Мария Моснак
| Мария Моснак | |
|---|---|
 | |
| Народзена | 26. фебруарa 1946. |
| Умарла | 30 мая 2022.(76. роки) |
| Державянство | югославянске, сербске |
| Мацерински язик | руски |
| Школа | Ґимназия, Вербас |
| Период твореня | 1967—2001. |
| Жанр | Спикерка, прекладателька, новинарка |
| Похована | Городски теметов Нови Сад |
Мария Вадаски Моснак (26. фебруар 1946—† 30. май 2022), перша професионална спикерка у Рускей редакциї Радио Нового Саду и на ТВ Нови Сад.
Биоґрафия
[ушориц | ушор жридло]Мария Вадаски народзена у Коцуре 26. фебруара 1946. року. Основну школу закончела у родним месце а ґимназию у Вербаше. По законченю штреднєй школи уписала студиї на Висшей Управней школи у Новим Садзе.
У Рускей редакциї РНС почала робиц 15. мая 1967. року. Цали роботни вик препровадзела пред микрофоном у Радио Новим Садзе як перша професионална радио спикерка у Редакциї програми на руским язику Радио Нового Саду.
У хвилькох кед Телевизия Нови Сад почала емитовац програму на вецей язикох Мария Моснак була и перша телевизийна спикерка на рускей програми ТВ Нови Сад.
У цеку 70-тих рокох Мария Моснак ше зявйовала и як водителька програмох у рамикох Фестивала култури Руснацох Червена ружа а тиж водзела конферансу на контакт-програмох хтори Руска редакация Радио Нового Саду орґанизовала по местох дзе жию Руснаци.
Року 1973. ше одала за Андрию Моснака и з нїм мала двох синох.
Окрем спикерских роботох, Мария Моснак робела и як прекладателька за потреби рускей програми Радио Нового Саду а у зениту своєй кариєри робела и як новинарка понеже ушорйовала информативну часц раншей програми на руским язику и вечарши висти по руски.
Остала запаметана по окреме красним баршоньовим и приємним гласу як и по максималней пошвеценосци ґу своєй роботи хтору окончовала на безпрекорни професионални способ и з окремну любову. Помагала, як искусна спикерка, у формованю єдней цалей ґенерациї спикеркох на руским язику хтори у роботи шлїдзели єй приклад и єй професионализем.
До пензиї пошла 28. фебруара 2001. року.
Умарла у Ветернику при Новим Садзе 30. мая 2022, у 76. року живота, а похована є на городским теметове у Новим Садзе.[1]
Ґалерия
[ушориц | ушор жридло]-
Винчанє Мариї Вадаски и Андриї Моснака -
Мария Моснак як спикерка ТВ Нови Сад 1972. року -
Часц членох Рускей редакциї РНС, Мария Моснак у штредку (на лївей руки учителя Михала Ковача).
Вонкашнї вязи
[ушориц | ушор жридло]- Ґрупа авторох: Гласи и часи, 70 роки Рускей редакциї Радио Нового Саду, Новинарска асоцияция Руснацох - НАР, Нови Сад 2019, б. 30-31.
- Ґрупа авторох: Гласи и часи, 70 роки Рускей редакциї Радио Нового Саду, Новинарска асоцияция Руснацох - НАР, Нови Сад 2019, б. 138.
- GODINE SLIKE I TONA / RTV sećanja, Izdavač RUV RTV, Ignjata Pavlaša 3, Novi Sad.
- Спикерка Радио Новог Саду Мария Моснак умарла у Ветернику, ТВ Войводина, 8. юний 2022.
- Умарла Мария Моснак, Рутенпрес, РТВ, 9. юний 2022.
- In memoriam у новинох Руске слово, число 24 (3997)17. юний 2022. б. 18
Референци
[ушориц | ушор жридло]- ↑ Вистка о шмерци на ТВ Войводина по руски