Силвестер Такач


Силвестер Такач

Особни податки
Мено и презвиско Назвиско Датум родзеня Место родзеня Позиция	Силвестер Такач Таки 8. новембер1940. Дюрдьов, Кральовина Югославия Нападач
Юниорска кариєра
Войводина
Сениорска кариєра
Роки 1958–1967 1966–1969 1969–1974	Клуб Войводина Рен Стандард Лиєж	Наступи 182 85 111	(Ґоли) (62) (37) (44)
Репрезентативна кариєра
1960–1966	Югославия	15	(2)
Тренерска кариєра
1975–1978 1979–1982 1982–1984 1984–1985 1986 1987–1994 1996–1997 1998 2001 2001–2002	ДЙК Констанц Лиєж Келн (помоцнїк) Сошо Расинґ Париз Сошо Ница Ница Раджа Казабланка Сфаксиен

Силвестер Такач (Дюрдьов, 8. новембер 1940), бувши спортиста, югославянски и войводянски фодбалер и фодбалски тренер

Кариєра

Бавяцка

Силвестер Такач народзени у Дюрдьове, 8. новембер 1940. року у худобней рускей фамелиї як єдно спомедзи дзевецерих дзецох. Родичи оцец и мац . Оцец настрадал у фашистичней рациї 1942, а хорйовита мац умарла такой после войни.

Силвестер мал 5 роки кед ше фамелия преселєла до Нового Саду дзе закончел основну школу и виучел за скравца. Познєйше дипломовал на Висшей економскей школи.

Уж як школяр основней школи Силвестер указовал вельке интересованє за фодбал та нєодлуга прейґ бавискох на пажицох зоз своїма парняками вон сцигнул до юниорского тиму ФК Войводина. Його квалитети як бавяча обачели фаховци Войводини за роботу з дзецми Миливой Дракулич и Франя Хирман, хтори го нєодлуга поставели и за капитена талантованей младей екипи хтора победзовала скоро шицких процивнїкох на медзинародних змаганьох. Од 1954. по 1958. рок подмладок Войводини з капитеном Такачом освойовал републични и союзни змаганя, а пре добре бависко Силвестер Такач двараз наступал за юниорску репрезентацию и раз за младу репрезентацию Югославиї^[1].

Потим Силвестер Такач наступал за сениорску екипу Войводини за хтору одбавел 426 официйни змаганя и посцигнул 245 ґоли, з чого у першенстве 182 змаганя зоз 62 ґолами. За репрезентацию Югославиї Силвестер Такач наступел на 15 змаганьох и посцигнул 2 ґоли. Бул член репрезентациї и на Олимпийских бавискох у Риме 1960. року кед освоєли златну медалю, и у Япону 1964. року.

Такач зоз бавячами Войводини у сезони 1965/66. освоєл першу шампионску титулу за ФК Войводина. Праве вон бул єден спомедзи найзаслужнєйших за тот триюмф, тей сезони одбавел шицки 30 змаганя и посцигнул 13 ґоли з чим бул найефикаснєйши бавяч у тиме. Теди Силвестер Такач, зоз своїм позарядовим бависком у нападу червено-билих постал, вєдно зоз ґолманом Илийом Пантеличом, найпопуларнєйши фодбалер Нового Саду а потим и цалей жеми. Наступней сезони ше ище баржей преславел з одличним бависком у Купу европских шампионох кед Войводина сцигла по штварцину финала а вон бул найлєпши бавяч тима з посцигнутима штирома ґолами. Теди Силвестер Такач прицагнул увагу иножемних менаджерих на себе и после драматичней майсторици процив Атлетика з Мадриду у осмини финала, кед Войводина праве зоз Такачовим ґолом у предлуженьох змаганя прешла далєй, вон свою кариєру предлужел у иножемстве. На початку 1967. року прешол бавиц до французкого Рену та препущел двомеч зоз Селтиком у штвартини финала, дзе Войводина випадла кед Селтик у реванш мечу посцигнул ґол у другей минути першого предлуженя и зоз 2:0 прешол далєй, после резултата 1:0 за Войводину у першим змаганю, а познєйше Селтик постал шампион Европи.

Зоз пенєжом хтори бул достати за Такачов трансфер до французкого Рену новосадянє на стадиону Войводина вибудовали и намесцели рефлектори та уж змаганє процив Селтика у Купу европских шампионох одбавели под штучним ошвиценьом.

