Древянки
Древянки, єд. древянка – файта древеней обуї (серб. кломпе). Древянки або клюмпи, ручно направена обуй котра ше у прешлосци вельо хасновала на валалох, найвецей в жиме. Ношели их углавним парасти. Древянки були вигобльовани з древа, лєгки, а же би були цепли, кладло ше до нїх слами. Обувало ше их на збивани ботоши, а до роботи ше ноги окруцало до онучкох.
Ношело ше их од дижджовней и блатней єшенї до вчасней яри. Правело ше их з мегкого древа (верби або тополї), напредку мали тупи нос, а од задку були плїтки. Правели их колєсаре, пинтере або кудзеляре. Вше були за число-два векши, же би ше могли до нїх положиц слами або окруциц онучки коло ногох.
История древянкох
[ушориц | ушор жридло]Нє зна ше и нє утверзене кеди направени перши древянки. Даєдни историчаре їх наставанє приписую старим Греком, даєдни Келтом або ґерманским племеном. Историйни жридла нєт вельо, прето же ше вихасновани дреянски углавним похасновали як огрив. Найстраши пренайдзени древянки по походзеню зоз Голандиї, зоз 1230. року. Древянки хасновали землєдїлци у велїх жемох, та и у Сербиї.
Нєшка ше древянки, (баржей у иножемсте), продукую углавним як сувенири або у ремесельнїцких предавальньох, як защитна обуй (часто у польопривреди, заградкарству).
Руснаци хасновали древянки
[ушориц | ушор жридло]Найвецей ше податки о древянкох зявюю у цеку 19. вику и то у Войводини, та самим тим податки ше можу одношиц и на руску популацию. Хасновани су як часц народного облєчива, або як роботна обуй. У Бачкей, напр. часто ше ношели в жиме по блату, шнїгу и ляду. Були вше за число векши и широки, так же власнїки до нїх ґурли дакус слами и шено, або обували груби ботоши зоз волни, же би им у древянкох було цеплєйше. Войводянє та и Руснаци их любели бо то часто була найприступачнєйша и найтуньша обуй през жиму.
Виробок древянкох
[ушориц | ушор жридло]
За виробок древянкох потребне одвитуєце мегчейше древо и ремеселнїцки алат. Виробок древянкох чежша физицка робота. Нєшка ше (та и у Сербиї) мале число ремесельнїкох занїма зоз виробком древянкох, а тота дїялносц уписана до урядового Реґистра сертификованих старих и уметнїцких ремеслох и роботох домашнього виробнїцтва. Медзитим тото нє доприноши мотивованосц же би ше млади особи заинтересовали за стари ремесла та и за правенє древянкох. Млади особи нє жадаю постац ,,древянкаре,'' медзиншим и прето же то чежша физицка робота а млади нєшка еґзистенцию глєдаю през други способи и можлївосци.
Литература
[ушориц | ушор жридло]- Словнїк руского народного язика I, А – Н, Нови Сад 2017, б. 378