Микола Корпаш


Микола Корпаш
Микола Корпаш за микрофоном у ТВ студию
Народзени	24. юния 1940.
Умар	6. април 2011. (71 рок)
Державянство	югославянске, сербске
Язик творох	руски, українски
Школа	ґимназия
Универзитет	Машински факултет у Новим Садзе
Период твореня	1964—2000.
Жанри	спикер, шпивач, новинар
Поховани	Нови теметов у Новим Садзе

Микола Корпаш (24. юний 1940—† 6. април 2011,) бул, у периодзе од 1964. по 1978. рок, найпопуларнєйши шпивач руских шпиванкох на просторох бувшей Югославиї. Цо вецей, вон бул перши шпивач за хторого мож повесц же бул гитмейкер понеже даєдни шпиванки хтори одшпивал були правдиви музични гити у тедишнїм чаше. Мал серию шпиванкох знятих за Радио Нови Сад хтори були, єдна за другу, барз популарни медзи слухачами.

Биоґрафия

Микола Корпаш ше народзел 24. юния 1940. року у Кули, у фамелиї Янка (1914 - 1982) и Даници (родз. Ачански 1914 - 1999) Корпашових Дюренцових. Микола мал и пар роки младшу шестру Миряну. Основну школу Микола закончел у Кули (1947 - 1954), а ґимназию у Вербаше и Новим Садзе (1955 - 1959). Кед мал 17 роки Микола ше, з родичами и шестру Миряну, преселєл до Нового Саду. Ту закончел ґимназию и концом 1959. року почал студиї на Машинским факултету. Дипломовал 1964. року

Микола ше 1969. року оженєл зоз Амалку Салакову зоз Дюрдьова. У малженстве мали двох синох Александра (1970) и Иґора (1977).

Роботна кариєра

Микола Корпаш ище як студент робел у компаниї Електрострой (1964 – 1965) потим бул концом 1966. року на дочасовей роботи у Заходней Нємецкей. Врацел ше и пошол на одслуженє воєного року. У априлу 1968. року почал робиц як спикер у Рускей редакциї Радио Нового Саду. 1970. року ознова одходзи на роботу до Заходней Нємецкей дзе остал по 1974. рок. Потим ше врацел до Нового Саду и предлужел робиц як новинар и спикер у Радио Новим Садзе аж по одход до пензиї 2000. року.

Музична кариєра

Як шпивач - аматер почал шпивац у КУД Соня Маринкович у Новим Садзе. На початку 60. -тих музични фаховец Сава Вукосавлєв формовал студентски хлопски октет до хторого вошол и Микола Корпаш. Тота ґрупа шпивачох нєодлуга постала секция КУД Соня Маринкович.

Року 1964. Микола Корпаш прешол до КУД Максим Горки дзе бул член хору и соло шпивач. Ту почал, з фахову помоцу познатого дириґента Иринея Тимка, пририхтовац репертоар и знїмац соло шпиванки за потреби музичней програми на руским язику Радио Нового Саду. Його красни глас, баршоньови баритон, як и емотивни способ интерпретациї остали його защитни знак. По тим го знаю числени любителє нашей писнї, по тим го буду знац и наступни ґенерациї.

Бул то период кед Микола Корпаш интензивно наступал як шпивач у шицких местох дзе жию Руснаци алє и на рижних манифестацийох по варошох тедишнєй Югославиї (Беоґрад, Заґреб, Скопє, Вуковар и други) и у иножемстве у Чехословацкей и Греческей (на концертох у Атини на Гелиополису Сава Вукосавлєв и Яника Балаж маестрално преробели руску народну шпиванку Чийо же то волки на способ сиртаки, и Микола Корпаш на каждим концерту даровани з велькима овациями греческей публики).

Микола Корпаш интензивно знїмал шпиванки за Радио Нови Сад. У архиви Радио Нового Саду єст 39 квалитетни студийски знїмки хтори емитовани на Радио Новим Садзе алє тиж так и на локалних радио станїцох, та на Радио Заґребу, Радио Беоґраду, на Радио Прешове у ЧССР. У студию Микола Корпаш найчастейше знїмал зоз трома файтами оркестрох: зоз смиковим оркестром чий дириґент бул Ярослав Войчеховски, з тамбуровим оркестром РНС дзе бул дириґент Сава Вукосавлєв и зоз забавним оркестром зоз хторим руководзел Ивица Чукляш.

Микола Корпаш од 1968. року робел професионално як спикер у Рускей редакциї Радио Нового Саду а як шпивач - аматер и член КУД Максим Горки у Новим Садзе знїмал шпиванки за фонд матичного радия. Медзитим, вон бул третировани як службенїк хтори роби у РНС и хтори обовязни шпивац дзе ґод лєм дахто од йому предпоставних надума. Прето пришло до одредзених нєпорозуменьох хтори му очежовали и роботу и шпивацку кариєру. Прето Микола Корпаш ришел концом 1975. року положиц точку на свою музичну кариєру. До студия РНС вошол ище лєм раз о пар роки же би знял красну рускиу народну шпиванку Чийо то дзивчатко а потим його розкошни баритон, хтори могол ище роками збогацовац руску и войводянску музичну скарбнїцу, цалком уцихнул.

Шпиванки Миколи Корпаша хтори ше чуваю у архиви Радио Нового Саду ше и дзень-нєшка емитую у програмох Радио Нового Саду як и у програмох других радио станїцох на подручох дакедишнєй Югославиї дзе жию Руснаци.

Микола Корпаш умар 6. априла 2011. року у Новим Садзе. Поховани є на Новим теметове у Новим Садзе.

Дискоґрафия

Микола Корпаш знял за Радио Нови Сад 39 архивски знїмки - 27 руски шпиванки и 12 українски. Потераз, на интернету найдзени тоти:


Руски шпиванки
Америцки мен		Кед я умрем
Блукал я уж велї роки		Младосц моя
В ширим полю		Одхиль-лє, мила, облачок
Вечар майови		Орал мили орал
Вилєцела куковичка		Прецо ши ми вербо мила
Дзе же тота проста дражка		При мурику явор
Думки, мойо думки		Ружи, червени ружи
Ей, бул то кедиш красни час		Чарни очка поце спац
Загучали гори		Чийо то дзивчатко
Качмар, дай нам вино		Шпиваночки мойо
Українски шпиванки
Люблю тебе		У горах Карпатах
Маричка

Ґалерия

Микола у КУД Соня Маринкович, Нови Сад
Хор КУД Максим Горки 1965. року
Мелания Колбас, Владимир Гаргаї и Микола Корпаш
Микола Корпаш за микрофоном у Радио Новим Садзе
Члени Рускей редакциї Радио Нового Саду 1974. року. Микола Корпаш стої у горнїм шоре, треци з лїва.
Ґрупа членох Рускей редакциї РНС, Микола Корпаш други з лїва.
Микола и Амалка на свадзби Душици и Мирослава Корпаша

Вонкашнї вязи

Руснаци у швеце, рок IX, чис. 2, 2010, Микола Корпаш, шпивач зоз баршоньовим гласом (1), боки 4-8
Руснаци у швеце, рок IX, чис. 3, 2010, Микола Корпаш, шпивач зоз баршоньовим гласом (2), боки 3-8
Руснаци у швеце, рок X, чис. 1, 2011, Микола Корпаш, шпивач зоз баршоньовим гласом (3), боки 11-16
Руснаци у швеце, рок X, чис. 2, 2011, Микола Корпаш, шпивач зоз баршоньовим гласом (4), боки 3-8