Данил Гарди
| Данил Гарди | |
|---|---|
 | |
| Народзени | 5. септембра 1951. |
| Умар | 6. мая 2009. (58) |
| Державянство | югославянске, горватске |
| Язик творох | руски, горватски |
| Школа | штредня школа, Вуковар |
| Период твореня | 1973—2007. |
| Жанри | новинарство, публицистика, култура |
| Поховани | у Петровцох |
Данил Гарди (*5. септембер 1951—†6. май 2009), єден з найвизначнєйших новинарох, културних и явних роботнїкох медзи Руснацами у Горватскей.
Биоґрафия
[ушориц | ушор жридло]Данил Гарди народзени як двойнятко зоз братом Михалом 5. септембра 1951. року у Петровцох при Вуковаре. Оцец Петро и мац Андєлка нар. Канюх. У родним валалє закончел основну школу а штредньошколске образованє здобул у Вуковаре дзе, у тедишнєй Установи за информованє Вуковар седемдзешатих рокох почал свой роботни вик як новинар. Данил Гарди робел у Радио Вуковару и у Вуковарских новинох, як на горватским так и на руским язику. У виданьох по руски як цо то була Нова думка у горватскей и у руских гласнїкох преважно з Войводини, вон почал сотрудзовац ище як школяр основней и штреднєй школи. Як потвердзени и искусни новинар зоз Горватскей Данил Гарди бул и член Союзу новинарох Югославиї.
По сам початок воєних зраженьох на Балкану на початку 1990-их Данил Гарди бул порядни дописователь новинох Руске слово дзе писал о шицких значнєйших збуваньох и о живоце Руснацох у Горватскей. Бул вон стаємни и каждодньови сотруднїк и у електронских медийох, односно руских редакцийох Радия и Телевизиї Нови Сад кед ше каждодньово могло чуц його звити у информативних емисийох радия и ТВ по руски як и його инспиративни прилоги у Емисиї за валал лєбо Панорами на Радио Новим Садзе або патриц зложенши ТВ прилоги, як цо то була емисия о Пишкуревцох и Руснацох у тим краю за хтору вон написал сценарий.
Як резултат вецей як 25 рокох його новинарскей кариєри за Данилом Гардийом остали стотки звити, статї и репортажи о живоце Руснацох у Горватскей а його робота и угляд були инспирациї за младших колеґох-новинарох же би рушали по його шлїдох.
Данил Гарди бул, як член КУД Яким Гарди з Петровцох, активни учашнїк у културним и явним живоце Руснацох. Тиж так, вон бул и єден зоз сновательох найвекшого фестивала Руснацох у Горватскей Петровски дзвон.
Данил Гарди бул оженєти зоз Андєлку родз. Костелник, у малженстве мали дзивку Таню.
Под час траґичних войнових подїйох у Вуковаре дзе вон зоз фамелию бивал, Данил Гарди бул гарештовани з боку сербских воєних моцох штредком новембра 1991. року и бул одведзени до Сербиї дзе пребувал у гарештох у Сримскей Митровици, Алексинцу и Нишу. Прежил чежки часи, малтретованє, вишлїдзованя а потим бул концом януара 1992. року, у єдней черанки зараброваних медзи сербским и горватским войском, розмєнени и сцигнул до Горватскей. Подїї з того периоду, спрам шицкого, охабели пошлїдки на його здравє и вон ше похорел та пошол до вчасней пензиї.
И у тим периодзе, як пензионер, Данил Гарди нє мировал та бул активини сотруднїк на зазберованю материялу за кнїжку Руснаци у Републики Горватскей.
Данил Гарди умар 6. мая 2009. року у Вуковаре, у 58. року живота. Поховани є 7. мая на теметове у Петровцох.
Литература
[ушориц | ушор жридло]- Михайло Зазуляк: Данил Гарди (1951—2009), Рок LXV число 20 (3317) Нови Сад, 15. май 2009. року, бок 11.
Вонкашнї вязи
[ушориц | ушор жридло]- Борис Варґа: Траґедия Українцох и Руснацох зоз Вуковару, Думки з Дунаю, Лїтопис Союзу Русинох и Укрaїнцох Републики Горвaтскей, ч. 18, б. 103-111. ISBN 978-953-7767-07-5 Превжате и адаптиране зоз Al Jazeera Balkans.
- Дюра Лїкар: ЖВЕРАТКО НАШЕЙ РОБОТИ, Союз Русинох Українцох Републики Горватскей, ч. 130, рок ХХХІV, 2005, б. 8, ISSN 0351-3181
Ґалерия
[ушориц | ушор жридло]-
Мирослав Цирба, Янко Бучко, Данил Гарди и Гавриїл Колєсар
