Ремеселнїцтво у Коцуре (1763—1828)

До Коцура Руснаци приселюю у 1763. и 1764. року и сную руски Коцур. О тим шведочи окремни попис руского жительства зоз 1764. року, котри оверює биров Руснак Иштван Штефан. З 1764. року єст и попис сербского жительства котри подписує биров Серб Иван Миятович. По попису жительох Коцура 1764. року медзи Руснацами нєт майстрох, а медзи сербским жительством єст седем майстрове.

У єдинственим попису жительох Коцура 1765. року записани шицкого пейцме майстрове и то троме Руснаци (колєсар, скравец и чижмар) и двоме Серби (ковалє). По попису маєтного стану коцурского жительства зоз 1789. року у валалє єст сувачи, так же єст шейсцох млїнарох.

Тарґовцох було двох (хлоп и жена).

Цеховска привилеґия достата 1827. року, на молбу коцурских ремеселнїкох: чижмарох, ковальох, кушнїрох, дундєрох, столарох, скравцох, штранґарох и миделкарох. Рок познєйше их було менєй, бо по Державним попису зоз 1828. року у Коцуре записани лєм шейсц ремесла (млїнарске, ковальске, столарске, колєсарске, гарчкарске и ткачске), нє було скравцох, кушнїрох, дундєрох, штранґарох и миделкарох.

По попису порцийних обовязнїкох у Коцуре 1828. року було 34 майстрох и двоме тарґовци. Од майстрох, штернац млїнаре робели цали рок, седем чижмаре (єден робел през цали рок, троме по пол рока и троме по три мешаци), осемцме ковалє (троме робели през цали рок, а други од три по шейсц мешаци), єден гарчкар и ткач, котри робели лєм по три мешаци рочнє.

У часу снованє цеха у Коцуре було 34 майстрох и шицкого шейсц ремесла-фахи:

штернац млїнаре, троме Нємци
двома колєсаре
осемцме ковалє, двоме Нємци
осемцме чижмаре, двоме Нємци
єден гарчкар, Нємец
єден ткач, Нємец

Од 34 майстрох и двох тарґовцох, национални состав майстрох бул шлїдуюци:

21 майстор Руснак
9 майстрове Нємци
3 троме майстрове Мадяре
1 майстор Серб
1 тарґовец Серб
1 тарґовец Жид

Руснаци мали лєм штири ремесла, були млїнаре, ковалє, колєсаре и чижмаре.

Литература

Мирон Жирош, БАЧВАНСКО – СРИМСКИ РУСНАЦИ, ДОМА И У ШВЕЦЕ 1745—2001, IV TOM (2004), боки 32—40