Марґита Лучечко
| Марґита Лїкар Лучечко | |
|---|---|
 | |
| Народзена | 16. юния 1909. року |
| Умарла | 24. юлия 1988. (79) |
| Державянство | австроугорске, югославянске |
| Язик творох | руски |
| Школа | Штредня фахова школа за схопносци и ручну роботу у Заґребе |
| Период твореня | 1930—1975 |
| Обласци твореня | просвита, дружтвена активносц на просвищованю женох |
| Похована | у Руским Керестуре |
Марґита Лучечко (16. юний 1909—†24. юлий 1988) директорка, наставнїца, дружтвена активистка.
Биоґрафия
[ушориц | ушор жридло]
Марґита Лїкар ше народзела 16. юния 1909. року у Руским Керестуре. Родичи Михайло Лїкар, пивцоучитель и Вилма Лїкар (народзена Бучко), закончела гражданску школу. Марґита мала ище седем братох и шестри: Корнел (1898), Йоланда (Беба) (1901), Мария (Манда) (1902), Йовґен (1904), Елемир (1905), Иринка (1913) и Аранка (1915).
Основну школу Марґита Лїкар закончела у Дюрдьове, а Штредню фахову школу за схопносци и ручну роботу у Заґребе.
Робела як директорка Ремеселнїцкей школи у Сримскей Митровици, а потим прешла робиц до Основней школи Петро Кузмяк у Руским Керестуре дзе робела як вихователька и наставнїца подобового и музичного воспитаня. Тиж преподавала предмет хтори ше волал Ґаздовство, а була и дириґентка школского хору и дзивоцкого оркестра мелодикох у основней школи.
Орґанизовала и тримала валалским женом курси за сучасне варенє и водзенє обисца, скраванє, шице, вишиванє и други ручни роботи.
Одала ше за др Ивана Лучечку, ветеринара.
Марґита Лучечко умарла 24. юлия 1988. року. Похована є у Руским Керестуре коло свойого супруга хтори умар 1978. року.
Шицок свой рухоми и нєрухоми маєток завитовала и зохабела апацом Грекокатолїцкей церкви у Руским Керестуре.
Образовна робота
[ушориц | ушор жридло]Року 1953. Марґита Лїкар написала приручнїк за ґаздинї Наша кухарка (Видавательне - друкарске предприяце Руске слово Руски Керестур), хтори мало скоро кажде руске обисце и хтори унапредзел квалитет костираня Руснацох. Приручнїк Наша кухарка, як повторене и дополнєне виданє, з финансийну потримовку ширшей фамелиї Лїкар и фирми Алимента обявело Дружтво за руски язик, литературу и културу з Нового Саду 2007. року.
Ґалерия
[ушориц | ушор жридло]-
Наша кухарка, обновене и дополнєне виданє, 2007. рок
Литература
[ушориц | ушор жридло]- Тамаш, др Юлиян, „Просвитни роботнїки 1944-1991. рокˮ, Руски Керестур, лїтопис и история (1745-1991), Месна заєднїца Руски Керестур, 1992, бок 414.
Вонкашнї вязи
[ушориц | ушор жридло]- Марґита Лїкар Наша кухарка, повторене и дополнєнє виданє, 2007. рок
- Мр Гелена Медєши, Здравє на уста уходзи: Марґита Лїкар, Наша кухарка, Зборнїк роботох STUDIA RUTHЕNICA 12 (25), 2007, б. 184-186.
- Гелена Гафич-Стойков, Рецензия кнїжки Наша кухарка Maрґити Лїкар, Зборнїк роботох STUDIA RUTHЕNICA 12 (25), 2007, б. 186-167.
- Ясмина Чакан Вицкович, Пахи и смаки з бабовей кухнї: Рeцeнзия кнїжки Наша кухарка Марґити Лїкар, Зборнїк роботох STUDIA RUTHЕNICA 12 (25), 2007, б. 187-188.