Ирина Рот
| Ирина Джуня Рот | |
|---|---|
 | |
| Народзена | |
| Умарла | |
| Державянство | угорске, югославянске |
| Язик творох | руски, мадярски |
| Школа | Школа за виховательки, Зомбор |
| Период твореня | 1902—1938. |
| Жанри | виховательска робота, образованє, просвита |
| Похована | |
Ирина Джуня Рот (*—†), перша школована вихователька у оводи у Бачкерестуре (Руским Керестуре).
Биоґрафия
[ушориц | ушор жридло]Ирина Джуня була по походзеню зоз познатей учительскей Джуньовей фамелиї з Бачкерестуре (Руского Керестура). Єй оцец Михаил Джуня бул перши школовани руски учитель. Робел у Бачкерестуре як дзияк у церкви и як учитель у школи. Єй шестра Наталия Джуня тиж була учителька. По законченим дворочним образованю або такв. курсу за виховательки 1902. року у Зомборе, Ирина Джуня постала перша школована вихователька. Истого року, 10. новембра, була поставена на роботу у оводи у Бачкерестуре.
Ротова фамелия, дзе ше Ирина Джуня одала, була зоз Торжи, нєшка Савине Село, а по Другей шветовей войни члени фамелиї ше виселєли до Нємецкей.
Була чувар рускосци при дзецох
[ушориц | ушор жридло]Главни документ же под час Державней школи у Руским Керестуре була овода и же у нєй робела вихователька Ирина Джуня Рот, то фотоґрафия зоз 1904. року на хторей учительски збор зоз управительом Михайлом А. Поливком. Мено Ирини Ротовей ше находзи и у записнїкох Наставнїцкей ради у Бачкерестуре за 1906–1916. рок. Тиж так у записнїкох на початку каждого школского року дате и число уписаних дзецох до оводи. Було од 50 до 60 дзеци, медзитим, през рок ше число дзецох звекшовало, та през жимски час у оводи було и по 300 дзеци.1
У оводи було найвецей дзеци возросту пред школу. Од 1902. по 1918. рок, у периодзе найтвардейшей асимилацийней державней политики, урядови язик и у оводи бул мадярски. И попри того же Ирина Джуня Рот такв. курс за виховательки у Зомборе закончела на мадярским язику вона у оводи з дзецми бешедовала по руски и учела их на їх мацеринскей бешеди, преношела на нїх руски обичаї и традицию та прето дзеци барз любели ходзиц до оводи. Жадали чуц свой язик, язик хтори розумели, гоч у тедишнїм чаше то нє було дошлєбодзене. Мисия учительки Ротовей и любов ґу свойому була моцнєйша од каждого державного закону. То Керестурци знали почитовац, та по тим паметали тоту виховательку. Вона була чувар рускосци при дзецох наймладшого возросту, а познате же тото цо ше научи у дзецинстве, през живот ше нє забува. Прето по нєшка дзецински заградки медзи Руснацами маю нє лєм воспитну улогу, алє и глїбоку националну, бо су чуваре рускосци.
Пред Другу шветову войну, 1936. року, у Руским Керестуре була руска школа, робели 10 учителє, єдна оводашка Ирина Рот (од 1902. по 1938. рок), до школи ходзели 800 школяре, а до оводи 200–300 дзеци.
Ирина Джуня Рот робела у керестурскей оводи 36 роки, од 1902. по 1938. рок, кед пошла до пензиї.
Литература
[ушориц | ушор жридло]- Янко Рамач, Школа у Руским Керестуре (1753-1918), Грекокатолїцка парохия св. Петра и Павла, Нови Сад, 1995. б. 118-119.
- Тамаш, др Юлиян, Учителє у школи у Руским Керестуре 1753-1941, Руски Керестур, лїтопис и история (1745-1991), Месна заєднїца Руски Керестур, 1992, бок 412-413.
Вонкашнї вязи
[ушориц | ушор жридло]- Така овода нєт на цалим швеце, вебсай issuu.com/ruskeslovo, Руске слово ч. 52, 2022, януар 5, 2023, б. 24
- Олена Папуґа, 120 роки предшколского вихованя и образованя у Руским Керестуре (1902–2022), Studia Ruthenica, Дружтво за руски язик, литературу и културу, ч. 29, 2023, б. 98.
- Янко Рамач, Кратка история Руснацох (1745-1918), Грекокатолїцка парохия Св. Петра и Павла Нови Сад, 1993. б. 54.
- Историят. Учителє у Керестурскей школи од єй снованя, од 1753. до 1918. року. Вебсайт petrokuzmjak.com