Янко Шандор

Янко Шандор
Янко Шандор (1934. року)
Народзени	24. марца 1884.
Умар	28. марца 1939 (55)
Державянство	угорске, югославянске
Язик творох	руски
Школа	Учительска школа, Ужгород,Прешов
Период твореня	1904—1938.
Жанри	образованє, просвита
Поховани	у Руским Керестуре

Янко Шандор (*24. марец 1884—†28. марец 1939), учитель, управитель основней школи у Руским Керестуре.

Биоґрафия

Янко Шандор ше народзел 24. марца 1884. року у Коцуре. Мал два шестри, єдна була одата у Тимкових у Вербаше, а друга у Фейсових у Коцуре.

З учительскей дипломи видно же Янко Шандор закончел 1904. року за учителя у Прешове и же бул оспособени за наставу на мадярским и руским язику у народних основних школох. Зоз дипломи мож замерковац же образованє тедишнїх учительох тирвало штири наставни роки, як и же учитель Янко Шандор I школски рок ходзел до Ужгороду, а II-IV до краль. грекокатолїцкей Учительскей школи у Прешове, хтору и закончел 1904. року.

Кратши час Янко Шандор робел у грекокатолїцкей школи у Надь Шерсту.

Конкурс за нового учителя у школи у Руским Керестуре бул розписани 1908. року. Приявели ше двоме кандидти: Осиф Фа и Янко Шандор. За учителя бул вибрани Янко Шандор. Теди мал 24 роки.

Янко Шандор бул оженєти зоз Маriju Stumpfögger, по походзеню Нємицу зоз Брестовцу (тераз Бачки Брестовец). Мали двойо дзеци, дзивку Єлисавету (1916-1979), хтора була одата за о. Мирона Гирйоватого (1914-1984) и сина Янка Шандора, народзеного 1927. року у Руским Керестуре.

Нєт сумнїву, учитель Янко Шандор бул руски предняк хтори бул у контакту з велїма рускима церковнима и просвитнима предняками. Як управитель школи орґанизовал єй роботу и представял школу пред власцами, дочековал значних госцох хтори нащивйовали Руски Керестур о чим шведоча и велї добре очувани фотоґрафиї.

Учитель Янко Шандор умар 28. марца 1939. року у Руским Керестуре од туберкулози, а на хованю му шпивал хор зоз Карпатох.

Його супруга Мария, по походзеня Нємица, була 1944. року, вєдно зоз свою мацеру, вигната зоз Войводини до Нємецкей дзе и умарла.

Ґалерия

• 
  Учительски колектив  у Руским Керестуре 1912. року. Стоя: Константин Петриґала, Дюра Баконї,  Дюра Манойлов, Янко Шандор,  Осиф Фа, шедза: Веруна Гарди, учителька, Ирена Рот родз. Джуня, забавиля,  Михаил Поливка управитель, о. Дюра Биндас, катехета, Наталия Джуня, учителька
• 
  Керестурски учителє, священїки и одборнїки 1934. року. Стоя з лїва: о. Янко Будински, учитель и дзияк Михал Няради,  учитель Константин Петриґала, його дзивче Дода и опрез нєй учителька  Ана Тимко родз. Биндас, учитель Дюра Манойла, опрез нього оводарка Ирина Джуня, учителька Ґалускова (у калапе) на рукох трима дзецко, опрез нєй Белка, оводарково дзивче, учителька Маґдалена Дудаш, одборнїк Томислав Гарди, одборнїк  Михал Колошняї,  учитель Осиф Фа,  одборнїк Андри Медєши, одборнїк Данил Рац. Шедза з лїва: одборнїк дїдо Рацмишков,  одборнїк Михал Макаї, првославни монах,  о. Михал Черняк, директор школи Янко Шандор,  одборнїки Микола Рац, Михал Олеяр, Михал Сабадош и Михал Шимко.
• 
  Учительски колектив керестурскей школи 1933. року. Стоя: Константин Петриґала, учитель, Маґдалена Дудаш, учителька,  о. Дюра Микловш, паноцец, Манойла, учитель, нєпозната, o. Янко Будински, паноцец и Дюра Дудаш, учитель, шедза: Осиф Фа, учитель, Ирина Рот родз. Джуня, вихователька,  о. Михайло Мудри, парох, пред. РНПД, Янко Шандор, учитель управитель школи , Наталия Джуня, учителька и Михайло Няради, учитель

Литература

• Янко Рамач, Школа у Руским Керестуре (1753-1918), Грекокатолїцка парохия св. Петра и Павла, Нови Сад, 1995. б. 120.

Вонкашнї вязи

• История школи, Основна и штредня школа зоз домом школярох „Петро Кузмяк” Руски Керестур, вебсайт школи, наслов Державна школа 1899-1918. (список учительох).