Михайло Тамаш
| Михайло Тамаш | |
|---|---|
 | |
| Народзени | 18. септембра 1939. |
| Умар | 24. новембра 2022 (83) |
| Державянство | югославянске, сербске |
| Язик творох | руски |
| Школа | штредня фахова школа Кула и Вербас |
| Период твореня | 1965—2011. |
| Жанри | народни шпиванки, компонована музика, хорска музика |
| Поховани | на теметове у Вербаше |
Михайло Тамаш (*18. септембер 1939—†24. новембер 2022), вельорочни културни дїяч у Вербаше и интерпретатор рускей шпиванки.
Биоґрафия
[ушориц | ушор жридло]Михайло Тамаш народзени 18. септембра 1939. року у Коцуре. Оцец Тамаш Михайло и мац Юстина родз. Шофран. Михайло мал старшого брата Любомира и младшу шестру Серафину. Основну школу Михайло закончел у Коцуре а штреднє образованє здобул у Кули и Вербаше. Од 1965. року Михайло Тамаш робел у Вербаше дзе єден час бул директор подприємства Комуналац.
Анґажованє у култури
[ушориц | ушор жридло]Михайло Тамаш од малючка полюбел руски музични скарб и пробовал нашо музичне благо промововац през шпиванє. Мижо, як го найблїзши наволовали, шпивал у хору хтори водзел о. Владимир Тимко, ту научел основи и технїку шпиваня, а вец од 1972. року Михайло Тамаш почал шпивац у дуету зоз свою супругу Славку. Їх наступи на фестивалох и шветочних програмох були вше барз крашнє прилапени з боку публики прето же ше їх гласи крашнє складали, кажду шпиванку темельно увежбовали и їх шпивацки точки мали окремни квалитет.
Кед ше хор у Вербаше розишол Михайло Тамаш ходзел 15 роки шпивац у хору у Руским Керестуре, без шпиванки нє могол. Вєдно зоз супругу, шпиваюци у вецей хорох, препутовали цалу бувшу Югославию як и вецей европски жеми. У тим периодзе вони як дует зняли вецей шпиванки за музичну архиву Радио Нового Саду а тиж так и за тедишню ТВ Нови Сад.
Кед ше почало будовац дом КПД Карпати у Вербаше Михайло Тамаш бул медзи першима цо даровали свою добродзечну роботу та каждодньово робел з майстрами на вибудови. Кед ожила робота КПД Карпати Михайло Тамаш коло 20 роки шпивал у хору, у дуету зоз свою супругу и у хлопскей шпивацкей ґрупи. По конєц живота бул зоз супругу поряднє у тим дружтве на рижних пробох. Михайло Тамаш за вкупне доприношенє у роботи КПД бул добитнїк Плакети КПД Карпати 2016. року.
Вирни остал ФК Искра
[ушориц | ушор жридло]Михайло Тамаш бул активни бавяч ФК Искра зоз Коцура, а по законченю бавяцкей кариєри остал вирни навияч и нє препущел такповесц анї єдно змаганє коцурского фодбалского клуба.
Михайло Тамаш зоз супругу Славку, родз. Сабадош, мал двойнята, двох синох, Ивицу и Сашу.
Михайло Тамаш умар 24. новембра 2022. року у Вербаше. Поховани є на варошским теметове.
Литература
[ушориц | ушор жридло]- Моноґрафия Руснаци у Вербаше
- Михайло Тамаш (1939-2022), новини Руске слово, 2. децембер 2022.
Вонкашнї вязи
[ушориц | ушор жридло]- Промоция кнїжки Руснаци у Вербаше - Рутенпрес, 19. януар 2015.
Михайло и Славка Тамаш (ТВ Войводина) - Отримана Рочна скупштина КПД Карпати, Рутенпрес, 13. май 2016.
- Дует Михал и Славка Тамаш, РускаТюб, Руски шпиванки
Так шпива Михайло Тамаш
[ушориц | ушор жридло]♦ Пахняца ружа - Михал и Славка Тамаш, канал Маковчань, Ютюб, 29. април 2011.
♦ Там на гори - Михал и Славка Тамаш, канал Маковчань, Ютюб, 11. марец, 2018.
♦ Винчованка родичом – Михал Иван и Михал Тамаш, канал Маковчань, Ютюб, 28, марец 2015.
♦ Вирнїк писнї - Михал Тамаш и Михал Иван, канал Дзива дзивка, Ютюб, 28. юний 2011.