C-dur скала

C-dur скала, нотни приказ на висше и на нїжей. Звучни приказ (нависше):

C-dur (Це-дур) то дурска скала, хтора почина од тона–ноти ,,с” (такв. тоника ,,с”).^[1] Тота скала нєма пред'знаки, як цо нєма анї єй паралелна а-mоl скала.

Тони, односно їх знаки-ноти ше меную у C-dur скали зоз:

абецедну (алфабет) азбуку: c, d, e, f, g, a, h, /c - хтори поновени за октаву висше,
солмизацийни мена: до, ре, ми, фа, сол, ла, си / до - хтори поновени за октаву висше и вон перши тон ,,с” (до) у шлїдуюцей октави.

Пре теорийне правило у дурских скалох о правилним розпорядку цалих и полутонох, C-dur скала ма полутони помедзи ступньох: III-IV и VII-VIII (осми то поновени I ступень). Полутони ше у C-dur скали означую зоз двома малима краками ᐱ хтори скапчую ступнї. Нa клавиятури ше полутони находза на месце дзе нєт чaрней типки (клавиши) е-f и h-c.

Тетракорд у скали то штири пошоровани тони єден за другим, єст их два (горнї и долнї тетракорд) тиж маю свойо означованє (зоз просту линию над тонами хтори на концох дакус заламани и залапюю по штири тони) кед же то потребне. У обидвох тетракордох у C-dur скали цали и полутони єднак розпоредзени.

Ступень то место тона у C-dur скали а место означуєме зоз римскима числами. I, II, III, IV, V, VI, VII, VIII (поновени I ) ступень.

Главни ступнї у скали то: I – IV – V

I тоника,

IV субдоминанта и

V доминнанта)

Каденца то гармонске „заокруглєне” законченє часцох композициї а поготов векшей музичней форми на концу дїла/композициї. Каденцу доставаме кед ше на главних ступньох формую акорди, єст вецей типи, а завиша од ступньох и хтори типи акордох гармонски повязани на концу композициї.

Звучни приклад акорда

Акорд то звучанє найменєй трох розличних тонох а може буц составени и зоз вецей тонох. Aкорд мож формовац на каждим ступню нє лєм у C-duru, алє у каждей скали.

Акорд ма свойо „обрацаня" (серб, обртаји), хтори маю одредзени мена и ознаки. Мена обрацаньох завиши од числа тонох у акорду. Кед акорд ма три тони вец ма два обрацаня, кед акорд ма штири тони вец ма три обрацаня.