Константин Петриґала

Константин Петриґала
Народзени
Умар
Державянство
Язик творох
Школа
Период твореня
Жанри
Поховани

1888. року

1955. року (67)

австроугроске, югославянске

руски, карпато-руски

Учительска школа

1911—1941.

просвита, подобова уметносц

у Руским Керестуре

Константин Петриґала (*1888—†1955.), учитель, управитель школи у Руским Керестуре, маляр-аматер.

Биоґрафия

Константин Петриґала (Petrigalla) народзени 1888. року у валалє Варадка на Горнїци. Оцец Янош и мац Сузана родз. Тарасар, по походзеню Лемкиня. У фамелиї були седмеро дзеци, синове Янош, Мирон, Петро и Константин и дзивки Маришка, Гелена и Анушка. У своїм доме бешедовали по карпато-руски и були виховани у руским духу.

Константин ше вишколовал за учителя.

До Руского Керестура Константин Петриґала ше преселєл зоз Горнїци 1909. року. Пришол до валалу дзе уж жила його шестра Гелена од. Поливка. За стаємного учителя Константин Петриґала бул поставени аж 22. фебруара 1911. року.

У Першей шветовей войни Константин Петриґала бул на Сиверним фронту.

Константин Петриґала зоз дзецми, друга класа

Константин Петриґала бул у малженстве зоз  учительку Веруну родз. Гарди. Мали штверо дзеци: Андрий-Банди (1914-1990), умар у Кливленду, Огайо, Єлена (1916-2010), умарла у Новим Садзе, Дюра (1918-1986), умар у Варену, Огайо и Олґа (1919-1987) умарла у Новим Садзе. Його супруга Веруна  умарла  1920. року и вон остал ґдовец зоз штверима малима дзецми хтори допатрала його мац Сузана.

Константин Петриґала бул учитель (єден час и управитель школи) у Руским Керестуре. Бул правдиви народни учитель барз широких попатрункох и розличних интересованьох, участвовал у електрификациї валала, руководзел зоз першим кином у валалє, бул вожач єдного з перши путнїцких автомобилох у валалє, направел макету залївней систему на керестурских польох, та, медзи иншим, и мальовал. У церкви у Руским Керестуре ше находзи його малюнок „Цеховска застава”.

Константин Петриґала умар 1955. року у Руским Керестуре. Поховани бул у крипти на теметове ґу його мацери Сузани Петриґала родз. Тарасар.

Ґалерия

• 
  Учительски колектив  у Руским Керестуре 1912. року, стоя: Константин Петриґала,  Дюра Баконї,  Дюра Манойлов, Иван Шандор,  Осиф Фа, шедза: Веруна Гарди, учителька, Ирена Рот родз. Джуня, забавиля,  Михаил Поливка управитель, о. Дюра Биндас, катехета, Наталия Джуня, учителька
• 
  Константин Петриґала у своїм ателєу, коло 1920. року
• 
  Перши автомобил у Руским Керестуре, власнїк Денчи Папянка зоз фамелию, шофер  учитель Константин Петриґала
• 
  Учительски колектив керестурскей школи 1933. року, стоя: Константин Петриґала, учитель, Маґдалена Дудаш, учителька, о. Дюра Микловш, паноцец, учитель Манойла, нєпозната, o. Янко Будински, паноцец и Дюра Дудаш, учитель, шедза: Осиф Фа, учитель, Ирина Рот родз. Джуня, вихователька,  о. Михайло Мудри, парох, пред. РНПД, Янко Шандор, учитель управитель школи , Наталия Джуня, учителька и Михайло Няради, учитель
• 
  Пейзаж, олєй на платну

Литература

• Янко Рамач, Школа у Руским Керестуре (1753-1918), Грекокатолїцка  парохия св. Петра и Павла, Нови Сад, 1995. б. 120
• Тамаш, др Юлиян, „Учителє у школи у Руским Керестуре 1753-1941 ˮ, Руски Керестур, лїтопис и история (1745-1991), Месна заєднїца Руски Керестур, 1992,  бок 413 .
• Ґрупа авторох, „наслов часциˮ, Подобова творчосц Руснацох, - Дружтво за руски язик, литературу и културу, Нови Сад, 2003, б.
• Тамаш, др Юлиян, „1920. рокуˮ, Руски Керестур, лїтопис и история (1745-1991), Месна заєднїца Руски Керестур, 1992,  бок 178.
• Тамаш, др Юлиян, „1930. рокуˮ, Руски Керестур, лїтопис и история (1745-1991), Месна заєднїца Руски Керестур, 1992,  бок 205.

Вонкашнї вязи

История школи, Основна и штредня школа зоз домом школярох Петро Кузмяк Руски Керестур, вебсайт школи, наслов Державна школа 1899-1918. (список учительох).