Янко Ґубаш

Янко Ґубаш
Народзени	23/8. марца 1838.
Умар	13/26. марца 1887
Державянство	угорске
Язик творох	руски, старославянски
Школа	Основна
Польо дїялносци	просвита, дзиякованє
Поховани	На грекокатолїцким теметове у Дюрдьове

Янко Ґубаш (*23/8. марец 1838—†13/26. марец 1887), перши руски дзияк и учитель у Дюрдьове.

Биоґрафия

Янко Ґубаш народзени 23/8. марца 1838. року Коцуре. У чаше кед жителє Керестура и Коцура почали насельовац нови валали у Бачкей и Сриме вон ше преселєл до Дюрдьова.

О нїм ше мало знало алє ше, дзекуюци єдному нєсподзиваному, а вшелїяк значному материялному пренаходку, хтори ше одбул 1998. року на руским теметове у Дюрдьове, а у вязи зоз пририхтованьом места за будованє новей теметовскей каплїчки, дознало же Перша и Друга церква мала и свойого дзияка. Отже, пренайдзени надгробни памятнїк Янка Ґубаша на хторим бул витлучени надпис шлїдуюцого змисту: Ту спочива цело слуги Божого Янка Ґубаша бувшого першого дзияка русского у Дюрдьове. Родзени у Коцуре фебруара 24/8, року 1838. Умар марта 14/26 1887.-го. Тот памятнїк поставели: любена супруга Мария и ожалосцени дзеци Николай, Янко, Андрей, Марко и Меланка. Вична му памят. 1

Борец за рускосц

Янко Ґубаш нє бул лєм дзияк алє и учитель у вироисповидней школи (1880 – 1883) котра дїйствовала як при першей так и при другей церкви. Вон заслужує вельо векшу увагу и припознанє од тих даскелїх памяткох яки постоя о нїм и о його дїлу у руским историйним паметаню.

Янко Ґубаш бул вельки борец за рускосц у чаше формованя першей вироисповидней школи при Першей и Другей церкви, и бул процивнїк преходу рускей конфесийней школи на державну зоз мадярским наставним язиком, котри ше одбул 1883/4. року. Пре таке свойо становиско, пре свойо рускосци вирне, достоїнствене и чесне процивенє зради рускей конфесийней школи з руским наставним язиком на хасен державней з мадярским викладаюцим язиком, перши руски дзияк и учитель Янко Ґубаш мушел заплациц зоз утрату свойого учительского места.

О тих подїйох автор Историї русского народу - Николай Д. Олеяров, шведочи зоз шлїдуюцима словами: Исто так помадярени були нашо руcски школи и у Дюрдьове. Но там ше заж лєм нашла єдна чиста русска душа, котра ше бунєла барз процив мадяризациї наших школох. То бул тедишнї дюрдьовски русски учитель Янко Ґубаш, котри зоз шицкима силами одгварял народ же би свойо школи нє дал. Но нагвариц му народ нє пошло за руку, бо процив нього робели и велї страцени души котри од Мадярох чекали фалаток хлєба и награди. Так и до Дюрдьова заведзени мадярски школи, гоч ше як барз покойни учитель Янко Ґубаш борел процив того. На його вельке нєщесце тот учитель, вельки Русин и тварди Славян страцел дораз свойо учительске место, бо го Мадяре нє церпели, чим помадярели школу.

Янко Ґубаш умар 13/26. марца 1887. року. Бул поховани на теди ище вше новим грекокатолїцким теметове у Дюрдьове.

Референци

1 На памятнїку погришно урезани датуми народзеня и шмерци по юлиянским одн. грегориянским календаре.