Мирон Лазор
| Др Мирон Лазор | |
|---|---|
 | |
| Датум народзеня | 9. априла 1929. |
| Датум шмерци | 3. авґуста 2002. |
| Державянство | югославянске |
| Язик творох | руски, сербски |
| Школа | Штредня польопривредна
школа, Вербас |
| Универзитет | Польопривредни факултет, Земун |
| Период твореня | 1947—1990. |
| Жанри | поживове инженєрство,
технолоґия статковей покарми |
| Поховани | на Городским теметове
у Новим Садзе |
Др Мирон Лазор (*9. април 1929—†3. авґуст 2002), єден з наукових преднякох у Заводзе за технолоґию статковей покарми, наукови совитнїк на Технолоґийним факултету у Новим Садзе.
Биоґрафия
[ушориц | ушор жридло]Мирона Лазор народзени 9. априла 1929. року у Бикич Долу. Оцец Емил и мац Олґа народзена Крайцар. Мирон мал шестру Леону. Перши штири класи основней школи закончел у Привиней ґлави при Шидзе, державну реалну ґимназию у Вуковаре, а штредню польопривредну школу закончел 1947. року у Вербаше.
Мирон Лазор мал у малженстве зоз супругу Анку двойо дзеци, сина Владимира и дзивку Верицу.
Спрам планского розподзелєня и розказу тедишнїх державних власцох Мирон Лазор по 1951. рок робел у вецей войводянских местох, накратко и у Министерстве у Беоґрадзе, а вец ше предлужел школовац. Польопривредни факултет у Земунє, винїцарско-овоцарски напрям Мирон Лазор закончел 1955. року. Такой по дипломованю вон прешол робиц до комбинату Серво Михаль у Зренянину. Там робел як фаховец на руководзацих функцийох, а 1966. року отамаль пошол зоз функциї технїчного директора Комбината.
Ище под час роботи у Комбинату Серво Михаль Мирон Лазор вше баржей уходзел до швета науки. Вон мал одредзени визиї та прето бул єден зоз сновательох тедишнього Югославянского института поживового инженєрства и єден з наукових преднякох у Заводзе за технолоґию статковей покарми на Институту, обидва були основани 1963, року.
Основна наукова обласц у хторей Мирон Лазор творел та, на концу, и докторовал 1973. року у Заґребе, була утвердзованє и стандардизация статковей покармовей мишанїни (концентрату). Ма обявени даскельо дзешатки самостойни и тимски науково роботи з тей обласци а роботи му публиковани у часописох на сербским, нємецким и анґлийским язику.
У остатнїм науковим и творчим периодзе Мирон Лазор ше анґажовал на цо лєпшим хаснованю чечних и секундарних продуктох поживовей индустриї, найвецей на дальшим преробку меласи. По своїх наукових роботох у тей обласци др Лазор бул познати и на других универзитетох у бувшей Югославиї.
Др Мирон Лазор роками сотрудзовал на Радио Новим Садзе у емисиї за валал на руским язику, як и у новинох Руске слово.
До пензиї др Мирон Лазор пошол 1990. року як наукови совитнїк на Технолоґийним факултету у Новим Садзе.
Умар 3. авґуста 2002. року и поховани є на Новосадским теметове.
Литература
[ушориц | ушор жридло]- Спатранє двасторочней прешлосци, Руснаци у Шидзе и околних местох – три значни ювилеї, КПД Дюра Киш и Грекокатолїцка парохия Преображеня Господнього, Шид, 2007
Вонкашнї вязи
[ушориц | ушор жридло]- Познати Бикићани, РТВ Центар Срем, информативни портал
- Мирон Лазор, Бикич Дол, моноґрафия, Завод за културу войводянских Руснацох, Нови Сад, 2016. б. 141
- Мирон Жирош: Бачванскосримски Руснаци дома и у швеце (1745-1991), реферат, Руснаци у Панониї, вебсайт rdsa.tripod.com, чис. 32