Свойо позарядови людски квалитети, найвисше фодбалске майсторство як бавяча а потим и як тренера, Силвестер Такач потвердзел зоз богату кариєру у иножемстве.

У Рену Силвестер Такач бавел од 1966. по 1969. рок и там у двох и пол сезонох одбавел 85 першенствени змаганя и посцигнул 37 ґоли. 1969. року Такач прешол до белґийского Стандарду зоз Лиєжу дзе бавел наступни 5 роки и там 1974. року закончел кариєру бавяча. Зоз Стандардом бул двараз єдно за другим шампион Белґиї (1970, 1971) и два раз финалиста Купа, а тиж зоз 5 посцигнутима ґолами у Купу европских шампионох и сезони 1971/1972. дзелєл место найлєпшого бавяча зоз ище двома фодбалерами. Ище док активно бавел Силвестер Такач закончел фодбалску школу Сепа Херберґера и здобул диплому тренера, а потим и диплому професионалного инструктора фодбала.

Тренерска

Тренерску кариєру Силвестер Такач почал 1975. року и менєй познатим нємецким клубу ДЙК Констанца, дзе остал по 1978. рок. Потим вон од 1979. по 1982. рок водзел белґийски Лиєж, а од 1982. по 1984. рок бул помоцнїк тренера у Келну. У сезони 1984/85. Такач водзел Сошо, 1986. кратко бул тренер Расинґа зоз Паризу, а 1987. ше враца до Сошоу хтри скорей його приходу випаднул до Другей лиґи. Силвестер Такач уж у першей сезони (1987/88) завжал перше место у Другей лиґи и врацел Сошо до Першей лиґи, а у истей сезони сцигнул и до финала Купа Французкей, дзе Сошо страцел на пенали. Наступни два сезони вон зоз Сошоом завжал штварте место у Першей лиґи, а клуб бавел и УЕФА куп. 1994. зиходзи зоз тренерскей позициї у Сошоу, после вкупно седем и пол сезонох препровадзених у клубу. 1996. року Такач постал тренер Ници зоз хтору у сезони 1996/97. освоєл Куп Французкей алє клуб истей тей сезони випаднул до Другей лиґи та вон на концу сезони зменєти. До Ници ше ознова врацел 1998, алє ше там кратко затримал.

До Мароку одходзи 2001. дзе постал тренер шампиона Раджа Казабланки. Истого року преходзи до туниского Сфаксиен, дзе 2002. року закончує тренерску кариєру.

Зоз Келном Силвестер Такач бул побиднїк Купа Нємецкей, два раз бул финалиста Купа Французкей, шампион Марока, а 1997. вон, кед освоєл Куп Французкей зоз екипу Ници, приял погар и винчованки особнє з рукох предсидателя Французкей Жака Ширака.

Репрезентация

Силвестер Такач наступал два раз за юниорску репрезентацию и раз за младу репрезентацию Югославиї.

За сениорску репрезентацию Югославиї вон дебитовал 10. априла 1960. року у змаганю квалификацийох за Олимпийски бависка зоз репрезентацию Израїлу (1:2) у Беоґрадзе.

Бул член югославянскей репрезентациї на Олимпийских бавискох 1960. року у Риме, кед освоєна златна медаля, а тиж так и на Олимпийских бавискох 1964. року у Токию.

Остатнї фодбалски меч у дресу Югославиї одбавел 18. септембра 1966. у приятельским змаганю зоз репрезентацию Совєтского Союзу (1:2) у Беоґрадзе. За репрезентацию Югославиї одбавел 15 змаганя, з двома посцигнутима ґолами.

Резултати його бавискох у клубох

Першенствени змаганя Силвестера Такача у клубох у хторих бавел:


Сезона	Клуб	Наступи	Ґоли
1958/59.	Войводина	10	4
1959/60.	Войводина	19	18
1960/61.	Войводина	20	3
1961/62.	Войводина	20	5
1962/63.	Войводина	24	10
1963/64.	Войводина	18	5
1964/65.	Войводина	26	5
1965/66.	Войводина	30	13
1966/67.	Войводина	15	9
1966/67.	Рен	18	9
1967/68.	Рен	35	15
1968/69.	Рен	32	13
1969/70.	Стандард Лиєж	30	12
1970/71.	Стандард Лиєж	23	9
1971/72.	Стандард Лиєж	25	12
1972/73.	Стандард Лиєж	25	8
1973/74.	Стандард Лиєж	8	3
Вкупно		378	143