Бабин пес
| Бабин пес | |
|---|---|
 | |
| Наукова класификация | |
| Царство: | Animalia |
| Тип | Arthropoda |
| Класа | Insecta |
| Шор: | Lepidoptera |
| Фамилия: | Erebidae |
| Род: | Callimorpha |
| Файта: | C. dominula |
| Биномна назва | |
Callimorpha dominula
(Linnaeus 1758) | |
Бабин пес – назва гушенїци и мотиля Callimorpha dominula.[1]
Розпрестартосц
[ушориц | ушор жридло]Мотиль бабин пес то ноцни мотиль Callimorpha dominula з фамилиї Erebidae. Розширени є на подручу векшей часци Европи, на Блїзким востоку (Турска, Закавказє и сиверни Иран)[2]. Найволї слунечни влажни места коло потокох, барох, долїнох-рибаловох, влажни лєси з чисцинами.
Опис
[ушориц | ушор жридло]Преднї кридла му чарни з билима и жовтима пегами, на чарних часцох звичайно маю металик желєни одблїск. Долнї кридла червеней фарби (ридше жовти) зоз чарнима пегами. Брух чарней фарби, а першова часц металик цможелєней фарби з двома воздлужнима краткима жовтима пасмами. Розпон кридлох од 45 до 55 мм[3].
Биолоґия
[ушориц | ушор жридло]Мотилї бабини пси активни и през дзень и вноци. Вноци их прицагує шветло, а през дзень углавним мирую, та их чежше найсц. Лєтаю у юнию и юлию, а ридше их мож видзиц у маю и авґусту. Маю єдну ґенерацию рочнє; самици после парованя знєшу ваїчка на рошлїну хранїтельку. З ваїчкох виду гушенїци цмошивей до чарней фарби зоз претаргованима жовтима бочнима пасмами, маю чарни до шиви шерсци воздлуж цалого цела. Як рошлїни хранїтельки можу буц розлични рошлїни зоз желєним лїсцом (напр. покрива, малина, пши язики), алє и розлични черяки и древа[4].
Гушенїца
[ушориц | ушор жридло]За тоти вилягнути гушенїци наш народ тиж хаснує, як и за мотилї, назву бабин пес. Точнєйше, народ хаснує назву бабин пес лєм за гушенїци, а вироятно анї нє зна хтори то и як випатра мотиль з чиїх ваїчкох вилягнути гушенїци бабини пси. Тота назва за гушенїци мотивована з тим же их мож найсц коло хижи, у загради, у трави, на ягодох. Назва бабин пес за тоти исти гушенїци хаснує ше и у карпатским ареалу: у українских бойковских бешедох бабин пес, у лемковских бабин пес, бабин псик, у других зах. укр. бешедох тиж бабин пес, бабiн пес, у поль. диял. babi pies, у слц. диял. babi pes. (Тимко, 71)
Гушенїци бабини пси ше концом лєта обвию зоз ґалету (заґалеца ше), а на яр зоз ґалетох виду мотилї бабини пси.
Вонкашнї вязи
[ушориц | ушор жридло]Референци
[ушориц | ушор жридло]- ↑ Husarik, Aleksandra; Hric, Boženka; Tot, Ivan (2019). Noćni leptiri Vlasine. Turistička organizacija opštine Surdulica, suizdavač HabiProt;. ISBN 978-86-912033-3-7.
- ↑ Cook, L. M. (1962-03-01). „Evolution in the Scarlet Tiger Moth in Northern Italy”. Systematic Biology (на језику: енглески). 11 (1): 17—21. ISSN 1063-5157.
- ↑ „Callimorpha dominula | Alciphron”. alciphron.habiprot.org.rs.
- ↑ „Insektenbox: Schönbär”. www.insektenbox.de.