Над
| Над
(метолка з нашенями) | |
|---|---|
 | |
| Наукова класификация | |
| Царство: | Plantae |
| Дивизия: | Magnoliophyta |
| Класа: | Liliopsida |
| Ряд: | Poales |
| Фамилия: | Poaceae |
| Подфамилия: | Arundinoideae |
| Племе: | Arundineae |
| Род: | Phragmites |
| Биномне мено | |
Phragmites australis
(Cav.) Trin. ex Steud. | |
| Синоними | |
| Arundo phragmites L.
Phragmites communis Trin. Phragmites longivalvis Phragmites vulgaris | |
Над (лат. Phragmites australis) то файта вецейрочних лїсцастих рошлїнох з фамелиї травох.[1] Рошнє бокорасто по влажних и водових пребувалїскох умерених и тропских предїлох. То єдина файта у роду Phragmites,[2] гоч постоя усиловносци же би ше одредзени популациї описали як окремни файти.
Опис
[ушориц | ушор жридло]Стебла наду високи 2–6 m, з лїсцами длужини 20–50 cm и ширини 2–3 cm. На верху стебла находза ше квети– густи метолки цмо лиловей фарби, длужини по 50 cm.
Бокори наду ше можу пресцерац на поверхносцох вельких и по єден квадратни километер. У вигодних условийох животного штредку, поверхносц з надом ше може шириц и по 5 m рочнє.
Над барз аґресивна и инвазивна рошлїна, розпространєта є у Европи алє и у америцких реґионох та и Австралиї як и на других дестинацийох у швеце.[3] Постоя докази о тей аутохтоней рошлїни у Сиверней Америки о постояню и пред европску колонизацию континента.[4]
Хаснованє
[ушориц | ушор жридло]Околїско хторе було подводне и влажне и мало около населєня долїни и бари, у тих долїнох роснул над хтори ше швидко з рока на рок ширел. Дакеди ше над кед го було коло валалу на водових поверхносцох орезовал при сподку и хасновал за рижни наменки:
- Правели ше огради зоз наду, напр. оградзовало ше од сушеда, або оградзовал ше заднї двор зоз зграду,
- Обични над бул примарна замена место слами за традицийни кровни закрица при велїх народох у Европи и ширше. Єден длугши час док ше нє зявел череп и закриванє крова з черепом, хижи ше закривали зоз надом.
- У нєдостатку другей огриви, людзе до руского пеца топели и зоз надом.
- Над ше похасновал и як будовательни материял у обисцу за помоцни обєкти (курнїки, менши шопки итд.), так же ше го даяк позлучовало-повязало и вец оляпковало зоз блатом.
- Ґаздинї з надових метолкох правели метолки за ометанє паучини а и заметанє просторийох.
- Над ше барз хасновал у фитодепурациї, односно за природни системи за пречисцованє води, прето же кореньово жилки и влакна наду одлични за филтрированє нєчистоти у отпадних водох.
- Тиж ше указує як добри потенциял жридла за биомасу.
- Без оглядиу на сучасносц, кед нова технолоґия допринєсла и понука велї продукти и артикли за обисце (череп або рижни плехи за закрице, огради, рижни метли зоз вшелїяких материялох), над ше ище вше хаснує алє на модернєйши способ и мож вельо койчого направеного зоз наду найсц у адекватних предавальньох.
Вонкашнї вязи
[ушориц | ушор жридло]
Референци
[ушориц | ушор жридло]- ↑ Трска sr.wikipedia.org
- ↑ Kew World Checklist of Selected Plant Families
- ↑ "Common Reed". www.invasivespeciesinfo.gov. National Invasive Species Information Center | USDA. Retrieved 22 July 2020.
- ↑ Catling, P.M.; Mitrow, G.l. (2011). "Major invasive alien plants of natural habitats in Canada. 1. European Common Reed (often just called Phragmites), Phragmites australis (Cav.) Trin. ex Steud. subsp. australis". CBA Bulletin. 44 (2): 52–61.