Евгений Чакан
| Евгений Чакан | |
|---|---|
| Народзени | 13. марца 1931. року |
| Умар | 5. априла 1996 (65) |
| Державянство | югославянске |
| Язик творох | руски |
| Школа | Ґимназия, Вербас |
| Висша школа | Висша педаґоґийна школа, Нови Сад |
| Период твореня | 1954—1991. |
| Жанри | просвита, култура, язични лектор, аматерска ґлума |
| Поховани | на Новим теметове у Новим Садзе |
Евгений Чакан (*13. марец 1931—†5. април 1996), наставнїк-педаґоґ, лектор, язични редактор, составяч учебнїкох, добри шпивач (тенор) и ґлумец-аматер.
Биоґрафия
[ушориц | ушор жридло]Евгений-Йовґен Чакан ше народзел 13. марца 1931. року у Руским Керестуре. Оцец Михал и мац Серафа родз. Скубан. Йовґен мал младшого брата Михала и шестру Гелену. Основну школу и пейц класи ґимназиї Йовґен Чакан закончел у своїм родним валалє, а потим предлужел школованє у Вербаше дзе матуровал 1951. року. Висшу педаґоґийну школу (русийски язик) закончел у Новим Садзе 1953. року и истого року почал робиц як наставнїк у Коцуре. Од 1954. року, кед одслужел войско, Йовґен Чакан робел у Основней школи у Руским Керестуре як наставнїк висших класох аж по 1969. рок кед, по власним жаданю, прешол на роботу до Новинско-видавательного подприємства Руске слово у Новим Садзе. Як лектор и язични редактор робел аж по 15. септембер 1991. року кед пошол до скорейчасовей пензиї.
Йовґен Чакан бул винчани зоз Марию, родз. Рамач (Илькова), у малженстве мали три дзивки Софию, Марчу и Иринку.
Велїм ґенерацийом школярох, окреме керестурским, Йовґен Чакан остал у тирвацей памятки як добри педаґоґ хтори знал усадзиц любов ґу язиком, а окреме ґу мацеринскому. Вон у своєй наставнїцкей кариєри викладал три язики: руски (мацерински), сербскогорватски и русийски. Шицки тоти три язики його школяре добре научели. Мож повесц же му то була и найвекша награда за його петнацрочну наставнїцку дїялносц. Роботу лектора и язичного редактора у НВП Руске слово Йовґен Чакан окончовал полни 22 роки.
Йовґен Чакан бул член Дружтва за руски язик, литературу и културу од 1974. року.
Йовґен Чакан од младосци полюбел театралну и подобову уметносц. Окрем того же свой шлєбодни час, як ґлумец, даровал театралней уметносци у вецей театралних фалатох хтори режирал Петро Ризнич Дядя, Йовґен зоз Дядьом мал и окремни контакти. Одходзел до обисца Петра Ризнича Дядї хтори му одкривал тайни мальованє и давал хасновиту подуку. Так ше вон опробовал у подобовей уметносци и за собу охабел єден шумни фонд малюнкох.
Йовґен Чакан умар 5. априла 1996. року у Новим Садзе, у 65. року живота. Поховани є на Новим теметове у Новим Садзе.
Литература
[ушориц | ушор жридло]Тамаш, др Юлиян, „Просвитни роботнїки 1944-1991. рокуˮ, Руски Керестур, лїтопис и история (1745-1991), Месна заєднїца Руски Керестур, 1992, бок 414.
Дюра Латяк, „Наставнїк, педаґоґ и лекторˮ, Руски календар 1997, НВУ Руске слово, Нови Сад, 1996, б. 162
Ґрупа авторох, „Евґений Чакан, маляр аматерˮ, Подобова творчосц Руснацох, Дружтво за руски язик, литературу и културу, Нови Сад, 2003, б. 128