13. май
13. май — 133. дзень у року (134. дзень у преступним року) по Ґреґориянским календаре. До конца рока єст ище 232 днї.
Подїї
[ушориц | ушор жридло]- 1906 — Мария Склодовска Кири постала перша професорка Паризского универзитета.
- 1999 — Авиони НАТО звалєли рухоми мост у Вербаше на Вельким бачким каналу. Источашнє зоз ґрафитнима бомбами знова потрафени пошореня Електропривреди Сербиї, прецо без струї остали велї места, медзи хторима и часци Нового Саду.
- 1917 — Троїм пастиром, хтори напасали статок при валалє Фатима, указала ше Дїва Мария. Фатима нєшка єдно з найславнєйших одпустових местох католїцки вирнїкох на швеце.
Народзени
[ушориц | ушор жридло]- 1717 — Народзела ше австрийска царица, ческа и мадярска кралїца Мария Терезия (Беч, 13. май 1717 – Беч, 29, новембер 1780), була єдина жена владар габзбурґских маєткох и остатнї член династиї Габзбурґ. Владала як надвойводкиня Австриї, кралїца Угорскей, Ческей, Горватскей, Славониї, Галициї и Лодомериї, як войводкиня Мантови, Милана, Парми, Пяченци и Ґвастали и як владарка Австрийскей Голандиї и велїх ґрофовийох. Зоз малженством була царица Святого римского царства нємецкого народу, нємецка кралїца, велька войводкиня Тоскани. У русинским фолклоре є запаметана як "добра владарка".
- 1795 — Народзел ше словацки филолоґ и историчар Павел Йозеф Шафарик (Кобелярово, Словацка, 13. май 1795 – Прага, Ческа, 26. юний 1861), бул єден з сновательох славистики. Бул директор сербскей ґимназиї у Новим Садзе од 1819. по 1833. рок.
- 1851 — Народзел ше лїкар и писатель Лаза Лазаревич (Шабац, 13. май 1851 – Беоґрад, 10. януар 1891), бул психиятер и неуролоґ, писал приповедки сербского реализма.
- 1929 — Народзела ше учителька и панїматка Мелания Планчак, дзивоцке Канюх (Руски Керестур, 13. май 1929 – 22. новембер 2017). Учительску школу закончела у Сримских Карловцох и Суботици. Робела у Руским Керестуре, Новим Орахове, Коцуре, а найдлужей робела у Петровцох, нєшка у Горватскей, дзе ше цала фамелия преселєла 1969. року. Була учителька класней настави, руского, а познєйше и українского язика. Учителька пририхтовала и школски програми з нагоди державних шветох, вєдно зоз КПД Яким Гарди. У школи пририхтовала рочни школски часопис Венчик. У Петровцох була и директорка подручней школи, хтора припадала под вуковарску ОШ Други конґрес КПЮ, одкаль одходзи до пензиї 1985. року. Зоз супругом паноцом Кирилом Планчаком одходза до Нємецкей, до Нирнберґу, а врацаю ше до Руского Керестура 1998. року, ґу своїм дзецом и унуком. Учителька Мелания Планчак похована на керестурским теметове.
Умарли
[ушориц | ушор жридло]- 1930 — Фритьо Нансен, норвежски арктицки виглєдовач, науковец, доктор зоолоґиї, фундатор новей науки под назцу Физикална океаноґрафия, политични и дружтвени дїяч, гуманиста, филантроп, лауреат Нобеловей награди (1922).
- 1948 — Василий Такач, грекокатолїцки священїк и перши владика Русинскей грекокатолїцкей церкви у ЗАД.