярослава Кочиш-Микита умарла 17. юлия 2019. року. Похована є на теметове у Руским Керестуре.
Библиоґрафия
[ушориц | ушор жридло]Ярослава Кочиш-Микита: Ноци бурйово, "Руске слово", Нови Сад, 1973.
Тексти за композициї
[ушориц | ушор жридло]| ТЕКСТИ ПИСНЬОХ | ||
|---|---|---|
Червена ружа
| ||
| Рок | У забавним духу | Автор музики |
| 1975. | За тебе | Яким Сивч |
| 1976. | Тей ноци | Яким Сивч |
| 1989. | У очох белавих | Славка Варґа-Пап |
| 1990. | Рано | Славка Варґа-Пап |
| 1996. | Придзеш у сну | Звонимир Кочиш |
| 1997. | З тобу | Звонимир Кочиш |
Ружова заградка
| ||
| 1999. | Рика живота | Звонимир Кочиш |
Литература
[ушориц | ушор жридло]- Јулијан Тамаш: Русинска књижевност, Јарослава Кочиш-Микита, Матица српска, 1984, б. 313.
Вонкашнї вязи
[ушориц | ушор жридло]- Ярослава Кочиш-Микита (биоґрафия и список композицийох), Червена ружа 1962-2011, Том II, Завод за културу войводянских Руснацох, Нови Сад, 2014., б. 508.