Японска кухня

Японска кухня облапя реґионалне и традицийне єдзенє зоз цалого подруча Япону. Традиционална кухня Япону, вашоку (和食) заснована на рискаши зоз мисо-юшку и другима єдлами у хторих єст досц сезонски состойки. Прилоги часто риба и желєнява варена у юшки. Плоди моря тиж так звичайне єдло и часто ше их пририхтує на жирячки, алє их тиж так мож хасновац и сирови у форми сашимию або сушу. Плоди моря и желєнява ше тиж так валя до цеста и пражи. Тота ґрупа єдла ше вола темпура (天ぷら, 天婦羅). Окрем рискаши, звичайни и резанки як цо то соба (そば) и удон (うどん).

Суши

Суши (すし、寿司, 鮨, 鮓, 寿斗, 寿し, 壽司), сирова риба сервирана на рискаши, а як присмачку ше хаснує есенц. Єст и велї вариянти хтори одступаю од того правила, а найпознатши уни (ユニ) (морски їж) и ама-еби(アマエビ) (сладки раки). Ориґинална форма сушия, нєшка познати як нарезуши, першираз направени у Юговосточней Азиї. Єст вецей файти сушия як цо то чирашизуши (ちらし寿司), инаризуши (稲荷寿司), макизуши (巻寿司), нарезуши (熟れ寿司), ниґиризуши (握り寿司), ошизуши (押し寿司).

Рамен

Рамен то резанки у сланей юшки и вони приклад єдла хторе увежене зоз Китаю. Єст штири главни народни стили: тонкоцу (トンコツ) (швиньска косц), мисо (味噌), сойова мачанка (шою)(醤油) и соль (шио)(塩). Фукуока (福岡) окреме позната по тонкоцу рамену. Мисо рамен специялносц Гокаиду. Рамен ше по правилу прави зоз штирох основних состойкох: житна мука, соль, вода и кансуи (関水) (алкална вода у хторей розпущени натриюм и калиюм бикарбонат). Основа за юшку углавним швиньски буйон або буйон з курчецини, у комбинациї з розличнима состойками як цо то алґи (комбу)(こんぶ), туна (кацуобоши)(カツオブシ), сушени сардини (нибоши)(ニボシ) и цибуля.

Унаґи

Унаґи (ウナギ) рична єґуля, печена на жирячки и премасцена зоз сладку мачанку за роштиль. У народзе ше вери же унаґи свойофайтови "процивотров" за горучаву и влагу японского лєта, а єст и народне швето кед ше послугує и є унаґи, Дзень волох, хторе пада коло половки юлия (Doyo no ushi no hi)(牛の日). Унаки суши ше прави зоз унаґи єґульох и огуркох. Пре опасносц за здравє, єґулї ше вше вари, а найчастейше ше их послугує зоз тара-мачанку. Унаґи хтори ше пече лєм у сойовей мачанки познати як шираяки (シラヤキ).

Соба

Соба (そば) длугоки, ценки резанки хтори ше прави зоз гречковей муки. Нормално ше их послугує у горуцей сойовей мачанки зоз юшку або на хижней температури на окремним постолю з бамбусу зоз юшку хтора стої збоку и до хторей ше их мача. Соба ше углавним є зоз палїчками, и у Японє прилаплїве хлїпац док ше є резанки, бо ше вони так хладза.

Шабу-шабу

Шабу-шабу (シャブシャブ) японска ономатопея за звук ценких фалаткох говедзини або швиньского, хтори ше зоз палїчками уруцує до зовартей юшки.

Окономияки

Окономияки (お好み焼き) буквално "на роштилю як цо сцеце", представя нови пренаходок. То слана палачинка полнєта по жаданю (алє углавним зоз капусту и швиньским месом) зоз обовязну морску траву, майонезом и мачанку. Кансаи або осака-стил найзаступенши верзиї того єдла. Початну масу за праженє ше прави з муки до хторей ше додава натарти наґаимо (файта яма), воду або даши-буйон, вайца и нашеканей капусти, а кладзе ше и други состойки як цо то желєна цибуля, месо (обично ценке пасмо швиньского бруха, часто ше миша зоз сланїну), октопод, лиґнї, шкампи, желєнява, мочи (японски колач з рискаши) або сир. У зависносци од жридла, окономияки ше трима за омлет або за палачинку, алє ше их частейше трима за палачинку.

Тонкацу

Тонкацу (トンカツ) паховани швиньски котлет пражени у вельо олєю, датирує зоз позного 19. вику кед Япон бул под уплївом заходних жемох. Найпознатше швиньске месо хторе ше хаснує за тонкацу: то куро-бута (Беркшир) и Каґошима. Послугує ше зоз мисо-юшку и нашекану капусту.

Якитори

Якитори (焼鳥) то рожнїч з курчецового меса ше послугує зоз жимним пивом. Скорей ше якитори тримало за вояцке єдло. Месо з курчеца за якитори ше прави з рижних часцох курчеца, а сами рожнїчи ше послугує посолєни (шио) або зоз таре-мачанку (файта сойовей мачанки).

Литература

Oxford English Dictionary, Second edition, 1989.
Totman, Conrad (2002). A History of Japan

Вонкашнї вязи

Japanska kuhinja, scribd.com

Japanska fermentisana hrana, hrana-pice-price.com

Šta jedu turisti u Japanu, savetizaput.com