Биоскоп у Коцуре
Початки приказованя филмох
[ушориц | ушор жридло]Локация першого биоскопа у Коцуре[1] була у прижемю у тим чаше, 1920-тих рокох, єдиней хижи на поверх у Коцуре (ткв. Шток), чий власнїк була фамелия Стрибер.
Податко о тим хто бул перши власнїк першого биоскопа у Коцуре, хтори мал приватни характер, нє усоглашени. Спрам Моноґрафиї Коцура[2] то бул Петро Керекярта, а спрам здогадованьох Миколи Русковския то бул Генрих Холздерґер. Маюци у оглядзе материялни статус жительох Коцура, вироятнєйше же то бул Г. Холздерґер.
Окрем у спомнутим будинку Штока у цеку 1930. рокох филми з часу на час приказовани и у будинку дзе познєйше була Месна заєднїца Коцур (напр. филм Рин Тин Тин 1936. або 1937. року, у орґанизациї Руского народного просвитного дружтва односно о. Максимилияна Буїли)[3] и у карчми Миколи Горняка Чобана (до хторей з часу на час, дзекуюци тому же карчма мала вельки двор и вельо лавки, приходзел и путуюци циркус та у рамикох його нащиви и програми орґанизовани и проєкциї филмох).
Власнїк биоскопа под час Другей шветовей войни бул Генрик Енис. Найстарши жителє Коцура ше здогадовали же теди приказовани мадярски любовни филми у хторих ґлумела у гевтим чаше популарна ґлумица Катарина Каради.
Период после войни
[ушориц | ушор жридло]По закончєню Другей шветовей войни, 1946. року, биоскоп бул обновени. Достал назву Биоскоп Искра и припадал дружтву Катюша. У тим периодзе приказовани домашнї, югославянски филми (Славица, Барба Жване) и русийски филми.
Року 1948. биоскоп бул национализовани алє пошвидко престал з роботу пре очкодованє апаратури. Роботу биоскопа 1953. року обновел Совит за просвиту Народного одбору на чолє зоз Нестором Скалом. З тей нагоди филми ше приказує на новей локациї, у будинку хтори пред Другу шветову войну вибудовало Соколске дружтво. То, иншак, нєшкайши будинок Дома култури у Коцуре.
Же би у спомнутим чаше биоскоп поряднє робел анґажовали ше Леона Русковски, Леона Пушкаш, Микола Новак, Ґабор Новак, Марко Чорей и други. Кинооператере були Силвестер Новак и Яков Молнар. Касире були Леона Русковски и Яков Москаль. Филми були приказовани єдного роботного дня у тижню та всоботу и внєдзелю.
Штредком двацетого вику у обєкту нєшкайшого Дома култури була розконарена активносц членох Антифачистичного фронта женох. Мария Гарди орґанизовала курс водзеня обисца, а Леона Русковски ґлумела у даскелїх дзешаткох театралних фалатох спомедз хтори векшину вона и режировала. Леони Русковски було зверене и руководзенє зоз Биоскопом Искра. Кинооператер хтори остали у здогадованю Коцурцох були (спрам рядошлїду роботи зоз проєкторами и ролнами): Яков Фейса, Мирослав Преґун, Микола Олеяр, и остатнї, Кирил Фекета.
Проєкциї филмох були барз добре нащивени. Седемдзешатих рокох приказовани два або три филми тижньово, а дзекеди филм мал и три проєкциї дньово. Леона Русковски напр. пре вельке интересованє за филми достала идею же би зоз свойофайтовим филмским маратоном орґанизовала и Дочек Нового року у биоскопе. Вечар 31. децембра приказовани и по три филми єден за другим. Павза правена лєм же би ше окончело вицагованє рижнородней и богатей полноцней томболи.
Ґенерално патрене, репертоар биоскопа у Коцуре ше нє розликовал од репертоара биоскопа у Вербаше и биоскопох у околних местох. Анї у златним периодзе проєкцийох, седемдзешатих и осемдзешатих рокох, а анї у периодзе медзи двома войнами. То ше одноши и на приказованє такволаних журналох хтори вше були приказовани пред початком бавеного филма.
Змерк биоскопскей активносц
[ушориц | ушор жридло]И попри того же нєшка маме оптимални условия за приказованє филмох Биоскоп Искра вецей нє роби. Нащива публики, кельо пре богату филмску програму на телевизиї (односно, пре богату филмску програму на числених телевизийних станїцох) тельо и пре преберанє филмох зоз интернета, їх умножованє на компакт-дискох и ширенє и то, часово патрене, вельо скорей як конкретни филми сцигню по општину Вербас, винїмково мала.
Общи шветови тренда нєставаня явних биоскопских проєкцийох ше, як законїтосц, указал и у случаю биоскопа у Коцуре.