Владимир Малацко (учитель)
| Владимир Малацко | |
|---|---|
| Народзени | 22. децембра 1934. |
| Умар | 24. януара 2007 (73) |
| Державянство | югославянске, сербске |
| Язик творох | руски, сербски |
| Школа | Учительска школа Зомбор, Суботица |
| Период твореня | 1956—1998. |
| Жанри | просвита, педаґоґия, култура, спорт |
| Поховани | у Руским Керестуре |
| Припознаня | Стриберна плакета за заслуги у унапредзованю фодбалского спорта од ФСЮ
Златна плакета од СОФК Войводини Златна плакета за унапредзенє Спортских бавискох Руского слова Плакета за вельорочну роботу у СД Русин |
Владимир Малацко (*22. децембер 1934—†24. януар 2007), учитель, дружтвено-политични и спортски роботнїк, директор ОЦ Петро Кузмяк у Руским Керестуре.
Биоґрафия
[ушориц | ушор жридло]Владимир Малацко народзени у Руским Керестуре 22. децембра 1934. року. Оцец Владо и мац Ирина родз. Рацпети. Владимир мал шестру Наталию. Основну школу Владимир закончел у Руским Керестуре, а потим и Учительску школу у Суботици и Зомборе.
Такой по законченю учительскей школи 1956. року Владимир Малацко почал робиц як учитель у Основней школи Петро Кузмяк у Руским Керестуре.
Владимир Малацко ше винчал зоз Марию родз. Сопка, у малженстве мали сина Владимира и дзивку Ясмину.
Значне доприношенє проґресу школи
[ушориц | ушор жридло]Владимир Малацко бул директор Основней школи Петро Кузмяк и потим Образовного центру Петро Кузмяк у Руским Керестуре од 1977. року та по 1988. рок. Праве у тей децениї кед Владимир Малацко бул директор школа у Руским Керестуре дожила барз значни успихи и пременки. У децембре 1977. року отворени нови, сучасни будинок школи. О рок, 1978. року почала з роботу Педаґоґийна академия хтора була у составе зомборскей учительскей академиї и дала даскельо ґенерациї руских учительох. Истого року формовани Образовни центер Петро Кузмяк хтори обєдинєл основне, штреднє и професийно-унапраямене образованє и воспитанє.
Просвитно-педаґоґийни завод зоз Зомбора 1979. року окончел анализу роботи и функционованя ОЦ Петро Кузмяк и установел високи ступень сполньованє шицких образовних и педаґоґийних вимогох.
У септембре 1986. року комплетовани будинок школского интерната при будинку новей школи. У октобре 1986. року ОЦ Петро Кузмяк бул преглашени за найушореншу школу у Войводини за чечуци школски рок.
Концом 1987. року у ОЦ Петро Кузмяк була комплетована компютерска учальня яка теди у велїх школох у Войводини и Югославиї була лєм єдно нєдолаплїве жаданє.
За витвореньом шицких тих успихох стала управа Образовного центра на чолє зоз директором Владимиром Малацком и його помоцнїками Яковом Кишюгасом и Владимиром Фа.
Остатнїх рокох своєй роботней кариєри Владимир Малацко бул директор Друкарнї Руске слово, потим професийно робел у ОК ССРНВ у Кули, та прешол на место совитнїка у Месней заєднїци у Руским Керестуре. Оталь пошол до пензиї 1991. року.
Спортске анґажованє и кариєра
[ушориц | ушор жридло]Ище як школяр керестурскей ґимназиї и Учительскей школи у Суботици и Зомборе Владимир Малацко бул активни у вецей конарох спорта, заступал школи у шаху, кошарки и атлетики.
З приходом на роботу 1956. року до керестурскей школи Владимир Малацко попри порядних дружтвено-политичних роботох, постал и активни член у СД Русин, бул член орґанох управяня, добри фодбалер, та потим тренер пионирох, вец подростку и старших фодбалерох. Орґанизовал рижни фодбалски турнири у малим фодбалу медзи оддзелєнями у школи Петро Кузмяк, створел числени тими, а потим з тих тимох преберал младих бавячох до подростку ФК Русин дзе бул тренер од 1960. по 1962. рок. Од 1962. та по 1981. рок бул тренер першого тима и у тим периодзе фодбалере бавели по другираз у Бачкей лиґи и посциговали замерковани резултати.
Владимир Малацко бул єден з иницияторох стретнуцох фодбалерох и рукометашох зоз Чехословацкей зоз нашима клубами. Так нашо екипи госцовали у Медзилаборцох, Свиднїку, Старей Любовнї, Зборове, Широким, Прешове...
Року 1982. Владимир Малацко бул тренер ФК Младост зоз Крущичу, дзе бул преглашени за єдного з найлєпших тренерох. У чаше од 1986. по 1987. рок робел як помоцни тренер у ФК Русин. Теди вельо зробел на унапредзованю фодбалского спорту як член Предсидательства СД Русин, як член Предсидательства и рижних комисийох фодбалского подруча Зомбор и як предсидатель Секциї за физичну и технїчну културу при ССРНВ Кула и Покраїнскей конференциї ССРНВ.
За свою роботу Владимир Малацко достал велї припознаня медзи хторима Стриберна плакета за заслуги у унапредзованю фодбалского спорта од ФСЮ, Златна плакета од СОФК Войводини, Златна плакета за унапредзенє Спортских бавискох Руского слова, як и Плакета за вельорочну роботу у СД Русин дзе бул преглашени за почесного члена.
Владимир Малацко умар 24. януара 2007. року. Поховани є у Руским Керестуре.
Литература
[ушориц | ушор жридло]- Тамаш, др Юлиян. Просвитни роботнїки 1944-1991. року, Руски Керестур, лїтопис и история (1745-1991), Месна заєднїца Руски Керестур, 1992, бок 414.
- Тамаш, др Юлиян. 1986. рок, Руски Керестур, лїтопис и история (1745-1991), Месна заєднїца Руски Керестур, 1992, бок 340.
Вонкашнї вязи
[ушориц | ушор жридло]- История школи, вебсайт petrokuzmjak.com