Леона Доротич Ґутеша
| Леона Доротич Ґутеша | |
|---|---|
 | |
| Народзена | 8. фебруара 1938. |
| Умарла | 5. октобра 2022.(84) |
| Державянство | югославянске, сербске |
| Язик творох | руски, сербски |
| Школа | Штредня медицинска школа,
Нови Сад |
| Универзитет | Природно-математични
факултет, гумана ґенетика |
| Специялизация | Гумана ґенетика, Беоґрад,
Институт Ломоносов, Москва |
| Период твореня | 1958—2019 |
| Жанри | гумана ґенетика, еколоґия |
| Похована | у Дюрдьове |
Леона Доротич Ґутеша (*8. фебруар 1938—†5. октобер 2022.), єдна з пионирох гуманей ґенетики у дакедишнєй СФРЮ, тиж активна на полю волотнерскей еколоґийно-просвищуюцей роботи.
Биоґрафия
[ушориц | ушор жридло]Леона Планчак народзена 8. фебруара 1938. року у Руским Керестуре. Оцец Йоакима, скравец, и мац Еуфемия народзена Буша у Коцура. Леонка мала шестру Иринку и братох Миколу и Владимира. Основну школу Леона закончела у родним валалє, а 1954. року фамелия ше преселєла до Нового Саду дзе ю оцец вжал за шеґерта до свойого скравецкого мигелю, а паралелно закончела и тророчну шеґертску школу. Кед ше у Новим Садзе отворел дзецински шпиталь, прията є робиц на допатраню хорих дзецох и источашнє ходзела и до школи за тот фах. Потим ше Леона Планчак уписала до поряднєй штреднєй медицинскей школи, а источашнє и далєй робела у шпиталю, цо предлужела и док нє закончела два роки висшу медицинску школу, а вец и штири роки на Природно-математичним факултету, оддзелєнє гумана ґенетика. З тей обласци Леона Планчак ище закончела два роки специялизациї у Беоґрадзе, а вец и субспециялизацию на два заводи, на Институту Ломоносов у Москви.
Кед у єй шпиталю основане оддзелєнє ґенетики вона ту з Москви принєсла методу анализи плодовей води при ваготних женох за утвердзованє евентуалних аномалийох цо було першираз у СФРЮ.
У медзичаше Леона ше одала, и зоз супругом Ґутешом мали двох синох, Леонида и Миколу. У медзичаше, супруг єй настрадал у транспорту а нєодлуга ше и упокоєл.
Кед ше пензионовала, зоз другим супругом Доротичом др Леона Доротич ше преселєла жиц до Руского Керестура.
Вона ше там активовала на еколоґийним просвищованю свойого народу, и отворела можлївосци уплївовац на физичне, менталне и социялне окруженє прейґ здруженя Желєни персцень. Так орґанизовани фахово преподаваня з рижних обласцох. Желєни персцень, з помоцу школярох и других, посадзел коло 20.000 древка. Орґанизовани рижни манифестациї з нагоди еколоґийних датумох, мотивоване ушорйованє заградкох, витворени числени путованя итд.
Др Доротичова порушала и утвердзованє квалитету води за пице у Руским Керестуре, дзе фаховци з Батуту утвердзели єй нєисправносц пре присуство арсену та инсталовали минипостроєнє за пречисцованє води.
Двацецрочни активносци Желєного персценя др Леона зазначела у двоязичней кнїжки Стриберна яр хтора обявена 2016. року, а помогли єй и єй вирна сотруднїца проф. мр др Лиляна Соколова и др Михайло Фейса.
Леона Доротич Ґутеша умарла 5. октобра 2022. року, а похована є на грекокатолїцким теметове у Дюрдьове
Вонкашнї вязи
[ушориц | ушор жридло]- Леона Доротич Ґутеша, вебсайт НАР, Руски вертикали, 23. новембер 2023.
- Еколоґийни рух подзелєл пауловниї школяром, РТВ Войводина, Вистки, 9. май 2015.
- „Желєни лїсток” Леони Доротич Ґутеша, пополадню бул маскенбал, Мария Афич, Рутенпрес, 6. юний 2017.
- Умарла др Леона Доротич Ґутеша, Мария Афич, Рутенпрес, 10. октобер 2022.