Микола Павлович Пански
| Микола Павлович Пански | |
|---|---|
| Народзени | 1876. року |
| Умар | 1931. року (56) |
| Державянство | угорске, югославянске |
| Язик творох | руски, сербски |
| Школа | основна, Руски Керестур |
| Период твореня | 1893—1931. |
| Жанри | тарґовина, погосцительство,култура, политика |
| Поховани | у Руским Керестуре |
Микола Павлович Пански (*1876—†1931), тарґовец и качмар, перши социялдемократа у Руским Керестурe.
Биоґрафия
[ушориц | ушор жридло]Микола Павлович-Данков єдна з напредних особох керестурского явного и привредного живота у другей и трецей децениї XX стороча. Бул народзени 1876. року. Як леґинь служел у сушедних нємецких валалох, та и у Червинки дзе бул „парадош" (вожел у нємецкого ґазди парадни конї) и научел добре нємецку и мадярску бешеду. Як млади чловек обезпечовал себе еґзистенцию так же на предай правел вальки на Тамашовей долїни и робел у Дюрдесовим сувачу як млїнар.
Одход до Америки
[ушориц | ушор жридло]Накадзи сцигли перши информациї од „Американцох" же у Америки мож заробиц добри пенєж и вон одходзи коло 1903 року. Знаходлїви, а и прето же бешедовал по нємецки, а „знал" и шицки славянски язики, барз добре ше знашол на роботи. Знал ше догваряц зоз роботнїками, єден час фабриком обезпечовал роботнїкох, а после як прекладатель робел и у адвокатским уряду. О єден рок пришла му и жена, та отворели бурд и тримали двацец роботнїкох. Кед ше Микола Павлович уж знашол и звладал анґлийски язик отворел дутян и на своїм кочу безплатно розвожел продукти на други бурди. Робота му барз добре ишла, бул добри тарґовец, шпоровни и знаходлїви, и уж 1912. року ше врацел до Керестура.
Нєодлуга Микола Павлович купел од општини паньску карчму, присподобел ю за общи и валалски потреби, доправел хижи за спанє, хлїв за конї, преширел салу за танєц и вибудовал себе хижу такой при порти у составе панскей карчми.
Павлович як социялдеморката
[ушориц | ушор жридло]Война застановела його напредованє, алє по врацаню зоз войни, як зарабровани вояк у Русиї, прилапел социялдемократски идеї и постал роботнїцки предняк, социялиста. Його карчма постала штредзиско польопривредних роботнїкох и їх борби за векши рис, наднїци, драгшу бирешску роботу. У карчми ше на Крачун єднали на роботу слугове и биреше зоз валалскима ґаздами. На перших керестурских вецейпартийних виберанкох социялисти победзую и вон вибрани за першого предсидателя. На тот способ керестурска општина була перша „червена општина" у Войводини. Його политична активносц барз завадзала державним власцом и валалским ґаздом и, понеже бул качмар, розришени є з функциї предсидателя, а пре „пренаходзенє у його обисцу пропаґандного комунистичного материялу" осудзени є и забранєне му явне политичне ангажоване.
Павлович бул у велїм перши
[ушориц | ушор жридло]Попри погосцительства, бо у його карчми мож було наручиц и єдзенє и остац и на ноцнїк, вон ше занїмал и зоз тарґовину. Одкупйовал од ґаздох жито, овес, ярец и на ладї то одвожел купцом. Робота му добре ишла, спомогнул ше, накупел жеми, мал свой салаш, у валалє чейзу и коня. Мал биреша, надосц статку, майстрох цо робели зоз трактором, тлачарка, у карчми келнерох.
Микола Павлович бул и надалєй активни, алє його активносц була унапрямена на уводзенє иновацийох до народного живота и унапредзеня польопривреди, орґанизованя културного и забавного живота младих.
У його карчми грала перша валалска капела Яковово гудаци, ту ше нєдзелями и на швета отримовали младежски танци, отримовали ше бали, сходи интелиґенциї. У сали за танєц надпатрал танцованє леґиньох, опоминал и часто зоз тирсовку поучовал. У сали ше отримовали и леґиньски „остатнї'" вечари, алє без опиваня и мулатованя.
Микола Павлович купел аґреґат и у його карчми и обисцу швицели електрични грушки, грал ґрамафон, бешедовал и грал радио. У сали ше приказовало перше кино. Микола Павлович перши у валалє купел трактор Кормик и тлачарку. Вон бул прави ґазда, добри качмар и тарґовец, алє стаємно бул у опозициї зоз валалскима ґаздами и церкву.
Микола Павлович бул снователь Огньогасного дружтва, котре стайомнє подпомагал и розвивал його роботу.
Активни бул и у ловарским и фодбалским дружтве.
Микола Павлович нєсподзивано умар 1931. року у 56. року живота.
Литература
[ушориц | ушор жридло]- Мирон Жирош, Привредїки и познати майстрове, Бачванско-сримски Руснаци дома и у швеце 1745-2001, Том IV, НВУ Руске слово и Грекокатолїцка парохия св. Петра и Павла, Нови Сад, 2004, б. 519.
- Мирон Жирош, Майстрове у Руским Керестуре, Бачванско-сримски Руснаци дома и у швеце 1745-2001, Том IV, НВУ Руске слово и Грекокатолїцка парохия св. Петра и Павла, Нови Сад, 2004, б. 104.
- Мирон Жирош, Члени Майсторского дружтва (1924-1928), Бачванско-сримски Руснаци дома и у швеце 1745-2001, Том IV, НВУ Руске слово и Грекокатолїцка парохия св. Петра и Павла, Нови Сад, 2004, б. 83.