Исак Нютн

Исак Нютн
Исак Нютн, портрет Ґодфрия Нелера
Особни податки
Датум народзеня	4. януар 1643. — НС 25. децембер 1642. — СС
Место народзеня	Линколншир, Кральовство Анґлия
Датум шмерци	31. марец 1727. (84 р.)
Место шмерци	Лондон, Кральовство Велька Британия
Образованє	Тринити коледж
Наукова робота
Обласц	физичар, математичар, астроном, алхемичар и филозоф.
Познати по	Класична механїка Нютнов закон ґравитациї Инфинитезимални рахунок Оптика
Подпис

Исак Нютн (анґл. Sir Isaac Newton, /ˈaɪzək ˈnjuːtən/; Линколншир, 4. януар 1643 —Лондон, 31. марец 1727) бул анґлийски физичар, математичар, астроном, алхемичар и филозоф природи, хтори нєшка за векшину людзох єден з найвекших особох у историї науки. Народзени є 4. януара 1643. у Линколнширу, а умар 31. марца 1727. у Лондонє.

Його студия Математични принципи природней филозофиї (лат. Philosophiae Naturalis Principia Mathematica), обявена 1687, хтора описує универзалну ґравитацию и три закони рушаня, поставела фундамент класичней (Нютновей) механїки и послужела як приклад за наставанє и розвой других модерних физичних теорийох. Виводзаци з тей своєй системи Кеплерово закони рушаня планетох, вон бул перши хтори указал же ше рушанє целох на Жеми и рушанє нєбесних целох покорюю истим физичним законом. Зєдинююца и детерминистична моц його законох приведла до револуциї у науки и до дальшого напредованя и воздзвигованя гелиоцентризма.

У механїки, Нютн тиж указал на єдно нове, вельке, значенє принципа отриманя импулса и момента импулса. У оптики, вон направел перши практични рефлексийни (жвераткови) телескоп и одкрил же ше з препущованьом билей шветлосци през склєняну призму вона разклада до спектру шицких фабох (у складзе з твердзеньом Роджера Бейкона з 13. вику). Нютн ше барз закладал за часточкову природу шветлосци. Вон тиж формуловал емпирийни закон хладзеня, преучовал швидкосц звуку и предложел теорию о походзеню гвиздох. У математики, Нютн дзелї заслуги з Ґотфридом Лайбницом за одкрице инфинитизималного рахунку. Вон тиж виложел и пообщену биномну теорему, розвиваюци на тот способ такв. „Нютнов метод“ за апроксимациї нула функциї и так допринєсол преучаваньом розкладаня функцийох до рядох.

Французки математичар Жозеф Луй Лаґранж часто виявйовал же Нютн найвекши ґениє хтори дараз жил, додаваюци раз же вон, тиж, и „найщешлївши, бо ше система швета нє може одкриц и установиц вецей як раз“. Анґлийски поета Александар Поуп, порушани з Нютновима посцигнуцами, написал познати епитаф:

Природа и природни закони у ноцней цмоти находза скритосц;

Бог гвари “Най будзе Нютн” и шицко постава шветлосц.

(Nature and nature's laws lay hid in night;

God said "Let Newton be" and all was light.)

Вонкашнї вязи

• Портрети Исака Нютна

• Isaac Newton На сайту Проєкт Ґутенберґ (язик: анґлийски)

• Newton Research Project

Литература

• Christianson, Gale (1984). In the Presence of the Creator: Isaac Newton & his times New York: Free Press.

• „The Newton Project” Imperial College London. 

• Милорад Млађеновић, „Развој физике-Механика и гравитација“, Грађевинска књига, Београд

• Вајт, Мајкл (2010). Исак Њутн, последњи чаробњак. Београд: Завод за уџбенике

• Хокинг, Стивен (2011). На плећима дивова - велика дела физичара и астронома (2 вид.). Београд: Алнари. б. 169—218.