Янко Сеґеди

Янко Сеґеди
(портрет)
Особни информациї
Назвиско	Пипо
Народзени	1. септембра 1927.
Умар	23. септембра 1994. (67)
Поховани	на Руским теметове, Кула
Висина
Позиция у тиме
Спорт	столни тенис, фодбал
Державянство	югославянске
Сениорска кариєра
Рок Тим Ґоли
1945—1961 ФК Русин

Янко Сеґеди Пипо (*1. септембер 1927—†23. септембер 1994), тарґовец, столнотенисер и фодбалер зоз найдлугшим фодбалским стажом у сторочним иснованю СД Русин у Руским Керестуре.

Биоґрафия

Янко Сеґди ше народзел 1. септембра 1927. року у Сримскей Митровици и бул єдно од пецерих дзецох паноца Владимира Сеґедия, хтори бул родом зоз Петровцох, и панїматки Меланиї народз. Олеяр (Ондова) родом зоз Руского Керестура. Янко мал братох Звонка и Юрая (Дюру) и шестри Цецилию и Наду. Владимир Сеґеди бул парох у грекокатолїцкей церкви у Сримскей Митровици. Кед Янкови було два роки нєсподзивано му умар оцец Владимир. Нєодлуга, 1932. року, за паноцом умарла и панїматка Мелания. Старосц о пецерих широткох превжали на себе Меланийово родичи, дїдо Михал и баба Юлияна Олеярово Ондово. Дзеци пошли до Керестура, там жили, школовали ше та женєли и одавали ше помагани з боку дїда и баби Олеярових. Янко Сеґеди ше, з їх помоцу, виучел за тарґовца.

Янко Сеґеди ше оженєл 1952. року зоз Амалию Шайтош и у малженстве мали двойо дзеци, Ксению и Владимира.

Янко Сеґеди бул у єдним периодзе 50-их рокох ХХ вику, и директор тарґовинского подпириємства Трґопромет у Руским Керестуре.

Спортска кариєра

Янко Сеґеди Пипо бул, на своїх початкох, барз добри бавяч столного тенису. Уж концом 1945. и у 1946. року вон бул у екипох хтори победзовали на турнирох. После снованя СТК Ґрафичар (Руски Керестур) постал член и єден з найлєпших столнотенисерох того клуба. Опробовал ше Янко Сеґеди и як атлетичар. Под надпатрунком Яши Бакова тренирал скаканє до висока з палїцу и руцал копиї до далєка. Источашнє вон бавел у подростку Русина у хторим були барз добри млади бавяче хтори росли под час другей шветовей войни. Уж у марцу 1946. вон бавел и перши змаганя за ФК Русин а концом мая на змаганю у Вербаше Пипо посцигнул свой перши ґол зоз 25 метерох.

Янко Сеґеди Пипо бул спортиста зоз найдлугшим фодбалским стажом у сторочним иснованю СД Русин у Руским Керестуре. И вирни свойому тиму бо його 20-рочна фодбалска кариєра вязяна лєм за ФК Русин з Керестура.

Янко Сеґеди бул борбени и пожертвовни бавяч, ґолґетер, капитен екипи, у бавискох давал максимум алє то вимагал и од шицких бавячох Русина. Пипо ше барз радовал успиху тима, алє и медзи першима реаґовал на нєспортске справованє бавячох або на нєсправедлїве дзелєнє судийскей правди на спортским терену. Вон длуго и чувствительно преживйовал нєуспих екипи Русина, лєбо свойо ридки гришки у бавискох на спортских теренох.

У тедишнї час до ФК Русин приходзели або одходзели велї бавяче хтори були младши од Янка Сеґедия Пипу хтори, вєдно зоз його кумом Янком Дудашом Шимраком оставал вирни Русинови. Пипо бул капитен керестурских фодбалерох 30. юлия 1961. року на приятельским змаганю у Руским Керестуре, пред вецей як 2000 патрачами, кед першираз госцовал новосадски першолиґаш ФК Войводина (Русин-Войводина 1:7).

У єшеньскей часци першенства 1961. року у Вербаским фодбалским подсоюзу, Керестурци першу часц першенств закончели на першим месце на таблїчки. Янко Сеґеди Пипо 5. новембра 1961. року одбавел остатнє першенствене змаганє процив екипи зоз Липару и одпитал ше од керестурских патрачох. Внєдзелю вечар, 12. новембра 1961. року у Желєней загради, дзе були просториї СД Русин, отримана шветочна схадзка зоз хтору означена 20-рочнїца бавеня фодбала Янка Сеґедия хтори з тим и закончел свою фодбалску кариєру. Нєодлуга, фамелия Янка Сеґедия ше преселєла до Кули дзе вон предужел робиц як тарґовец.

Янко Сеґеди умар 23. септембра 1994. року. Поховани є на Руским теметова у Кули.

Литература

• Йоаким Грубеня, „Пипова ераˮ, Руски християнски календар за 2022. рок, НВУ Руске слово, 2021, б. 265.
• Мирон Жирош, „Дружтвена тарґовинаˮ, Бачванско-сримски Руснаци дома и у швеце 1745-2001, Том IV, НВУ Руске слово и Грекокатолїцка парохия св. Петра и Павла, Нови Сад, 2004, б. 297.