Кирил Сидор
| др Кирил Сидор | |
|---|---|
 | |
| Народзени | 16. септембра 1920. |
| Умар | 9. децембра 2008. (88) |
| Державянство | югославянске |
| Язик творох | сербски |
| Школа | Штредня польопривредна школа у Крижевцох |
| Универзитет | Польопривредно-лєсарски факултет, Земун |
| Наукови ступень | доктор наукох (1963) |
| Период твореня | 1950—1995 |
| Обласци науки | ентомолоґия, вирусолоґия |
| Поховани | у Новим Садзе |
| Припознаня | Орден роботи зоз стриберним венцом |
Др Кирил Сидор (*16. септембер 1920—†9. децембер 2008) ентомолоґ и вирусолоґ.
Биоґрафия
[ушориц | ушор жридло]Кирил Сидор народзени 16. септембра 1920. року у Бикич Долу 1920 року у землєдїлскей фамелиї. Оцец Дюра и мац Юстина. Основну школу закончел у Привиней Глави, нїзшу ґимназию у Шидзе а Штредню польопривредну школу у Крижевцох. Дипломовал на Польопривредно-лєсарским факултету у Земунє 1950 року. Такой бул розпоредзни на роботу у Заводзе за винїцарство и овоцарство у Сримских Карловцох у Оддїлу за защиту рошлїнох на месце ентомолоґа.
Наукова робота
[ушориц | ушор жридло]На роботу до Пастерового заводу Кирил Сидор прешол 1957. року кед було основане оддзелєнє за вирози инсектох. Нєодлуга потим пошол на специялизацию до Анґлиї (Универзитет у Кембриджу) дзе остал скоро два роки. По врацаню бул меновани за руководителя Оддзелєня за инсектово вирози дзе орґанизовал роботу на значних проєктох. Кирил Сидор бешедовал по анґлийски, французки, росийски и нємецки а активно ше служел зоз векшину славянских язикох.
Докторску дисертацию Специфичносци даєдних инсектових вирусох и можлївосци їх применки у биолоґийней борби одбранєл 1963. року. Потим др Кирил Сидор бул на вецей одвичательних длужносцох, вон бул о.д. директора Пастерового заводу, вибрани є за наукового совитнїка на предлог Лєсарского факултета у Беоґрадзе, а од 1976. року робел и як сотруднїк Природно-математичного факултета у Новим Садзе дзе преподавал вирусолоґию. За рядового професора того факултету бул вибрани 1982. року. Як науковец участвовал на велїх наукових сходох у Европи и у Америки.
У своєй науковей роботи Кирил Сидор ше руководзел зоз Пастерову думку же треба, насампредз, упознавац и анализовац цеки и процеси у природи и преберац ришеня, копировац тото цо у природи, як евентуални проблем, давно розришене.
Др Кирил Сидор бул член Югославянского ентомолоґийного дружтва и Анґлийского кральовского ентомолоґийного дружтва.
За свою роботу др Кирил Сидор достал вецей значни дружтвени припознаня, повелї як и Орден роботи зоз стриберним венцом.
До пензиї пошол 16. септембра 1988. року.
Др Кирил Сидор умар 9. децембра 2008. року у Новим Садзе. Поховани є на Городским теметове.
Ґалерия
[ушориц | ушор жридло]-
др Кирил Сидор у лабораториї
Литература
[ушориц | ушор жридло]- Гавриїл Колєсар: Учиц ше од природи (Др Кирил Сидор) - МАК ч. 6-7, рок 14, юний-юлий 1985, б. 20-21, 24
- М. М. Цап. Проф. др Кирил Сидор (1920-2008). Новини Руске слово, рок LXIV чис. 51 (3296), Нови Сад,19 децембер 2008. року.
- Спатранє двасторочней прешлосци, Руснаци у Шидзе и околних местох – три значни ювилеї, КПД „Дюра Киш” и Грекокатолїцка парохия Преображеня Господнього, Шид, 2007.
Вонкашнї вязи
[ушориц | ушор жридло]- Познати Бикићани, РТВ Центар Срем, информативни портал
- Кирил Сидор, Бикич Дол, моноґрафия, Завод за културу войводянских Руснацох, Нови Сад, 2016. б. 141
- Мирон Жирош: Бачванскосримски Руснаци дома и у швеце (1745-1991), часц Мaме лєбо зме мaли нaуковцох з нaйвисшинa нaуковимa звaнями чис. 8, реферат, Руснаци у Панониї вебсайт.
- проф. др. Кирил Сидор вирусолоґ talasidunava.rs
- проф. др Кирил Сидор, вирусолоґ Интернет портал Габи Дунаю