Прейдз на змист

80 роки од першей Рускей ґимназиї у Руским Керестуре (1945- 2025)

Додай вязи
Материял зоз Википедиї
Отверанє Ґимназиї у Руским Керестуре
Отверанє Ґимназиї у Руским Керестуре 25. фебруара 1945. року

Шветочне отверанє Державней реалней ґимназиï на руским наставним язику у Руским Керестуре отримане 25. фебруара 1945. року у ґимназийским будинку. Отверанє було шветочне. Школярох було вецей як 200, а зоз нïма тиж тельо родичох зоз Руского Керестура, Коцура, Дюрдьова и вецей сримских местох. О значносци тедишнєй хвильки бешедовали директор Гавриïл Надь и начальнïк за просвиту Спасоє Чобански зоз Нового Саду.

На отвераню Ґимназиï виведзена и пригодна програма хтору пририхтали школяре – будуци ґимназиялци, з помоцу наставнïка Стевана Ґери (музични точки) и Радмили Рис (рецитациï). По отвераню, присутни мали нагоду обисц учальнï и кабинети у школским – ґимназийским будинку. Теди даєдни першираз видзели ґлобус, електромаґнет, клавир ... итд.

О початку роботи Ґимназиï у Руским Керестуре у „Руским слове”, теди (1945) нововидрукованим глашнïку Руснацох, остало записане шлïдуюце: „Перши днï єй иснованя... улïваю вельки надïï. Очи цалого нашого народу упарти до нєй. Школска младеж ше будзе воспитовац так як то вимагаю правдиви потреби. Културно–просвитни живот нашого народа ... претаргнул зоз чежку прешлосу, а ступел до новей и щешлïвшей будучносци. Наша перша Ґимназия почала жиц.”

У вязи зоз роботу Ґимназиï у Руским Керестуре и зоз станом у обласци просвити у тим чаше, професор Яша Баков медзи иншим призначел и тото:

„Єден з найлєпших наших здобуткох до хторих зме дошли – то наша руска штредня школа у Руским Керестуре... ма народни характер. Дзеци ше позберали зоз седем наших найвекших местох. Ту ше вони упознаваю медзисобно... И то вшелïяк будзе мац одраженя и у ïх живоце.”

Треба ше здогаднуц и тих його словох: „Наша народна власц ше такой по ошлєбодзеню старала о школох и предложела нам же бизме, попри основних школох, отворели и ґимназию. Ту мушим здогаднуц на историят ґимназийох при других народох. Кельо ше лєм нашо браца на Горнïци борели же би достали ґимназию! Кельо раз Серби обивали праг Пешту и Бейчу док нє достали право отвориц ґимназию. А ми? Нам сама державна власц указала на тото же нам треба мац свою штредню школу! Нєшка ґимназия наша найвисша просвитна установа. Нєт анï єдного Руснака хтори нє зна же вона роби у Керестуре. Отверанє ґимназиï на руским язику ма за наш народ вельке историйне значенє. Велï роки, у прешлосци найвекша причина заостатосци була тота же зме нє мали свойо школи (дума ше на шреднï и висши – И.П.), у хторих бизме упознали напредни идеï о шлєбоди, ровноправносци шицких народох, о досцигнуцох науки и людского розума вообще.

Маюци у оглядзе же перши школски рок почал досц позно (25. фебруара), настава закончена аж 26. юлия 1945. року, односно тирвала пейц мешаци. Закончуюци испити указали же програма успишнє звладана. То ше могло видзиц и по тим же спомедзи коло 200 уписаних школярох, 54 або 27% закончели класу з одличним успихом, тє. кажди штварти школяр. Одлични школяре зоз фонду месних орґанизацийох доставали як дарунок кнïжки. Перши свидоцтва, односно „документ о успиху и справованю” подзелєни школяром 31. юлия 1945. року на пригодней шветочносци, зоз чим и бул закончени перши школски рок (скрацени).

Коло професора Гавриïла Надя (1913-1983), Просвитни оддïл Воєней управи за БББ меновал у януаре–фебруаре 1945. року и шлïдуюцих наставнïкох: Штефана Чакана (1922–1987) зоз Руского Керестура 22. януара 1945. року, Петра Ризнича (1890–1966), хтори (до Ґимназиï пришол зоз Вербасу) менованє достал 29. януара 1945. року, потим др Мафтея Виная (1898–1981) зоз Руского Керестура – 2. фебруара 1945. року. Од истого датума датує и поставенє Даринки Молдованович теди студенткинï филозофиï на роботу до Державней реалней ґимназиï у Руским Керестуре, як наставнïци за математику, физику и французки язик, а од 13. фебруара 1945. року и менованє Радмили Рис, апсолвента филозофиï.

Литература

[ушориц | ушор жридло]
  • Ирина Папуга, Русинска гимназија Руска ґимназия, Нови Сад, 2000, друге виданє 2022. року.
  • Двасто пейдзешат роки образованя на руским язику у Руским Керестуре, Руски Керестур-Нови Сад, 2003.
  • Ruski Kerestur gymnasium. See Gymnasium, P. R. Magocsi and Ivan Pop: Encyclopedia of Rusyn History and Culture, University of Toronto, 2005, ISBN 0-8020-3556-3, p. 426.

Вонкашнї вязи

[ушориц | ушор жридло]
Превьате зоз "https://rsk.wikipedia.org/w/index.php?title=80_роки_од_першей_Рускей_ґимназиї_у_Руским_Керестуре_(1945-_2025)&oldid=12661"