Руске народне просвитне дружтво
| РУСКЕ НАРОДНЕ ПРОСВИТНЕ ДРУЖТВО | |
|---|---|
| Скрацена назва | РНПД |
| Локация | Кральовина Югославия |
| Шедзиско | Руски Керестур |
| Предсидатель | монсиньор о. Михайло Мудри |
| Датум гашеня | у априлу 1941. року |
Руске народне просвитне дружтво
По зaконченю Першей шветовей войни приходзи до розпaдaня Aвсто–Угорскей Монaрхиї и приключовaня Войводини ґу Сербиї, односно Крaльовини Сербох, Горвaтох и Словенцох. Зa нaш нaрод то бул час ствaрянє вигоднєйших условийох зa сновaнє єдней центрaлней нaционaлней институциї котрa би водзелa стaросц о обрaзовним и културно-просвитним живоце Руснaцох у новей держaви.
О. Дюра Биндас, поучени з искуством керестурского кaтехети, кед єдини нa мaцеринским язику учел керестурских школярох по руски нє лєм виронaуку aлє и коляди и пририхтовaл теaтрaлни слички, прихильнїк просвищовaня и обєдиньовaня Руснaцох попри вирского и нa културним полю – рушел тaкой до aкциї и написал отворене писмо рускей интелиґенциї хтору поволал нa сновaнє єдинственей рускей орґaнизaциї. Резултaт його aкциї то сновaнє Руского нaродного просвитного дружтвa у глaвним варошу Войводини, у Новим Сaдзе, у сaли Мaґистрaту, дзе ше зишли предстaвнїки зоз шицких руских местох Бaчкей и Сриму. Нa тим нaйвисшим и нaйзнaчнєйшим руским сходзе постaвени фундaменти будуцого нaционaлного и културного розвою Руснацох.
Руске народне просвитне дружтво (РНПД) основане 2. юлия 1919. року у Новим Садзе.
Тота подїя ше учишлює до шора найзначнєйших рочнїцох и датумох хтори означели вкупни национални и културни живот Руснацох од приселєня по нєшка. Писац и бешедовац о периодзе кед Руске народне просвитне дружтво интензивно робело, значи здогадовац ше шицкого того цо воно як културни здобуток принєсло и як духовни ориєнтир зохабело Руснацом и научело чувац националне єство.
Зоз снованьом Руского народного просвитного дружтва (РНПД), познатого и як Просвита, Руснаци Бачкей и Сриму достали свою першу културно-просвитну орґанизацию у рамикох хторей могли витворйовац свойо активносци у обласци просвити, язика и култури и пестовац национално-културни идентитет на тих просторох. Його основни циль бул „же би ше обявйовало и дистрибуовало вирски, воспитни и забавни кнїжки и брошури, як и руски новинки писани на народним руским язику”.
Гоч дзепоєдни водзаци прихильнїки тримали Руснацох/войводянских Русинох за конар українскей националносци, Руске народне просвитне дружтво прилапело предклад свойого першого предсидателя (1919-1936), Михайла Мудрого, хтори поволал на “творенє литератури на язику на хторим народ бешедує”. Так же уж на сновательней схадзки РНПД 2. юлия 1919. року принєшена резолуция котра була значна нє лєм за дїйствованє и роботу того Дружтва, алє и за шицких Руснацох хторих воно обєдиньовало. Слово о резолуциї зоз хтору ше РНПД опредзелєло за бешедни язик бачванско-сримских Руснацох як язик на хторим ше будзе розвивац култура, просвита, литература, информованє и други обласци културней окремносци Руснацох на тих просторох и того поднєбя.
