26. януар

26. януар — 26. дзень у року по Грегориянским календаре. До конца рока єст ище 339 днї (340 днї у преступним року).

Подїї

• 1941 — Формоване Подкарпатске Дружтво наукох, успишна науково-културна орґанизация Русинох, ликвидована 1944. року з боку комунистичного режиму.

• 2003 – Тенисерка Мартина Навратилова, котрей було 46 роки, освоєла зоз тенисером Леандером Паесом титулу на отвореним першенстве Австралиї у конкуренциї мишаних парох и постала найстарши тенисер котри освоєл єден ґренд слем турнир.

• Нєшка Шветови дзень образованя о защити животного стредку (eco-Schools), запровадзени є же би ше указало на важносц едукациї о еколоґийних проблемох и свидомосци о чуваню природи. Того 2026. року фокус на диґиталней трансформациї у еколоґийним образованю и применьованю иновативних ришеньох процив климатских пременкох.

• Означує ше и Медзинародни дзень царини, кед 1953. року отримана перша схадзка Совиту за царинске сотруднїцтво цо нєшка Шветова царинска орґанизация (The World Customs Organization (WCO).

• Нєшка Дзень Австралиї, зоз хторим ше означує дзень кед сцигла перша флота до Сиднею 1788. року, и Дзень Републики Индиї, зоз хторим ше означує ступанє на моц першого Уставу Индиї 1950. року.

Народзени

• 1873 — Иван Ґендер-Суходольски, писатель, педаґоґ, русински дружтвени активиста

• 1921 – Народзел ше Акио Морита (Наґоя, Япон, 26. януар 1921 – Токио, Япон, 3. октобер 1999), єден з сновательох компаниї Сони (Sony).

• 1925 – Народзел ше филмски ґлумец и режисер Пол Ленард Нюмен (Шейкер Хайдс, Огайо, ЗАД, 26. януар 1925 – Вестпорт, ЗАД, 26. септембер 2008).

• 1945 — Павле Роберт Маґочи (анґл. Paul Robert Magocsi), 26. януар 1945, историчар, карпаторусинист русинско-мадярского походзеня.