Силвестер Саламон

Силвестер Саламон
Народзени	5. авґуста 1912.
Умар	21. януара 1988. (76)
Державянство	австроугорске, югославянске, америцке
Язик творох	руски, горватски, українски, анґлийски
Школа	Класична ґимназия, Заґреб
Период твореня	1925—1988.
Поховани	у Лос Андєлесу, ЗАД

Силвестер Саламон (*5. авґуста 1912—†21. януара 1988), священїк, поет, приповедач, есеїст и литературни критичар.

Биоґрафия

Силвестер Саламон ше народзел 5. авґуста 1912. року у Беркасове, општина Шид, у худобней селянскей фамилиї. Основну школу започал у Шидзе, а закончел у Беркасове. Уж теди є замерковани як вредни и талантовани и препоручени на предлуженє школованя у нашей Семинариї у Заґребе. Медзитим, док отамаль согласносц нє сцигла, Силвестер ше уписла до Гражданскей школи у Шидзе. Ту закончел першу класу и започал ходзиц до другей. Теди сцигла согласносц зоз Заґребу, та предлужел школованє у Другей класичней ґимназиї (1925-1932), а богословски студиї започал у Львове (1933-1935), а закончел у Заґребе 1937. року.

Оженєл ше зоз Українку Марию Софию Иванчук, зоз котру мал осмеро дзедзи, спомедзи котрих штверо остали живи, а штверо поховани у Беркасове.

За священїка Силвестер Саламон бул пошвецени 11. априла 1937. року у месце Радово (Македония). Перше место службованя му були Ґосподїнци (1937-1938), потим Каменица при Баня Луки, Козарац (при Прняворе, Босна), а потим у Беркасове (1943-1953), по одход до ЗАД 2. новембра 1953. року. И там о. Силвестер Саламон предлужел свою священїцку службу аж по одход до пензиї. Остатнї дзешец роки живота вон препровадзел у Лос Андєлесу.

Умар 21. януара 1988. року у Барбенку (Калифорния). О. Силвестер Саламон поховани у Лос Андєлесу 25. януара истого року.

Литературна творчосц

Силвестер Саламон єден з ридких руских писательох цо ше доказали у вецей литературних жанрох. Попри тим, под час школованя у Заґребе вон бул активни член Союзу руских школярох, а єден час и член його руководительства. Єден час видавал Неперіодичний журнал ДУМКА (1936-1937) и бул його власнїк и главни и одвичательни редактор, а заменїк му бул Владимир Пап, на чиєй адреси була и Редакция.

Силвестер Саламон почал писац 1925. року. Перше по горватски, а вец по руски. Бул стаємни сотруднїк Руских новинох и Руских календарох, дзе почал обявйовац и свойо перши литературни твори. У рускей литератури Силвестер Саламон ше зявел зоз приповедку Роботнїк Милков 1929. року. Интензивни период публикованя (1932-1936) представя час кед пребува у Львове на студийох и контактує зоз др Гавриїлом Костельником. Там вон свойо роботи обявйовал и у часописох Нива и Дзвони. Свою першу кнїжку Нашим дзецом обявел 1936. року, а заступени є зоз пейцома приповедками и у Алманаху бачванско-сримских писательох, котри видруковани истого року.

У ЗАД о. Силвестер Саламон видавал о власним трошку, на циклостилу, на даскельо заводи, власни литературни твори на руским, українским и английским язику. То твори котри вжал зоз собу кед ше преселєл до Америки. Векшина з нїх у нас обявени у периодзе медзи двома шветовима войнами. Нови твори о. Силвестер Саламон почал писац у периодзе од 1965, особлїво после запровадзеного контакту зоз редакцию обновеного часопису Шветлосц. НВУ Руске слово му обявело у двох томох вибрани твори, єден з обласци поезиї и єден зоз прози.

Литература

• Дюра Папгаргаї. Силвестер Саламон (1912-1988), Народни календар 1989, НВУ Руске слово, Нови Сад, 1988, б. 239-240.
• Др Юлиян Тамаш. История рускей литератури, Завод за уџбенике и наставна средства – Београд, 1997, б. 109-117 и 606-608.
• Юлиян Тамаш. Литературна творчосц Силвестера Саламона, Силвестер Саламон: Вибрани твори І, писнї, НВУ Руске слово Нови Сад, 1988, б. 7-42.
• Юлиян Тамаш. Литературна творчосц Силвестера Саламона, Шветлосц ч. 6/1979, б. 657-669.
• о. проф. др Роман Миз. Священїки дакедишнього Осєцкого викарията, Видавателє Парохия св. ап. Петра и Павла, Нови Сад и Максима, друкарня и видавательна хижа, Петроварадин, 2016, б. 279-282.
• Дюра Латяк. Руски студенти и стредньошколци (1927-2001), орґанизована дїялносц; Думки з Дунаю 13-14, Лїтопис Союзу Русинох и Українцох Републики Горватскей, Вуковар, 2012, б. 171-268.
• Paul Robert Magocsi. Salamon, Silvester. in Paul Robert Magocsi, Ivan Pop. //Encyclopedia of Rusyn History and Culture (Revised and expanded ed.). Toronto Buffalo London: University of Toronto Press, 2005. p. 446. doi:10.3138/9781442674431. ISBN 0-8020-3566-3.англ.

Вонкашнї вязи

• Силвестер Саламон, Писнї, 1973, вебсайт Заводу за културу войводянских Руснацох, Нови Сад (ПДФ файл)

• Янко Рамач РУСКЕ НАРОДНЕ ПРОСВИТНЕ ДРУЖТВО – ПЛАТФОРМА, ДЇЛОВАНЄ И ЗДОБУТКИ, ЛЕМКИ, БОЙКИ, ГУЦУЛИ, РУСИНИ – ИСТОРИЯ, СУЧАСНОСЦ, МАТЕРИЯЛНА И ДУХОВНА КУЛТУРА ЗБОРНЇК НАУКОВИХ РОБОТОХ, Видавателє Универзитет у Новим Садзе Филозофски факултет и Akademia Pomorska w Słupsku, Нови Сад – Słupsk 2019. о Силвестерови Саламонови на б. 18 (ПДФ файл)
• Силвестер Саламон, rue.wikipedia.org, Вікіпедія, інтернетова енціклопедія, 2. авґуста 2022, Igor Kercsa
• Wikiwand.com Народзели ше: Силвестер Саламон, священик и поет з войводинскых Русинох