Руководство РНПД
[ушориц | ушор жридло]У Новим Садзе, 2. юлия 1919. року до руководства и одбору новооснованого Руского народного просвитного дружтва (РНПД) вибрани шлїдуюци особи:
предсидатель: монсиньор о. Михал Мудри, парох у Руским Керестуре;
подпредсидателє: о. Дюра Биндас, парох у Дюрдьове и Емил Ґубаш, учитель-дзияк у Коцуре;
секретаре: Михаил Поливка, директор школи у Руским Керестуре и о. Юрай Павич, капелан у Руским Керестуре;
касире: Михал Шимко, ґазда у Руским Керестуре и Петро Колєсар, тарґовец-качмар, у Коцуре;
До ширшого одбору вибрани представнїки зоз шицких руских валалох:
Руски Керестур: Янко Малацко, Михал Колошняй, Янко Гафич и Дюра Шимко
Коцур: Дюра Шанта, Дюра Шарик и Михал Стрибер
Вербас: о. Александер Абодич и Богумил Контра
Дюрдьов: Грицо Михняк и Михал Балїнт
Нови Сад: о. Йован Хранилович и Дюра Колєсар
Бачинци: о. Цирил Дрогобецки и Михал Папуґa
Сримска Митровица: Янко Страценски и Янко Лабош
Шид: о. Дюра Бесерминьски и Емил Яким
Беркасово: Осиф Ґубаш и Янко Лусканци
Бикич Дол: Янко Страценски
Миклошевци: Дюра Орос и Яким Костелник
Петровци: о. Спиридон Петранович и Антон Штефанчик
Райове Село: о. Михал Гирйовати и Штефан Кашовски
Пишкуревци: о. Павел Ґвозданович и Янко Сивч
Видавательна и информативна дїялносц
[ушориц | ушор жридло]РНПД обявело за руски школи Читанку (1920) Михайла Поливки и Буквар (1921) Михайла Мудрого и Михаила Поливки. Други публикациї Дружтва: литературни твори Ґабра Костельника и Янка Фейси, зборнїк народних шпиванкох (1927), перши литературни алманах войводянских Русинох (1936), даскельо грекокатолїцки церковни кнїжки, перши руски рочни календар (Руски календар за южнославянских Русинох, 1921-41), тижньово новини (Руски новини, 1924-41) и дзецински часопис (Наша заградка, 1937-1941).
Руске народне просвитне дружтво Просвита материялно помагали месна руска интелиґенция, маєтнєйши парасти и окреме грекокатолїцка церква. Як и перши предсидатель, и други (1936-1941), Дюра Биндас, бул грекокатолїцки священїк. Шедзиско Дружтва було у Руским Керестуре, дзе воно 1932. року купело єден будинок за Просвитни дом и 1936. року у нїм отворело друкарню.
През два децениї (двацец два роки, 1919-1941) свойого дїйствованя Руске народне просвитне дружтво, як перша наша руска културно-просвитна орґанизация, преходзело през вецей периоди и спокуси, алє остало на своїм главним опредзелєню яке зарисоване на сновательней схадзки, а то: „зачувац народни характер Русинох и пестовац, розвивац и розпространяц руску народну просвиту, и у културних вопростох вшадзи заступац интерес южних Русинох”.
Руснаци на таких опредзелєнох остали по нєшкайши днї, а то на найлєпши способ гутори же руководсто и делеґати РНПД того 1919. року були на правдивей драги.
Робота РНПД Просвити ше закончела зоз розпадом Югославиї вяри 1941. року и зоз реанектованьом Войводини ґу Мадярскей.
Литература
[ушориц | ушор жридло]- Роман Миз, Конститутивна и главни рочни схадзки `Просвити` у Думки з Дунаю, I (Вуковар, 1989), 91-113;
- Дюра Варґа, Початки национално-културного руху при Руснацох у Югославиї – 70-рочнїца Руского народного просвитного дружтва, Шветлосц, XXVII (Нови Сад, 1989), 509-540;
- Дюра Латяк, Видавательна дїялносц Руского народного просвитного дружтва, 1919-1941, Studia Ruthenica, II (Нови Сад, 1990-91), 126-133;
- Дюра Гарди, Становиска и политични ориєнтациї РНПД спрам Кральовини СГС (Югославиї) и єй политичного живота, у Руснаци/Русини, 1945-1995 (Нови Сад, 1996), 215-231.
Вонкашнї вязи
[ушориц | ушор жридло]- Мирон Жирош: Дїйствованє Руского народного просвитного дружтва, вебсайт Руснаци у Панониї
- Руски календар 1922. Руски Керестур: Руске народне просвитне држтво.
- Руски календар 1923. Руски Керестур: Руско народно просветитељско друштво.